1 Samwelo 15 - Baibo Busansulushi Bwa Libuku Ili

Saulo mbwaakalwana bene Amaleki

¹ Pesule Samwelo wakaambila Saulo ayi, “Ndime wooyo Mwaami Lesa ngwaakatuma ayi ese akunanike mafuta a bwaami ayi ube mwaami wa bantu bakwe bene Isilaeli. Ono kutika Mwaami Lesa Shinkusu shoonse mbwaamba.”

² Waamba ayi, “Ntootondesha bukali bene Amaleki ceebo bamashali babo bakulukulu bakakasha bene Isilaeli kwiinda ndibakalinga kuswa kuIjipiti.

³ Ono koya ukalwane bene Amaleki akunyonyoola shintu shoonse nshebacite cakumaninina. Kutashiya nabi comwi, ukacaaye basankwa, banakashi, banike, abakateta boonse, pantu pomwi aŋombe, mbelele, ngamela alimwi ambongolo shoonse.”

⁴ Aboobo Saulo wakeeta bashilumamba bakwe kuTelaimu akubabelenga. Bashilumamba ba panshi bakaswa kuIsilaeli bakalinga 200,000 alimwi abo bakaswa kumukowa wakwe Juda bakalinga 10,000.

⁵ Lyalo Saulo abashilumamba bakaya kundabala ya Amaleki akubabelamina mumulonga uyuminite.

⁶ Mpeeke wakacenjesha bene Keni ayi, “Amusweemo mushiye bene Amaleki kwaamba ayi ntamunyonyweeti kumwi. Mukwiinga mwebo mwakanyumfila nkumbu bene Isilaeli paciindi ndibakalinga kuswa kuIjipiti.” Aboobo bene Keni bakashiya bene Amaleki.

⁷ Saulo wakalwana bene Amaleki, kubakusha kuAfila tibili akuSheli kwicwe lya Ijipiti.

⁸ Lyalo Agagi mwaami wa bene Amaleki wakamubwesabo kaali muumi, sombi bantu bakwe boonse wakabacaya.

⁹ Ono Saulo abashilumamba bakwe tabakwe kucaya Agagi, nabi mbelele aŋombe shibotu, boombe abana ba mbelele beenite. Nkokwaamba ayi shintu shoonse shakalinga shibotu tabakwe kushinyonyoola. Sombi shoonse shatakalinga kuboneka kabotu, bakashinyonyoola.

Saulo mbwaakakakwa aMwaami Lesa

¹⁰ Mpeeke Mwaami Lesa wakaambila Samwelo ayi,

¹¹ “Ndanyumfwa nsoni kwaamba ayi ndakalengesha Saulo kuba mwaami, mukwiinga wanfutatila alimwi taakwe kucita mbondakamulwiita.” Lyalo Samwelo wakapenshekwa amoyo akulilila Mwaami Lesa mashiku oonse.

¹² Macuunsacuunsa bushiku bwakaboolaawo, Samwelo wakaya mukubona Saulo. Ono wakalwiitikwa ayi wakaya kuKamelo, uko nkwaakalibumbila kambwanga wa ciibalusho. Kuswa kooko wakaya kuGilugala.

¹³ Samwelo ndyaakamucana, Saulo wakaamba ayi, “Mwaami Lesa aamupe coolwe! Ndaciita nshaakaamba Mwaami Lesa.”

¹⁴ Sombi Samwelo wakaamba ayi, “Ono ceebonshi ntoonyumfwa ŋombe ambelele shitoolila?”

¹⁵ Saulo wakakumbula ayi, “Bashilumamba bakashikusha kubene Amaleki. Tabakwe kucaya mbelele aŋombe shakalinga kwiindaawo kubota kwaamba ayi tukabenge milambu kuMwaami Lesa, Lesa wanu. Sombi shimwi shoonse twakamana kushicaya.”

¹⁶ Mpomunyaawo Samwelo wakaambila Saulo ayi, “Cuumune! Leka nkulwiite Mwaami Lesa mbwaandwiita mashiku ainda.” Saulo wakakumbula ayi, “Amundwiite.”

¹⁷ Samwelo wakaamba ayi, “Nakubi kwaamba ayi wakalibona anga taaku mboobete, sa te wakaba mutanjilili wa mikowa ya bene Isilaeli? Mwaami Lesa wakakunanika mafuta a bwaami kwaamba ayi ube mwaami wa cishi ca Isilaeli.

¹⁸ Wakakupa milasho akukutuma ayi, ‘Koya ukanyonyoole bene Amaleki bantu balya beshikubisha cakutabashiyaako. Ukabalwaane kushikila boonse ukabamane kubacaya.’

¹⁹ Ono ceebonshi tookwe kunyumfwila Mwaami Lesa? Weenganinanshi kubwesa shakasaalwa akucita cintu citakondeleshi pameenso a Mwaami Lesa?”

²⁰ Lyalo Saulo wakakumbula ayi, “Sobwe, nebo ndakamunyumfwila Mwaami Lesa. Ndakacita mulimo woonse wakampa Mwaami Lesa. Bene Amaleki boonse ndakamana kubacaya akucata Agagi mwaami wabo.

²¹ Bashilumamba bangu tabakwe kucaya mbelele aŋombe shakalinga kwiindaawo kubota pashintu shakasaalwa. Tabakwe kushicaya kwaamba ayi shikabengwe kuMwaami Lesa, Lesa wanu kuGilugala mbuli milambu.”

²² Sombi Samwelo wakakumbula ayi, “Sa Mwaami Lesa ulisuni milambu yakutenta aimwibo kwiinda mbwaasuni kunyumfwila maswi akwe? Tau! Kunyumfwila nkubotu kwiinda kubenga mulambu alimwi kukutika nkubotu kwiinda mafuta a mbelele shisankwa.

²³ Bwaashu bulibo anga ncibiibi cakusonda, akwalo kulisumpula kuli anga mbubi bwakulambila shibumbwabumbwa. Ono mukwiinga wakakaka liswi lya Mwaami Lesa, alakwe wakaka ndiwe kunoocili mwaami.”

²⁴ Mpomunyaawo Saulo wakaambila Samwelo ayi, “Ncakwiila ndabiisha. Ndasotoka shakaamba Mwaami Lesa alimwi amilasho yanu. Ndakaloonda bantu, aboobo ndakabanyumfwila.

²⁵ Ono ndamusenga ayi mulekelele cibiibi cangu akuboola anebo kwaamba ayi nkalambile Mwaami Lesa.”

²⁶ Sombi Samwelo wakaamba ayi, “Teshi mboole awebo. Webo wakaka liswi lya Mwaami Lesa ono alakwe Mwaami Lesa wakaka ndiwe kunoocili mwaami wa bene Isilaeli!”

²⁷ Cilya Samwelo ncaakaamba ayi akumbuluke, Saulo wakacata kweela lya cakufwala cakwe ca peculu mpeeke cakakwamuka.

²⁸ Lyalo Samwelo wakamwaambila ayi, “Mwaami Lesa wakwamuna buleelo bwa cishi ca Isilaeli kuswa kuli ndiwe sunu. Wabupa womwi pakati ka beshikamukobonyoko, weelete kwiinda ndiwe.

²⁹ Lesa uyo uli mboBulemu bwa cishi ca Isilaeli, taabeci nabi kuyeeya bumbi. Taabete mbuli muntu upilooka mukuyeeya.”

³⁰ Saulo wakakumbula ayi, “Ee, ndakabisha. Ono ndaseenga mumpeeko bulemu pameenso a bamaloba ba bantu bangu alimwi apameenso a bene Isilaeli boonse. Amuboolele anebo kwaamba ayi nkalambile Mwaami Lesa, Lesa wanu.”

³¹ Mpeeke Samwelo wakaboola aSaulo, aboobo Saulo wakalambila Mwaami Lesa.

³² Lyalo Samwelo wakaamba ayi, “Amundeteleeko Agagi mwaami wa bene Amaleki kuno.” Agagi wakesa kuli nguwe cakwaanguluka kaayeeya ayi shakufwa shakeenda kale.

³³ Sombi Samwelo wakaamba ayi, “Ono bweenka mupeeni wako mbowakalengesha balutundu bamwi kufwitwa baana, mbweeke ubo banyoko mbweshi bafwitwe mwaana pakati ka balutundunyinaabo.” Lyalo Samwelo wakatimboolatimboola Agagi kunembo lya cipaililo ca Mwaami Lesa kuGilugala.

³⁴ Lyalo Samwelo wakanyamuka kuya kuLama, sombi Saulo wakaya kuŋanda yakwe muGibiya.

³⁵ Ono mubuumi bwakwe boonse Samwelo taakwe kubonaawo Saulo alimwi. Nakubi boobo wakoongumana ceebo cakwe Saulo. Alakwe Mwaami Lesa wakafwa nsoni kwaamba ayi wakalengesha Saulo kuba mwaami.