1 Samwelo 20 - Baibo Busansulushi Bwa Libuku Ili

Jonasani mbwaakacafwa Defedi

¹ Lyalo Defedi wakalobokaako kuNaiyoti muLama akuya mukwiipusha Jonasani ayi, “Ino ndacitanshi? Ino ndicite mulandunshi? Ino baiso ndababishishanshi ncebatooyanda kuncaila?”

² Jonasani wakakumbula ayi, “Teshi bakucayeewo sobwe! Bona, bata taaku ncibacita kabatana kundwiita. Ino ici calo inga banshisa buyani? Nebo ndaakaka makani ayo!”

³ Sombi Defedi wakaamba ayi, “Baiso balishi kwaamba ayi webo ulanyumfwana bumbi anebo. Aboobo bayeeya kutakushibisha muyeeyo ngobacite mukwiinga balishi ayi inga cakupa buumba. Ono ntooshomesha cakulumbila ayi, ‘Bweenka mbocibete lushinisho ayi Lesa ngumuumi anebo lufu lulibo muliimfwa.’ ”

⁴ Mpomunyaawo Jonasani wakaambila Defedi ayi, “Amba cili coonse ncoosuni ayi ncite, ntookucitila.”

⁵ Aboobo Defedi wakaamba ayi, “Bona ciilo nkusekelela kwa Mweenshi Upya alimwi ndyeelete kulya amwaami. Ono leka nje nkayube muluundu kushikila isona macolesha.

⁶ Na baiso bakasule ayi nshipo, ukabalwiite ayi, ‘Defedi wakansenga camaansa obilo ayi musuminishe kuya kundabala ine mishaabo ya Betileemu, mukwiinga ciilo kulaakuba kubenga mulambu wa bamuŋanda yabo ngobabenga lyoonse pamwaaka.’

⁷ Na bakakumbule ayi, ‘Ncibotu,’ ukeshibe ayi nebo nemusebenshi wako nanoocili muumi. Ono na bakakalale, ukeshibe cakutatonsha ayi balisuminite kuncita cibiibi.

⁸ Ndaseenga ukancaafwe munshila iyo kweelana webo mbooli mucipangano ca bushicibusa anebo nemusebenshi wako pameenso aMwaami Lesa. Sombi na kuli nceembishite, ncibotu webo weenka kuncaya kwiinda kungaba mumaansa abaiso ayi bancaaye.”

⁹ Jonasani wakakumbula ayi, “Nindakalinga kwishi nabibo paniini ayi bata batooyeeya kukucita cibiibi, sa naakwiinga nshikulwiiti?”

¹⁰ Mpeeke Defedi wakeepusha ayi, “Ono ngani weshi akandwiite na baiso bakakukumbule cabukali?”

¹¹ Jonasani wakaamba ayi, “Kwesa tuye muluundu.” Aboobo bakaya boonse bobilo.

¹² Mpeeke Jonasani wakaambila Defedi ayi, “Mwaami Lesa, Lesa wa bene Isilaeli aabe kamboni kwaamba ayi ciilo aisona paciindi ceenka cino, ndaakwiipusha bata. Na taaku cintu cibiibi ncebatooyeeya pali ndiwe, ndaakukushibisha.

¹³ Ono na batooyeeya kukucita cibiibi, Mwaami Lesa aakampe mulandu nabibo kuncaya na nkabule kukushibisha akukulobosha mukabotu. Lesa abe awebo bweenka mbwaakalinga abata.

¹⁴ Na noocili muumi ulyeelete kunyumfwila nkumbu bweenka mbuli shicite Mwaami Lesa kwaamba ayi ntakacaikwi

¹⁵ alimwi ukatolelele kunyumfwila nkumbu bamuŋanda yangu lyoonse alyoonse, nkokwaamba ayi akuciindi Mwaami Lesa aakumana kunyonyoola balwani bako boonse.”

¹⁶ Cipangano cesu acikatolelele abamuŋanda yako webo Defedi. Ono na ukabule kulama cipangano ici, Mwaami Lesa aakakupe mulandu.

¹⁷ Lyalo kwiinda mulusuno Jonasani wakalengesha Defedi kushomesha cakulumbila pacipangano cabo alimwi, mukwiinga wakalinga kumusuni bweenka mbwaakalinga kulisuni mwiine.

¹⁸ Kuswawaawo Jonasani wakaambila Defedi ayi, “Ciilo nkusekelela kwa Mweenshi Upya. Kubulaawo kwako kulaakwishibikwa mukwiinga taaku eshi akekale pacuuna cako.

¹⁹ Ono isona kulaakwiindaawo, anu ukaye kulya kweenka nkowakalinga wayubaawo kataanshi ukayube kumulwi wa mabwe.

²⁰ Nebo ndaakuwaalako mifwi yotatwe kulubasu lwa nguwo anga ntoowaala pacintu cakweelekelaawobo.

²¹ Lyalo ndaakutuma musebenshi wangu ayi ailangoole. Ono na nkamwaambile ayi, ‘Bona, mifwi ili kulubasu kokuno, ibwese,’ ukeshibe ayi taaku nceweelete kuloonda, ukayubulukebo. Ee, bweenka mbocibete lushinisho ayi Mwaami Lesa ngumuumi, ncakwiila taaku nceweelete kuloonda.

²² Sombi na nkalwiite musebenshi wangu ayi, ‘Mifwi ili kunembo lyako,’ ukanyamuke akuya mukwiinga Mwaami Lesa wakutuma ayi unooya.

²³ Ono pacikani webo anebo ncetwakapangana, ibaluka kwaamba ayi Mwaami Lesa ngokamboni pakati kesu lyoonse.”

²⁴ Aboobo Defedi wakayuba muluundu, lyalo kusekelela kwa Mweenshi Upya kwakashikila, mpeeke mwaami wakekala ayi alye.

²⁵ Wakekala mumusena weenka ngwaakalinga kushibite kwikalaawo lyoonse kulubumbu kaalangene aJonasani. Abina wakekala kulubasu lwakwe Saulo, sombi musena wakwe Defedi wakalingabo bwaashi.

²⁶ Saulo taaku ncaakaamba ubo bushiku mukwiinga wakayeeya ayi kuli camucitikila Defedi camulengesha kutasalala kweelana aMilawo.

²⁷ Sombi apabushiku bwabili mumweenshi, musena wakwe Defedi wakacanika ucilibo bwaashi. Mpeeke Saulo wakeepusha Jonasani mwanaakwe musankwa ayi, “Ino nceebonshi mwanaakwe Jese ncaatakwe kusita mukulya anebo ciilo asunu?”

²⁸ Jonasani wakakumbula ayi, “Defedi wakansenga camaansa obilo ayi musuminishe kuya kuBetileemu.

²⁹ Wakandwiita ayi, ‘Nsuminishe nje mukwiinga bamuŋanda ya bata balaakubenga mulambu muBetileemu. Aboobo mukwesu musankwa wandwiita ayi ndyeelete kuya mukubaako. Na uli mweensuma nsuminishe nje nkabone bamakwesu.’ Nceceeco ncaatakwe kwisita mukulya amwebo nobaami.”

³⁰ Meenso akwe Saulo akamanaamobo mumutwi kubukali pali Jonasani, mpeeke wakamwaambila ayi, “Webo omwanaamwanakashi muyumu moyo alimwi mwaashu! Sa nshicishi kwaamba ayi ulanyumfwana amwanaakwe Jese uyo eshi alenshe nsoni webo pantu pomwi anyoko?

³¹ Sa toobwene kwaamba ayi kulilabo Defedi kaali muumi teshi ukabewo mwaami wa cishi cino? Ono koya ukamuleete, ulyeelete kufwa!”

³² Mpomunyaawo Jonasani wakeepusha baishi ayi, “Ino ulyeelete kucailwanshi? Anu wakacitanshi?”

³³ Sombi Saulo wakawaala lisumo lyakwe kuli nguwe ayi amucaaye. Lyalo Jonasani wakeshiba ayi ncakwiila cili mumuyeeyo baishi, nkucaya Defedi.

³⁴ Jonasani wakanyamukaawo pacakulya kaaya cisuntabo kubukali. Pabushiku bwabili mumweenshi ubo Jonasani taakwe kulyaawo mukwiinga wakulisebaanya baishi nkobakacita pacikani cakwe Defedi.

³⁵ Lyalo bushiku bwakaboolaawo macuunsa, Jonasani wakanyamuka waya muluundu kweelana ambwaakasuminishanya aDefedi. Wakaya amwanike musankwa

³⁶ uyo ngwaakalwiita ayi, “Ucice uye ulangoole mifwi njeshi ngwaale.” Mwanike kaaciya cicica wakawaala mufwi wakeendilila mpwaakalinga kutene.

³⁷ Mwanike ndyaakashika pakalokela mufwi, Jonasani wakoolobesha kuli nguwe ayi, “Tapeshi apo, mufwi walokela kunembo.”

³⁸ Lyalo wakoolobesha alimwi ayi, “Koya endesha! Uteemikani!” Mwanike wakaubwesa mufwi akuboolela kuli Jonasani.

³⁹ Mwanike taaku ncaakeshibaawo nabi comwi cakalinga kucitika, sombibo Jonasani aDefedi beene.

⁴⁰ Mpeeke Jonasani wakapa mwanike ulya shakulwanisha shakwe akwaamba ayi, “Koya, ubooshe asheeshi kundabala.”

⁴¹ Mwanike ndyaakaya, Defedi wakanyamuka kuswa kulubasu lwakumalenge a mulwi wa mabwe akufukamina Jonasani mankanda otatwe cakushisha ciwa panshi. Kuboolaawo bakafyontana akulila buumpute boonse bobilo. Nakubi boobo Defedi wakeendaawo kulila.

⁴² Jonasani wakaambila Defedi ayi, “Koya muluumuno, ceebo twakashomeshanya kuba beshicibusa muliina lya Mwaami Lesa, nditwakaamba ayi, ‘Mwaami Lesa ngokamboni pakati kangu awebo, pakati ka bamulunyungu lwangu abaako lyoonse.’ ” Lyalo Defedi wakanyamuka waya, alakwe Jonasani wakaboolela kundabala.