1 Samwelo 18 - Baibo Busansulushi Bwa Libuku Ili

Defedi aJonasani

¹ Saulo wakamanisha kubandika aDefedi. Kuswawaawo Jonasani mwanaakwe Saulo wakanyumfwana aDefedi akumusuna bweenka mbwaakalinga kulisuni mwiine.

² Kuswa bushiku ubo Saulo wakalama Defedi cakutamuleka kuboola kuli baishi alimwi.

³ Ono Jonasani wakapangaakwe cipangano cakuba shicibusa wakwe wa lyoonse mukwiinga wakamusuna bweenka mbwaakalinga kulisuni mwiine.

⁴ Mpeeke Jonasani wakafuula cakufwala cakwe ca peculu ncaakalinga kufwete akupa Defedi. Wakamupa ashakufwala sha nkondo shakwe, mupeeni, buta pantu pomwi alaamba.

⁵ Ono Defedi wakalinga kucita cintu cili coonse cakamutuma Saulo cakuswitilila. Aboobo Saulo wakamulengesha kuba mutanjilili wa mulikoto lya bashilumamba bakwe. Cikani ico bantu boonse pantu pomwi abamatanjilili bamwi boonse bakwe Saulo bakakondwa.

Saulo mbwaakafwita Defedi munyono

⁶ Bashilumamba ndibakalinga kuboola, Defedi ndyaakaswa mukucaya Golyati, balutundu bakesa kuswa mumandabala oonse a mucishi ca Isilaeli bakesa mukutambula mwaami Saulo. Bakalinga kwiimba nyimbo shakusangalala, kushana, kulisha misebe alimwi ashakulisha shimwi.

⁷ Mukusekelela kwabo balutundu abo bakalinga kwiimba ayi, “Saulo wakacaya shuulu ashuulu, sombi Defedi wakacaya makumi amakumi a shuulu.”

⁸ Saulo wakakalala abuumbi ndyaakanyumfwa boobo. Wakalyaamboosha ayi, “Defedi batoomubelengela makumi amakumi a shuulu, ono nebo shuulubo. Ono bulya taaku acimwi cacaala kwiinda kumupa bweene bwangu.”

⁹ Kuswa bushiku ubo mwaami Saulo wakatalika kulangilisha Defedi meenso abiibi a munyono.

¹⁰ Bushiku bwakaboolaawo muya ubiibi wakatumwa aMwaami Lesa wakesa cankusu pali Saulo. Mpeeke kaayabookabo muŋanda yakwe anga ngushincinko, alakwe Defedi kaamulishila kalumbu kweelana ambwaakalinga kucita lyoonse. Ono Saulo wakalinga kucite alisumo mulyaansa.

¹¹ Saulo wakalyaamboosha ayi, “Ntoomutunga kulubumbu.” Lyalo wakawaala lisumo kuli nguwe mankanda obilo, sombi Defedi wakalileya mankanda ayo oonse.

¹² Mwaami Saulo wakatalika kuloonda Defedi ceebo Mwaami Lesa wakalinga anguwe, sombi lakwe wakamushiya.

¹³ Mpeeke Saulo wakakusha Defedi muliimfwa lyakwe kwiinda mukumulengesha kuba mutanjilili wa bashilumamba bali cuulu. Defedi wakatanjilila bashilumamba bakwe kuya kunkondo.

¹⁴ Ono shintu shoonse nshaakalinga kucita, shakalinga kumweendela kabotu mukwiinga Mwaami Lesa wakalinga anguwe.

¹⁵ Saulo ndyaakabona Defedi mbwaakalinga kuswitilila mushintu shoonse, wakeendaawo kumuloonda.

¹⁶ Sombi bantu boonse mucishi ca Isilaeli aca Juda bakalinga kusuni Defedi abuumbi mukwiinga wakalinga mutanjilili mubotu uswitilila.

Defedi mbwaakeeba mwanaakwe Saulo

¹⁷ Mpeeke Saulo wakaambila Defedi ayi, “Ngu Melabu mwanaangu mwanakashi munene bantu. Ntoomutula mumaansaako ayi umweebe na usumine kunoosebensela ndime cakubula boowa, kunyumfwila alimwi akunoolwanabo nkondo ya Mwaami Lesa.” Saulo wakalinga walyaamboosha mwiine ayi, “Nebo ndakaaka kumucaya, nshikwe, akukamucayebo bene Filisiti.”

¹⁸ Sombi Defedi wakeepusha Saulo ayi, “Anu ndime ni? Anu mukowa wa bata nciinshi kwaamba ayi nebo mbe mukwe wa baami?”

¹⁹ Ono ciindi ndicakashikila cakwaamba ayi Melabu eebeshekwe kuli Defedi, wakeebeshekwa kumusankwa wa kuMewola wiitwa ayi Adiliyelo.

²⁰ Ono Mikali mwanaakwe Saulo mwanakashi wakalinga kufwita Defedi. Mpeeke Saulo ndyaakalwiitikwa cikani ico, wakakondwa abuumbi.

²¹ Lyalo wakayeeya ayi, “Cabota ono Mikali ntoomweebeshabo kuli nguwe kwaamba ayi akabe koose kuli nguwe. Munshila iyo bene Filisiti bakamucaaye.” Mpomunyaawo Saulo wakaambila Defedi ayi, “Ndakupa ciindi cabili kwaamba ayi ube mukwe wangu.”

²² Mpeeke Saulo wakatuma abacinenenene bakwe akubaambila ayi, “Mubandikaakwe Defedi kulubasu akumwaambila ayi, ‘Bona mwaami ulikusuni abuumbi pantu pomwi abacinenenene bakwe boonse, babo mukwe wakwe.’ ”

²³ Bacinenenene abo bakaya bamwiindilaamo maswi ayo Defedi. Sombi Defedi wakeepusha ayi, “Sa mwebo mutooyeeya ayi nkantu kaniini kuba mukwe wa mwaami? Nebo ndi mukandubo alimwi nshipukiteewo bunene.”

²⁴ Bacinenenene bakwe Saulo ndibakamulwiita bwakaamba Defedi,

²⁵ wakakumbula ayi, “Defedi mumulwiite ayi, ‘Mwaami taasuni buboni bwakweebesha bumwi buli boonse, sombibo shikanda sha kunembo kubusankwa sha bene Filisiti bali mwaanda, mukubooshesha cishole balwani bakwe.’ ” Muyeeyo wakwe Saulo wakalinga wakwaamba ayi Defedi akacaikwe kubene Filisiti.

²⁶ Bacinenenene bakwe Saulo ndibakalwiita Defedi maswi ayo, wakasumina cakukondwa kuba mukwe wakwe. Ono ciindi cakabambwa kacitana kumana,

²⁷ Defedi abashilumamba bakwe bakaya balwana akucaya bene Filisiti bali myaanda yobilo. Wakaleta shikanda isho akutondesha mwaami kashikwene shoonse kwaamba ayi abe mukwe wakwe. Mpomunyaawo Saulo wakeebesha Mikali mwanaakwe kuli Defedi.

²⁸ Ono Saulo ndyaakabona ayi Mwaami Lesa ncakwiila uli aDefedi, alimwi ayi Mikali mwanaakwe ulimusuni abuumbi,

²⁹ wakatolelela kumuloonda. Aboobo Saulo wakalinga kupatite Defedi kushikila wafwa.

³⁰ Bamatanjilili ba bashilumamba ba bene Filisiti bakatolelela kunooya kunkondo. Ono kulilabo na baya Defedi wakalinga kuswitilila bunene kwiinda bamwi boonse. Munshila iyo Defedi wakapuka abuumbi.