1 Samwelo 16 - Baibo Busansulushi Bwa Libuku Ili

Samwelo mbwaakananika Defedi mafuta a bwaami

¹ Mwaami Lesa wakaambila Samwelo ayi, “Utootola ciindi cilaamfu buyani kuungumana ceebo cakwe Saulo? Nebo ndamukaka kale kunoocili mwaami wa cishi ca Isilaeli. Susha lwiica lwako amafuta a maolifi unooya. Ntookutuma kuli Jese wa kuBetileemu. Ndasalaawo womwi pabana bakwe basankwa kuba mwaami.”

² Sombi Samwelo wakaamba ayi, “Nshikoonshi kuya mukwiinga Saulo cikani ico utoocinyumfwa lyalo utooncaya.” Mwaami Lesa wakaamba ayi, “Nyamunina akapwishi uye waambe ayi, ‘Ndesa mukubenga mulambu kuMwaami Lesa.’

³ Lyalo utambe Jese kwisa kumulambu. Kuswawaawo ntookulwiita nceshi ucite. Ulyeelete kunanika mafuta a bwaami pamuntu ngweshi nkutondeshe.”

⁴ Mpeeke Samwelo wakacita cakamulwiita Mwaami Lesa. Ndyaakashika kuBetileemu, bamaloba ba mundabala bakalinga kunootutumabo ndibakalinga kumukumanya. Bakalinga kwiipusha ayi, “Sa kuli cabica?”

⁵ Samwelo wakalinga kukumbula ayi, “Ne taaku cabica, ndesabo mukubenga mulambu kuMwaami Lesa. Amulisalashebo tuye soonse mukubenga mulambu.” Lyalo wakalwiita Jese abana bakwe basankwa ayi balisalashe. Mpeeke wakabatamba ayi bese kumulambu.

⁶ Sombi ndyaakashika, Samwelo wakabona Eliyabu mwanaakwe Jese akulyaamboosha ayi, “Ndushinisho uyo Mwaami Lesa ngwaasala uliimfwi kunembo lyakwe.”

⁷ Nakubi boobo Mwaami Lesa wakaambila Samwelo ayi, “Utaboni mbwaaboneka nabi ciimo, mukwiinga nebo ndamukaka kuba mwaami. Nebo neMwaami Lesa nshilangilishi muntu pashintu shilangilisha bantu. Mukwiinga bantu balabonabo pansengwe, sombi nebo neMwaami Lesa ndabona mukati, ee, mwiine mumoyo.”

⁸ Mpeeke Jese wakeeta Abinadabu akumwiinsha kunembo lyakwe Samwelo. Sombi Samwelo wakaamba ayi, “Sobwe, Mwaami Lesa taakwe kumusala alakwe uyu.”

⁹ Lyalo Jese wakeensha Shama pafwaafwi. Sombi Samwelo wakaamba ayi, “Sobwe, alakwe uyu Mwaami Lesa taakwe kumusala.”

¹⁰ Jese wakeensha bana bakwe basankwa bakakwana bosanwe abobilo kunembo lyakwe Samwelo, sombi wakaambila Jese ayi, “Sobwe, Mwaami Lesa taaku ngwaasala pali baaba.”

¹¹ Mpeeke wakeepusha Jese ayi, “Sa mbobana bako basankwa beenka aba?” Jese wakakumbula ayi, “Nkwaali mwanike paboonse, ono uli muluundu utokweembela mbelele.” Samwelo wakamwaambila ayi, “Tumaako muntu akamwiite. Teshi tubenge mulambu kushikila ese.”

¹² Mpomunyaawo wakatumaako muntu, mpeeke alakwe wakesaakwe. Mwanike uyo wakalinga kucite ciwa cibotu, mubili ubotu abuumbi alimwi wakalinga kwiimfwi kabotu. Mpomunyaawo Mwaami Lesa wakaambila Samwelo ayi, “Ngowooyu! Nyamuka umunanike mafuta a bwaami.”

¹³ Aboobo Samwelo wakabwesa lwiica lwa mafuta ayo akumunanika ayi abe mwaami pameenso a bamakwabo basankwa. Kuswa bushiku ubo Mushimu wa Mwaami Lesa wakaselukila Defedi cankusu. Lyalo Samwelo wakaboolela kuLama.

Defedi mbwaakasebensela mwaami saulo

¹⁴ Ono Mushimu wa Mwaami Lesa wakashiya Saulo. Mpeeke muuya ubiibi uyo wakatumwa aMwaami Lesa wakamupensha abuumbi.

¹⁵ Basebenshi ba mwaami Saulo bakamwaambila ayi, “Amubone muuya ubiibi wakatumwa aMwaami Lesa utoomupensha.

¹⁶ Nkambo, abatumeewobo sobasebenshi babo ayi tulaangoole muntu weshi anoolisha kalumbu. Ulaakunoomulishila paciindi muuya ubiibi uyo wakatumwa aMwaami Lesa na wesa, lyalo mulaakuba kabotu.”

¹⁷ Aboobo Saulo wakaambila basebenshi bakwe ayi, “Mulangoole muntu ucishi kulisha kabotu mumulete kuli ndime.”

¹⁸ Mpeeke womwi pakati ka basebenshi wakakumbula ayi, “Ndibweneewo mwaana musankwa wakwe Jese mwine Betileemu ucishi kulisha kabotu kalumbu. Ngumusankwa utacite boowa, shilumamba mubotu, ucishi kubandika alimwi uboneka kabotu abuumbi. Mwaami Lesa uli anguwe.”

¹⁹ Lyalo Saulo wakatuma beshinkombe kuli Jese akwaamba ayi, “Amuntumineeko mwanaanu Defedi uyo weembela mbelele shanu ayi ese.”

²⁰ Mpeeke Jese wakabwesa mbongolo, wabikawo shinkwa, nkomwe ya cipaya yakalinga kuswitebo waini alimwi akana ka mpongo. Lyalo wakapa Defedi mwanaakwe musankwa ayi atolelele kumwaami Saulo.

²¹ Defedi wakashika kuli Saulo akutalika kumusebensela. Saulo wakalinga kusuni Defedi abuumbi, lyalo wakamupa mulimo wakuba shikumunyamwita shakulwanisha.

²² Mpomunyaawo Saulo wakatuma maswi kuli Jese akwaamba ayi, “Amusuminishe Defedi kuba musebenshi wangu ceebo ndisangalete abuumbi pali nguwe.”

²³ Kuswawaawo kulilabo muuya ubiibi uyo wakalinga kutumwa aMwaami Lesa na wesa pali Saulo, Defedi wakalinga kunyamuna kalumbu akumulishila. Mpeeke muuya ubiibi uyo wakalinga kumushiya, lyalo wakalinga kuba kabotu akunyumfwa kabotu alimwi.