1 Samwelo 17 - Baibo Busansulushi Bwa Libuku Ili

Defedi a Golyati

¹ Ono bene Filisiti bakabunganya bashilumamba babo kuSoko mucishi ca Juda ayi baye kunkondo. Bakayaka misumba yabo kuEfesi Damimu, nkokwaamba ayi pakati ka ndabala ya Soko aya Aseka.

² Alakwe Saulo abene Isilaeli bakabungana akuyaka misumba yabo mucinyika ca Ela mukulibambila kulwana abene Filisiti.

³ Bene Filisiti bakeemikana pakalundu komwi, abalo bene Isilaeli pakamwi pakati kabo pakalinga cinyika.

⁴ Mpomunyaawo kumisumba ya bene Filisiti kwakaswa musankwa ndundwa minkulwa wakalinga kwiitwa ayi Golyati wa kundabala ya Gati. Wakalinga kulaampa mamita mpashi otatwe.

⁵ Wakalinga kufwete cimpoompo ca bulonse kumutwi alimwi acakufwala ca nkondo cakalinga kupangitwe ashiilinkene anga ngamaamba answi sha bulonse ico cakalinga kulema makilogilamu ali makumi osanwe alimwi amakilogilamu osanwe aobilo.

⁶ Kumyeendo yakwe wakalinga kufwete mpatishi sha bulonse alimwi wakalinga kukwilikite lisumo lya bulonse kumusana.

⁷ Lisumo lyakwe lyakalinga linene abuumbi anga ngumutika wa mungwala. Mutwi wa ceela wa ndilyo wakalinga kulema makilogilamu ali osanwe aobilo. Uyo wakalinga kumunyamwita liyawo wakalinga kweendela kunembo lyakwe.

⁸ Lyalo Golyati wakeemikana akoolobesha kubashilumamba ba bene Isilaeli ayi, “Ceebonshi mweemikana mumundando ayi mulwane? Sa mwanduuba ayi ndi mwine Filisiti? Sa te mwebo mulibo basebenshi bakwe Saulo? Amusale musankwa womwi ese kuno tulwane.

⁹ Na akonshe kulwana ndime akuncaya tutooba basha banu, sombi na mukoome akumucaya, mutooba basha besu.

¹⁰ Sunu nobashilumamba bene Isilaeli ndamuteteesha! Amumpe muntu ngweshi tulwanaakwe.”

¹¹ Saulo abene Isilaeli bamwi ndibakanyumfwa maswi ayo a mwine Filisiti uyo, bakakankamana akuloonda abuumbi.

Defedi mumisumba yakwe Saulo

¹² Defedi wakalinga mwanaakwe Jese mwine Efulati mundabala ya Betileemu kucishi ca Juda. Jese wakalinga kucite baana basankwa bosanwe abotatwe, alimwi muciindi cakwe Saulo wakalinga kucembelete abuumbi.

¹³ Ono bana bakwe bamanene botatwe bakalinga baya aSaulo kunkondo. Wakwiiya wakalinga Eliyabu, wabili wakalinga Abinadabu, watatu wakalinga Shama.

¹⁴ Mwanike paboonse wakalinga Defedi. Ono bamanene botatwe abo mbobakaya aSaulo kunkondo,

¹⁵ sombi shiindi shimwi Defedi wakalinga kuboolela kuBetileemu mukweembela mbelele sha baishi.

¹⁶ Mpeeke Golyati wakalinga kuteteesha bene Isilaeli kwanshiku makumi one macuunsa amacolesha.

¹⁷ Bumwi bushiku Jese wakaambila Defedi ayi, “Bwesa makilogilamu ali likumi a ciwaya ashinkwa uyu uli likumi utolele bamanene bako kumusumba wabo cakufwambaana.

¹⁸ Tolelela atupimpita twa bwaanda tuli likumi uye upe mutanjilili wa likoto lyabo lya bashilumamba. Wiipushe na mbayumu akutuletelela citondesho cakwaamba ayi tushome ayi mboomi alimwi wabonanaabo.

¹⁹ Bali amwaami Saulo pantu pomwi abasankwa bamwi bene Isilaeli mucinyika ca Ela ayi balwane bene Filisiti.”

²⁰ Defedi wakafuma macuunsacuunsa bushiku bwakaboolaawo wakashiya mbelele mumaansa a mweembeshi umwi, walibambila akuya kwakamutuma baishi. Wakashika paciindi bashilumamba ndibakalinga kuya mumindando yabo ya nkondo kabaya coolobesha mwaambo wa nkondo.

²¹ Bashilumamba bene Isilaeli abene Filisiti bakalinga kwiimikana mumindando yabo ya nkondo kabalangene abalwani babo.

²² Defedi wakashiya shintu shakwe kuli shikulama shintu sha bashilumamba akucicila kumindando ya nkondo mukwaansha bamanene bakwe.

²³ Ndyaakalinga kucaamba ambabo, Golyati, ndundwa minkulwa wa kuGati, wakasotoka mundando wakwe akoolobesha maswi akwe akunyansha bweenka mbwaakalinga kucita lyoonse. Lyalo Defedi wakanyumfwaako.

²⁴ Bashilumamba boonse ba bene Isilaeli ndibakamubona bakamucica boonse cakuloonda abuumbi.

²⁵ Ono bene Isilaeli bakalinga kwaamba ayi, “Mwamubona muntu mbwaacitekobo kunyansha bene Isilaeli? Mwaami Saulo ulaakupa buboni buunji kuli wooyo weshi akamucaaye. Ulaakumupa amwanaakwe mwanakashi ayi eebe alimwi akwaangulula bamuŋanda ya bashali bakwe kukusonka musonko mucishi ca Isilaeli.”

²⁶ Mpeeke Defedi wakeepusha basankwa bakalinga pafwaafwi ayi, “Ino musankwa weshi akacaaye mwine Filisiti ulya akukusha malwesa ngwaatoolamba bene Isilaeli, ulaakucitilwa buyani? Alimwi lakwe ngumwine Filisiti buyani, utapalwitwe, weenga kaanyansha likoto lya bashilumamba bakwe Lesa muumi?”

²⁷ Abalo bakakumbula mbomunya bwakalinga kwaamba bantu balya akumwaambila ayi, “Ee, nceceeco nceshi akacitilwe muntu uyo weshi akamucaaye.”

²⁸ Ono Eliyabu munene wakwe Defedi ndyaakanyumfwa ayi atoobandika abasankwa abo, wakamukalalila akwaamba ayi, “Ino wesitaanshi kuno? Ono washiila baani mbelele muluyanga shilya nshoobwenebo ayi nshiniini? Nditushi tumiyeeyo twako alimwi akubica kwa moyo wako. Bulya wesabo mukweebela nkondo.”

²⁹ Defedi wakaamba ayi, “Anu nebo ndacitanshi? Sa mbule akwaambaawo?”

³⁰ Lyalo wakapilulukila kumuntu umwi akuleta makani eenka alya. Mpeeke alakwe muntu uyo wakamukumbula mbomunya mbuli wakataanshi.

³¹ Bantu bamwi bakanyumfwa cakaamba Defedi akulwiita mwaami Saulo. Lyalo Saulo wakatumina nkombe Defedi ayi ese.

³² Mpeeke Defedi wakaamba ayi, “Kutabi muntu nabi womwi weshi alisukame ceebo ca mwine Filisiti ulya. Nebo nemusebenshi wanu ntooya nkalwanaakwe.”

³³ Saulo wakakumbula ayi, “Waceeya abuumbi kuya mukulwana amwine Filisiti ulya. Bona webo ucilibo mwanike ono lakwe kuswabo kubucikula bwangu bwakwe ngushikulwana.”

³⁴ Sombi Defedi wakaamba ayi, “Nebo nemusebenshi wanu ndime ndama mbelele sha bata. Ono ndacita na nkalamu nabi beya wacata mbelele mulitanga akwiitola,

³⁵ ndakonkela munyama uyo, kumulwana akufuna mbelele mumulomo wakwe. Na munyama uyo wapilulukila ndime, ndamucata pamukolomeno akumuuma kushikila wafwa.

³⁶ Ndushinisho nebo nemusebenshi wanu ndacaya nkalamu alimwi abeya. Ono sunu mwine Filisiti ulya utooba bweenka mbuli banyama abo mukwiinga wanyansha likoto lya bashilumamba bakwe Lesa muumi.

³⁷ Mwaami Lesa uyo wakamfuna kunkalamu abasuntwe banene, utoomfuna akumwine Filisiti ulya.” Lyalo Saulo wakaambila Defedi ayi, “Ncibotu, koya alimwi Mwaami Lesa abe awebo.”

³⁸ Mpeeke Saulo wakafwalika Defedi shakufwala shakwe shankondo. Wakamufwalika cakufwala ca peculu ca nkondo acimpompo ca bulonse kumutwi.

³⁹ Defedi wakakwilika mupeeni wakwe Saulo peculu pashakufwala akweelesha kweendeenda mukwiinga taakalinga kushishibite shakufwala isho. Lyalo wakaambila Saulo ayi, “Shikoonshi kuya mushakufwala ishi mukwiinga nshishibite.” Aboobo wakashifuula.

⁴⁰ Mpeeke wakabwesa nkoli yakwe mumaansa, akusaloola mabwe abulungene mukalonga akwaabika mucipokolo cakwe ncaasebensesha pakweembela mbelele. Lyalo wakabwesa cipaya cakuwaalisha mabwe cakwe akusena pafwaafwi amwine Filisiti uyo.

Defedi mbwaakakoma Golyati

⁴¹ Mpomunyaawo mwine Filisiti ulya wakatalika kwisa cisena kufwaafwi aDefedi, shikumunyamwita liyawo kaali panembo lyakwe.

⁴² Mwine Filisiti uyo ndyaakalanga akucana kwaamba ayi nguDefedi, mwanike mubotu ciwa alimwi wiimfwi kabotu, wakamunyansha.

⁴³ Mpeeke wakaambila Defedi ayi, “Ono utoosa ankooli kuli ndime, sa utooyeeya ayi ndi kabwa?” Mpomunyaawo mwine Filisiti ulya wakashingana Defedi muliina lya balesa bakwe.

⁴⁴ Lyalo wakaamba ayi, “Kosa kuno, sunu mubili wako utooba cakulya ca bayuni abanyama bamuluundu!”

⁴⁵ Sombi Defedi wakaambila mwine Filisiti uyo ayi, “Webo utoosa mukundwana amupeeni alimwi amasumo. Ono nebo ntookulwana muliina lya Mwaami Lesa Shinkusu shoonse, Lesa wa likoto lya bashilumamba lya bene Isilaeli, uyo ngowanyansha.

⁴⁶ Sunu Mwaami Lesa utookwaaba mumaansaangu ayi kuncaaye akukusutula mutwi. Mibili ya bene Filisiti sunu ntooipa bayuni abanyama bamuluundu. Lyalo bantu ba mucishi ca panshi coonse batooshiba ayi muli Lesa muIsilaeli.

⁴⁷ Boonse babungene waano batooshiba ayi Mwaami Lesa taapulushi bantu kwiinda mukusebensesha mipeeni amasumo. Nkoondo iyi nja Mwaami Lesa, aboobo utoomwaaba noonse mumaanseesu.”

⁴⁸ Mwine Filisiti uyo kaacisa cisena ayi amulwaane, Defedi wakacicila kumundando wa nkondo wa bene Filisiti ayi amukumanye.

⁴⁹ Wakanjisha lyaansa mucipokolo, wabwesa libwe akulifupwita kumwine Filisiti lyaya lyamuuma munkumo. Libwe ilyo lyakatapila munkumo yakwe, lyalo amwiine kunkulu kuya mukuuma nshono panshi.

⁵⁰ Munshila iyo Defedi wakakoma bene Filisiti acipaya cakuwaalisha mabwe alimwi alibwe. Taakalinga kucitewo mupeeni ndyaakooma mwine Filisiti uyo akumucaya.

⁵¹ Mpeeke Defedi wakacica waya weemikana pamutuntu wakwe Golyati. Lyalo wakakwela mupeeni wa mwine Filisiti uyo kuswa munkomwe ya nguwo. Ndyaakamana kumucailila wakamusutula mutwi amupeeni uyo. Bene Filisiti ndibakabona ayi uyo ngobakalinga kucinkiteemo manungo wafwa, bakapiluluka akutalika kucica.

⁵² Mpomunyaawo bashilumamba bene Isilaeli bakawuumukila bene Filisiti muciyobeyobe cinene akubatandaanya kushikila akumwinjililo wa ndabala ya Gati alimwi akuminjililo ya ndabala ya Ekiloni. Abo bakalinga kuyaswa bakalinga kuya cicaalabo muya nshila ya kuShalaimu kuya mukushikabo akuGati alimwi akuEkiloni.

⁵³ Bene Isilaeli ndibakamana kutandaanya bene Filisiti bakaboola kumisumba ya bene Filisiti akusaala shintu shoonse nshibakashiya.

⁵⁴ Defedi wakabwesa mutwi wa mwine Filisiti ulya kuya mukushisha akuJelusalemu. Sombi shintu nshaakalinga kulwanisha mwine Filisiti uyo, shalo wakashibika mumusumba wakwe mwiine.

Defedi mbwaakaboolela kuli Saulo

⁵⁵ Mwaami Saulo ndyaakabona Defedi utooya mukulwana mwine Filisiti uyo, wakeepusha Abina mutanjilili wa bashilumamba ba bene Isilaeli ayi, “Abina, anu ngumwanaakwe ni cikula bwangu ulya?” Abina wakakumbula ayi, “Mbweeke mbocibete lushinisho ayi muli boomi nobaami, nshishiiwo.”

⁵⁶ Mwaami wakaamba ayi, “Wiipusheepushe akwishiba bashali ba cikula bwangu ulya.”

⁵⁷ Ono Defedi ndyaakaboolabo kuswa mukucaya Golyati, Abina wakayaakwe akumushisha kunembo lya mwaami Saulo kaacite amutwi wakwe Golyati uyo mumaansa.

⁵⁸ Lyalo Saulo wakamwiipusha ayi, “Webo ocikula bwangu, anu uli mwanaakwe ni?” Defedi wakakumbula ayi, “Nebo nkambo, ndi mwanaamusebenshi wanu Jese wa kuBetileemu.”