1 Samwelo 23 - Baibo Busansulushi Bwa Libuku Ili

Defedi mbwaakapulusha bamundabala ya Keila

¹ Mpeeke Defedi wakanyumfwa ayi bene Filisiti batoolwana ndabala ya Keila akunoosaala shili anga ngamaila shakaswabo mukutebulwa.

² Mpomunyaawo wakeepusha kuMwaami Lesa ayi, “Sa bene Filisiti nje mbalwaane?” Mwaami Lesa wakamukumbula ayi, “Ee, koya ukabalwaane, upulushe bamundabala ya Keila.”

³ Sombi bashilumamba bakwe Defedi bakaamba ayi, “Muno muJuda tulicite kale boowa. Ono cilaakweela kuli muKeila twaakuya mukulwana abene Filisiti!”

⁴ Lyalo Defedi wakeepusha Mwaami Lesa alimwi, mpeeke wakakumbula ayi, “Koyabo kuKeila mukwiinga ndaakwaaba bene Filisiti mumaansaako.”

⁵ Aboobo Defedi abashilumamba bakwe bakaya kuKeila akulwana bene Filisiti. Bakacaya baanji akubwesa shifubwa shabo. Mboboobo Defedi mbwaakapulusha bamundabala ya Keila.

⁶ Ono Abiyata mwanaakwe Aimeleki ndyaakaloboka akuya mukwikala aDefedi muKeila, wakabwesa acakufwala ca bupailishi ciitwa ayi efodi akuyaaco.

Saulo mbwaakakonkela Defedi

⁷ Saulo ndyaakanyumfwa ayi Defedi wakaya kuKeila wakaamba ayi, “Lesa wamwaaba mumaansaangu ayi mucaaye, mukwiinga mwiine walibika muntolongo kwiinda mukwinjila mundabala icite minjililo ampingilo sha sheela.”

⁸ Mpomunyaawo wakabunganya bashilumamba bakwe boonse ayi baye kuKeila, bakashinguluke Defedi abashilumamba bakwe boonse alimwi akubalwana.

⁹ Defedi ndyaakeshiba ayi Saulo utooyeeya kumulwana, wakaambila Abiyata mupailishi ayi, “Leta efodi.”

¹⁰ Lyalo wakapaila ayi, “NoBaami baLesa, baLesa ba bene Isilaeli, nebo nemusebenshi wanu ncakwiila ndakanyumfwa kwaamba ayi Saulo utooyeeya kwisa muKeila muno akunyonyoola ndabala iyi ceebo ca ndime.

¹¹ Ono sa bamundabala ya Keila iyi balaakungaba mumaansaakwe Saulo? Sa ncakwiila Saulo ulaakwisa kuno mbuli mbondakanyumfwa nemusebenshi wanu? NoBaami baLesa, baLesa ba bene Isilaeli amundwiite nemusebenshi wanu.” Mwaami Lesa alakwe wakakumbula ayi, “Ulaakwisa.”

¹² Mpomunyaawo wakeepusha ayi, “Sa ba mundabala iyi ya Keila balaakungaba pantu pomwi abashilumamba bangu mumaansaakwe Saulo?” Mwaami Lesa wakakumbula ayi, “Ncakwiila balaakucita ubo.”

¹³ Mpeeke Defedi abashilumamba bakwe abo bakalinga mpashi myaanda ili yosanwe amwaanda womwi bakaswaako kuKeila uko akunooya cilongalonga. Lyalo Saulo ndyaakanyumfwa ayi Defedi wakalobokaako kuKeila, taakwe kuyaako.

Defedi mucishi ca tulundu

¹⁴ Defedi wakekala mushimfwengo sha muluyanga lwa Sifu, mucishi ca tulundu. Saulo wakalinga kulangoola Defedi bwaca abwaca, sombi Mwaami Lesa taakwe kwaaba Defedi mumaansaakwe Saulo ayi amucaaye.

¹⁵ Defedi ndyaakalinga kuOleshi muluyanga lwa Sifu, wakafwa boowa kunyumfwa ayi Saulo utoosa cimuyandoola ayi amucaaye.

¹⁶ Sombi Jonasani mwanaakwe Saulo wakaya kuli Defedi kuOleshi uko mukumuyumyayumya ayi Lesa ulanoomufuna.

¹⁷ Wakaamba ayi, “Utaloondi, bata taaku nceshi bakuciteewo. Webo ulaakuba mwaami wa Isilaeli, nebo ndaakuba mucafwi wako. Ici cikani bata balicishi.”

¹⁸ Lyalo bobilo abo bakapanga cipangano pameenso aMwaami Lesa. Mpeeke Jonasani wakaboolela kumishaabo, sombi Defedi wakacaala kuOleshi.

¹⁹ Ono bantu bamwi bene Sifu bakaya kuli Saulo kuGibiya akuluula ayi, “Defedi uliyubite mushimfwengo mucishi cine misheesu, kuOleshi, pakalundu ka Akila, kumalenge a Jeshimoni.

²⁰ Ono nobaami inga mwesa kucishi cine misheesu mpweenga mwayandila nobeene, mpeeke swebo tulaakubikaako maano kwaamba ayi mumucate.”

²¹ Saulo wakakumbula ayi, “Mwaami Lesa amupe coolwe ceebo ca nkumbu shanu pali ndime.

²² Ono muye taanguna muboneshe. Mukeepushe nkwaayuba Defedi lyoonse awakamubonaako uko. Bantu balandwiita ayi ulicenjete abuumbi.

²³ Mukeepushe misena yoonse njaayubaamo, lyalo mukese kuno alimwi mukandwiite lushinisho lwiine lwiine. Kuswawaawo ndaakuyaanu alimwi na ali kumusena uyo, ndaakumulangoola pakati ka bene Juda boonse.”

²⁴ Bantu abo bakatanjila kuSifu, Saulo keesa pesule. Defedi abashilumamba bakwe ico ciindi kabali muluyanga lwa Maoni mucinyika cili kulaale amishi kumalenge a Jeshimoni.

²⁵ Saulo abashilumamba bakwe bakatalika kuyandoola. Sombi Defedi ndyaakalwiitikwa cikani ico, wakaya kumwaandami akwikala muluyanga lwa Maoni. Saulo ndyaakanyumfwa nkwaabete wakaya muluyanga lwa Maoni kuya cikonkela Defedi.

²⁶ Ono Saulo wakalinga kwiinda kulubasu lomwi lwa kalundu alakwe Defedi abashilumamba bakwe kaainda kulumwi lwa kalundu ako cakwiingana kwaamba ayi ashiye Saulo. Lyalo Saulo abashilumamba bakwe ndibakalinga kuya cishika pafwaafwi aDefedi abashilumamba bakwe ayi babacaate,

²⁷ shinkombe wakapola kuli Saulo akumulwiita ayi, “Amweendeshe tiya! Bene Filisiti batoolwana cishi cesu.”

²⁸ Mpomunyaawo Saulo wakacileka kutandaanya Defedi akupiluluka ayi akalwaane bene Filisiti. Nceceeco musena uyo ncebawiitila ayi Sela Amaalekoti nkokwaamba ayi Kalundu kakupansaanishikwa.

²⁹ Defedi wakaswaako uko akuya kumusena wiitwa ayi Eni Gedi uko nkwaakalinga kuyubite mushimfwengo sha mabwe.