1 Samwelo 24 - Baibo Busansulushi Bwa Libuku Ili

Defedi mbwaakalekelela Saulo kutamucaya

¹ Mpeeke Saulo ndyaakapiluka kuswa mukutandaanya bene Filisiti, wakalwiitikwa ayi, “Defedi uli muluyanga lwiitwa ayi Eni Gedi.”

² Lyalo Saulo wakasala bashilumamba balibo myaanda yotatwe mucishi ca Isilaeli coonse akunyamuka kuya mukulangoola Defedi kwicwe lya musena wakalinga kwiitwa ayi Mabwe a Mpongo ya Muluundu.

³ Ndibakashika pafwaafwi ashaanda sha mbelele pamwi munshila, pakalinga acimfwengo umo Saulo mwaakanjila ayi alicafwilishe. Anu mucimfwengo mweenka umo, mukati mwiine, Defedi abashilumamba mobakalinga.

⁴ Mpomunyaawo Defedi bashilumamba bakamulwiita ayi, “Ici nceciindi cako cilya Mwaami Lesa ncaakaamba ndyaakaamba ayi, ‘Ndaakwaaba mulwani wako mumaansaako kwaamba ayi ukamucite cili coonse nceshi ukasune.’ ” Mpeeke Defedi wakamubendelela akutimbula cakufwala cakwe Saulo ca Peculu kulikonko.

⁵ Pesule moyo wakapensha Defedi ceebo cakutimbula cakufwala cakwe Saulo kulikonko.

⁶ Wakaambila bashilumamba bakwe ayi, “Mwaami Lesa ansosoloshe kukucita cintu ca mushobo uyo kumwaami wangu, uyo mwiine ngwaakasala. Nteeleshi nabibo kumutyunka munwe ceebo kuba mwaami wakacita kusalwa aMwaami Lesa kwiinda mukunanikwa mafuta.”

⁷ Lyalo mumaswi ayo Defedi wakalengesha bashilumamba bakwe kumunyumfwila pacikani cakwaamba ayi tabeelete kucaya Saulo. Mpeeke Saulo wakanyamuka ayi anooya.

⁸ Mpomunyaawo Defedi wakaswa mucimfwengo akoolobesha kuli Saulo ayi, “Nkambo nobaami bangu!” Saulo ndyaakalanga kwisule, Defedi wakamufukamina cakushisha ciwa panshi mukumulemeka.

⁹ Mpeeke wakaambila Saulo ayi, “Ceebonshi mutoonyumfwila bantu batoomulwiita ayi nebo ntoomufwima ayi mucaaye?

¹⁰ Sunu mwebo nobeene mwaboona ameenso anu kwaamba ayi Mwaami Lesa waalinga wamwaaba mumaansaangu mucimfwengo mulya. Bamwi balinga bandwiita ayi mucaaye, sombi ndamulekelela mukwiinga ndeebaluka kwaamba ayi mwakacita kusalwa aMwaami Lesa ayi mube baami.

¹¹ Ta, amubone kasani aka! Ndakatimbula kulikonko lya cakufwala canu ca peculu sombi nshikwe kumucaya. Ono munyumfwishe akwishiba kwaamba ayi nshiciteewo mulandu wakucita cilubite nabi kumwaashukila. Taaku ncindakamulubishisha, sombi mutooya cimfwima ayi muncaaye.

¹² Ncibotu, Mwaami Lesa oomboloshe pakati kanu anebo. Alimwi Mwaami Lesa aabooshe cishole pashilubo nshemwacita pali ndime, nakubi boobo nebo teshi nkamutyunkeewo nabibo munwe.

¹³ Mbweeke bubete mwaambo ulya ukulukulu wakwaamba ayi, ‘Kubamucita shibi nkokuswa micito ya bubi,’ aboobo anebo teshi nkamutyunkeewo nabibo munwe.

¹⁴ Anu mwaami wa bene Isilaeli utoosa cikonkela ni? Ngani ngwaatoosa citandaanya? Sa te ngukabwa ufwite? Nabi ninjina?

¹⁵ Ncakwiila Mwaami Lesa aatoomboloshe nguwe kubona ulubite pakati kesu. Aalangelange cikani cangu akutondesha ayi ndiluleme mukumfuna kuswa mumaansaanu.”

¹⁶ Mpeeke ingayi Defedi amane kwaamba, Saulo wakeepusha ayi, “Sa ncakwiila ndiwe Defedi omwanaangu?” Mpomunyaawo Saulo wakalila cakooloma.

¹⁷ Lyalo Saulo wakaamba ayi, “Webo ulisalalite kwiinda ndime, wampa munyemfu sombi nebo ndakupa cifuwa.

¹⁸ Sunu wantondesha mboobete kabotu kuli ndime mukwiinga tookwe kuncaya nakubi kwaamba ayi Mwaami Lesa walinga wangaba mumaansaako.

¹⁹ Sa na muntu wacana mulwani wakwe inga wamulekabo kutamucisaawo? Mwaami Lesa aakupe coolwe ceebo ca ceeco ncewancitila sunu.

²⁰ Ndishi kwaamba ayi ulaakuba mwaami alimwi ayi cishi ca bene Isilaeli cilaakushimpa kwiinda muli ndiwe.

²¹ Ono nshomeshe muliina lya Mwaami Lesa ayi teshi ukalobye bamulunyungu lwangu kwaamba ayi liina lyangu alya bata atakaluubwi cakumaninina.”

²² Mpeeke Defedi wakashomesha mbweeke ubo cakulumbila kuli Saulo. Lyalo Saulo wakaboolela kumushi, sombi Defedi abashilumamba bakwe bakaya kucimfwengo.