1 Samwelo 22 - Baibo Busansulushi Bwa Libuku Ili

Defedi mbwaakaya kuAdulamu akuMisipa

¹ Defedi wakaswaako kuGati akulobokela kucimfwengo ca kuAdulamu. Bamakwabo abamuŋanda ya baishi ndibakanyumfwa ayi nkwaabete uko, bakamukonkela.

² Mpeeke bantu boonse bakalinga kuungumene, bakalinga munkongole abaabo batakalinga kukondetwe bakaya kuli nguwe, lyalo wakaba mutanjilili wabo. Pantu pomwi bakalinga basankwa mpashi myaanda yone.

³ Kuswa kooko Defedi wakaya kuMisipa muMoabu akwaambila mwaami wa kuMoabu ayi, “Sa inga tamusuminishi bata abama kwisa mukwikalaanu kushikila nkeshibe Mwaami Lesa nceshi akancitile?”

⁴ Lyalo wakashiya baishi amwaami wa bene Moabu. Mpeeke bakekalaabo ciindi coonse Defedi ncaakalinga kuyubite mucimfwengo.

⁵ Ono mulaluki Gadi wakaya kuli Defedi akumulwiita ayi, “Utanookaloomuno, nyamuka bweenka bulya uye kucishi ca Juda.” Mpeeke Defedi wakaswaamo akuya kumusaansa wa Eleti.

Saulo mbwaakacaya bapailishi bene Nobu

⁶ Lyalo bushiku bumwi Saulo wakanyumfwa ayi Defedi abasankwa bakwe baboneka. Wakalinga kushiite pakalundu mucisamu ca tamalisiki kuGibiya kaacite alisumo mulyaansa lyakwe, bamatanjilili ba bashilumamba boonse kabamushingulukite.

⁷ Saulo wakabaambila ayi, “Amukutike mwebo nobasankwa bene Benjameni! Sa mutooyeeya ayi Defedi ulaakumupawo myuunda imwibo aya minyansa? Sa noonse ulaakumulengesha kuba bamatanjilili ba bashilumamba bali shuulu aba bali myaanda?

⁸ Sa te nceceeco noonse ncemwangalookilila? Amubone taaku wakandwiita ayi mwanaangu musankwa wapanga cipangano amwanaakwe Jese ulya. Taakuuwo pakati kanu umbikiteko maano nabi wakandwiitawo ayi mwanaangu wayunga Defedi musebenshi wangu ayi ancaaye. Bulya utoolangoolabo ciindi cakwaamba ayi ancaileewo.”

⁹ Ono Dowegi, musankwa mwine Edomu uyo wakalinga kwiimfwi abamatanjilili ba bashilumamba bakwe Saulo palya wakaamba ayi, “Nebo Defedi ndakamubona ndyaakesa kuli Aimeleki mwanaakwe Aitubu musankwa kuNobu.

¹⁰ Aimeleki wakamwiipushishaako kuMwaami Lesa akumupa shakulya alimwi amupeeni wakalinga wakwe Golyati mwine Filisiti.”

¹¹ Mpomunyaawo mwaami Saulo wakatumaako bantu ayi balete Aimeleki mupailishi mwanaakwe Aitubu pantu pomwi abamakwabo boonse abo bakalinga bapailishi kuNobu. Mpeeke abalo bakesa kuli nguwe.

¹² Saulo wakaamba ayi, “Kutika ono omwanaakwe Aitubu.” Alakwe wakakumbula ayi, “Ee, nkambo.”

¹³ Saulo wakamwiipusha ayi, “Ino webo aDefedi mutoomfwiminashi? Ceebonshi wakamupa cimaande, mupeeni wakalinga wakwe Golyati alimwi akumwiipushisha kuMwaami Lesa? Ono toobwene wangalookila, bulya utooyandoolabo ciindi cakuncailaawo.”

¹⁴ Aimeleki pakumukumbula wakeepusha ayi, “Ngani pakati ka basebenshi banu umunyumfwila mbuli Defedi mukwe wa kubwalo? Sa te ngumutanjilili wa bashilumamba bamulindilila, ulemekwa kubamuŋanda yanu yoonse?

¹⁵ Ino sa bwakaba mbobushiku bwakwiiya kwiipushisha Defedi kuli Lesa? Sobwe! Nebo nemusebenshi wanu nobaami mutambekeshibo nabi kubekesha womwi wa bamuŋanda ya bata, mukwiinga nebo nemusebenshi wanu nshicishi citoocitika apa.”

¹⁶ Nakubi boobo mwaami Saulo wakaamba ayi, “Aimeleki, ncakwiila utoofwa pantu pomwi abamuŋanda ya baiso boonse.”

¹⁷ Lyalo mwaami uyo wakaambila beshikulindilila bakalinga kwiimikana pafwaafwi anguwe ayi, “Amucaye bapailishi aba ba Mwaami Lesa boonse mukwiinga abalo bali kulubasu lwakwe Defedi. Bakalinga kwishi ayi utooloboka, sombi tabakwe kundwiita.” Nakubi boobo balo tebakalinga kusuminite kucaya bapailishi ba Mwaami Lesa.

¹⁸ Mpeeke mwaami wakaambila Dowegi ayi, “Nyamuka webo ucaye bapailishi aba.” Mpomunyaawo Dowegi mwine Edomu uyo wakabacayoola boonse. Bushiku ubo wakacaya basankwa bali 85 boonse kabafwala kale shakufwala sha bupailishi, shakapangwa kunsalu ibotu iteshimite, shiitwa ayi efodi.

¹⁹ Alimwi Saulo wakacaisha abantu boonse bakalinga kwikala mundabala ya bapailishi ya Nobu, nkokwaamba ayi basankwa abanakashi bamanene, banike, bakateta pantu pomwi aŋombe, mbongolo alimwi ambelele.

²⁰ Ono Abiyata mwanaakwe Aimeleki alimwi mwishikulu wakwe Aitubu, wakaloboka wakacica akulobokela kuli Defedi.

²¹ Mpeeke wakalwiita Defedi ayi mwaami Saulo wakacaya bapailishi ba Mwaami Lesa bamwi.

²² Mpomunyaawo Defedi wakaamba ayi, “Bulya bushiku ndakeshiba kwaamba ayi Dowegi mwine Edomu mbwaaliiwo, ulaakuya mukwaamba kuli Saulo. Ee, ndime ndakalengesha beshikamukowa bako kucaikwa.

²³ Ono kala andime, utaloondi, uyo usuni kukucaya, ngoosuni kucaya anebo. Koshiite andime na toosuni kufwa.”