1 Samwelo 19 - Baibo Busansulushi Bwa Libuku Ili

Saulo mbwaakapinga kucaya Defedi

¹ Ono Saulo wakaambila Jonasani mwanaakwe musankwa alimwi abacinenenene bakwe boonse ayi balyeelete kucaya Defedi. Sombi Defedi kuli Jonasani taakalinga kulokelwa kalongo.

² Aboobo Jonasani wakamucenjesha ayi, “Bata batoopinga kukucaya na bakakubonenebo kapense. Ciilo macuunsa ukacenjele. Ukaye mukuyuba.

³ Ndaakwisa abata muluundu akwiimikana ambabo kufwaafwi akooko nkweshi ukanooyubite. Lyalo ndaakubandikaabo pali ndiwe. Na kuli mbweshi bakaambe ndaakwisa nkakushibishe.”

⁴ Mpeeke Jonasani wakalumbaisha Defedi kuli baishi ayi, “Nkambo mutabishishi Defedi musebenshi wanu. Taaku ncaakabisha kuli ndimwe alimwi ncaakacita wakamucafwa abuumbi.

⁵ Mubone ndyaakacaya mwine Filisiti ulya, pakalinga alufu lwaakwe mwiine. Ono Mwaami Lesa wakalengesha bene Isilaeli kukoma munshila ikankamika. Mwebo nobeene ndimwakabona kukoma uko mwakasangalala abuumbi. Ono nceebonshi mutooyanda kubisha kwiinda mukucaya Defedi utacite mulandu?”

⁶ Mwaami Saulo wakanyumfwa cakaamba Jonasani akushomesha cakulumbila ayi, “Bweenka mbocibete lushinisho ayi Mwaami Lesa ngumuumi, anebo Defedi teshi nkamucayeewo.”

⁷ Lyalo Jonasani wakeeta Defedi akumulwiita mubandi woonse. Wakamuboosha kuli Saulo, mpeeke lakwe wakekalaakwe akumusebensela bweenka mbuli kataanshi.

⁸ Ono nkoondo pakati ka bene Isilaeli abene Filisiti yakatalika alimwi. Lyalo Defedi wakaya mukulwanaabo. Wakabacaya cipa bunyengele cakwaamba ayi bamwi bakoondomokaako lubilo kuboowa.

⁹ Bumwi bushiku muuya ubiibi uyo wakatumwa aMwaami Lesa wakesa pali Saulo. Wakalinga kushiite muŋanda kaacite alisumo mulyaansa. Alakwe Defedi wakalingaawo kaalisha kalumbu.

¹⁰ Saulo wakeelesha kumutungila kulubumbu alisumo lyakwe, sombi Defedi wakaleya, lisumo lyaya mukutapila mulubumbu. Mpomunyaawo Defedi wakacica akuloboka.

¹¹ Mashiku eenka ayo Saulo wakatuma bantu bakwe bamwi kuya mukulindilila kuŋanda yakwe Defedi, lyalo bwaakuca bakamucaaye. Sombi Mikali mukaakwe, wakacenjeshaako Defedi ayi, “Na mubule kuloboka sunu mashiku, mwebo ciilo mulaakunoofwite.”

¹² Mpomunyaawo mukaakwe uyo wakapushisha Defedi pambwelyo ya ŋanda, mpeeke alakwe lomwibo waloboka.

¹³ Kuswawaawo Mikali wakabwesa cibumbwabumbwa, wacooneka pabulo. Wakacifweka cakufwala ca peculu akubika mutaamino wa booya bwa mpongo kumitwi ya ncico.

¹⁴ Saulo ndyaakatuma bantu bakwe abo ayi baye bacate Defedi, Mikali wakaamba ayi, “Baliletebo mbalwashi.”

¹⁵ Lyalo Saulo wakaboosha bantu bakwe abo kuŋanda yakwe Defedi ayi bamuboone beene. Wakabaambila ayi, “Mumuleete kuno pabulo bwakwe kwaamba ayi mucaaye.”

¹⁶ Ono bantu abo ndibakashika muŋanda bakacanabo ncibumbwabumbwa cakalinga pabulo bwakwe, kumitwi kakuli amutaamino wa booya bwa mpongo.

¹⁷ Mpeeke Saulo wakeepusha Mikali ayi, “Ino wancenjeekilaanshi akuleka mulwani wangu ayi aloboke?” Mikali wakamulwiita ayi, “Te nebo baŋambila ayi, ‘Na ubule kuncafwilisha ayi ndoboke, ntookucaya.’ ”

¹⁸ Paciindi ico Defedi wakasakana akuya kuli Samwelo kuLama. Mpeeke wakaluula kuli Samwelo shoonse mwaami Saulo nshaakacita kuli nguwe. Lyalo lakwe aSamwelo bakaya kuNaiyoti akwikala uko.

¹⁹ Saulo wakalwiitikwa ayi, “Defedi uli mundabala ya Naiyoti kuLama.”

²⁰ Mpomunyaawo wakatumaako bantu bakwe ayi baye bakamucate. Ono ndibakabona likoto lya balaluki kabalaluka aSamwelo kaabatanjilila, Mushimu wakwe Lesa wakaselukila bantu bakwe Saulo, mpeeke abalo bakatalika kulaluka.

²¹ Saulo wakalwiitwa cikani ico. Lyalo wakatumaako abamwi bantu bakwe, ono abalo bakatalika kulaluka. Saulo wakatuma abamwi lyatatu, sombi abalo bakatalika kulaluka.

²² Lyalo Saulo mwiine wakanyamuka akuya kuLama. Ndyaakashika pamukalo unene kuSeku, wakeepusha ayi, “Ino Samwelo aDefedi bali kuli?” Bakamulwiita ayi, “Bali mundabala ya Naiyoti kuLama.”

²³ Aboobo Saulo ndyaakalinga kuya kuNaiyoti muLama, Mushimu wakwe Lesa wakamuselukila alakwe. Lyalo wakatalika kuya cilaluka nshila yoonse tibili washika akuNaiyoti.

²⁴ Mpomunyaawo wakacipa shakufwala shakwe akulaluka pameenso akwe Samwelo. Wakoona matakosha malumwi oonse kunungaako amashiku. Mboboobo mbowaakatalika mwaambo wakwaamba ayi, “Sa Saulo alakwe waba mulaluki?”