1 Samwelo 14 - Baibo Busansulushi Bwa Libuku Ili

Jonasani mbwaakalwana cakubula boowa

¹ Bumwi bushiku Jonasani mwanaakwe Saulo wakaambila musankwa cikula bwangu wakalinga kunyamuna shakulwanisha shakwe ayi, “Atusubuke tuye kumisumba ya bene Filisiti.” Nakubi boobo taakwe kulwiita baishi.

² Saulo lakwe ico ciindi wakalinga kwikala munshaacisamu ca mapomegilaneti kuMigiloni, pafwaafwibo akuGibiya. Wakalinga abashilumamba bakwe abo bakalinga myaanda yosanwe awomwi.

³ Mupailishi wakalinga kufwete cakufwala ca bupailishi ciitwa ayi Efodi nguAija mwanaakwe Aitubu mukwabo Ikabodi. Aitubu wakalinga mwanaakwe Fineyasi alimwi mwishikulu wakwe Eli mupailishi wa Mwaami Lesa kuShilo. Taaku wakalinga kwishi ayi Jonasani waya.

⁴ Mumwinjililo ushaankene wa Mikimashi umo Jonasani mwakaya ayi ainde kuya kumisumba ya bene Filisiti, wakalinga kucite myaandami yobilo. Kwakalinga womwi kulubasu lumwi lwa mwinjililo aumwi kumwi. Umwi wakalinga kwiitwa ayi Bosesi, awalo umwi ayi Sene.

⁵ Womwi wakalinga kulubasu lwa kumatwa a mwinjililo, nkokwaamba ayi kaulangite kuMikimashi, umwi kumalenge, nkokwaamba ayi kaulangite kuGeba.

⁶ Jonasani wakaambila musankwa cikula bwangu ayi, “Atusubukile kumisumba ya babalya bakunsengwe, bene Filisiti. Mpashi Mwaami Lesa utootucafwa. Na wacita ubo, taaku mpweenga cayumina kuli nguwe kutulengesha ayi tukome nabi tuli baniini buyani pano.”

⁷ Cikula bwangu uyo wakaamba ayi, “Cili coonse ncemusuni kucita, nebo nanooli amwebo.”

⁸ Mpomunyaawo Jonasani wakaamba ayi, “Ncibotu, tutoosubuka akuleka bene Filisiti batuboone.

⁹ Ono na baambe ayi, ‘Amulindile tushike uko nkomubete,’ tutokwiimikana peenka mpweshi tunoobete.

¹⁰ Sombi na baambe ayi, ‘Kamwisa kuno,’ tutooya mukwiinga ico citooba ncecitondesho ayi Mwaami Lesa wabaaba mumaanseesu.”

¹¹ Mpeeke bakalibonesha kashanga kubene Filisiti. Lyalo bene Filisiti bakaamba ayi, “Amubone! BaEbulu bamwi batooswa mushilindi mobalinga kuyubite!”

¹² Mpomunyaawo bakoolobesha kuli Jonasani acikula bwangu uyo ayi, “Kamwisa kuno! Mutoocibona sunu!” Jonasani wakaambila cikula bwangu ayi, “Nkonkele, Mwaami Lesa wabaaba mumaansa a bene Isilaeli.”

¹³ Jonasani wakatanta kaya cikalaba kuswa mumwinjililo umo, cikula bwangu alakwe pesule. Jonasani wakalwana bene Filisiti akunoobooma kabawa, cikula bwangu kaabasaulula.

¹⁴ Mukucaya uko kwakutaanguna, Jonasani acikula bwangu bakacaya basankwa bali mpashi makumi obilo mumusena mpashi ukwanabo musa wa liyekele.

¹⁵ Bashilumamba bene Filisiti boonse bakalinga mumishi bakaloonda abuumbi. Abo bakalinga baya mutukoto abaabo bakalinga pamisumba bakalinga kunootutumabo kuboowa. Inshi yakatenkaana, alimwi kwakaba kupilingana kunene abuumbi.

Bene Filisiti mbobakakomwa

¹⁶ Ono bashilumamba bakwe Saulo abo bakalinga kulindilila kuGibiya mucishi cakwe Benjameni, bakababona bene Filisiti kabacica cicicecice.

¹⁷ Lyalo Saulo wakaamba ayi, “Amubelenge bashilumamba akubona utapo.” Bakababelenga akucana ayi Jonasani acikula bwangu uyo wakalinga kumunyamwita shakulwanisha, tabapo.

¹⁸ Mpeeke Saulo wakaambila Aija mupailishi ayi, “Amulete efodi kuno.” Pabushiku Aija wakalinga kwiifwete kunembo lya bene Isilaeli.

¹⁹ Saulo ndyaakalinga kunoocibandika aAija, kupilingana kwakeendaawo mumisumba ya bene Filisiti. Mpeeke Saulo wakaambila Aija ayi, “Ono taaku ciindi cakwiipusha kuMwaami Lesa!”

²⁰ Mpomunyaawo Saulo abashilumamba bakwe bakeenda kuya mukulwana bene Filisiti. Bakacana ayi bakalinga kulwana beene abeene ceebo cakupilingana.

²¹ BaEbulu bamwi abo bakalinga kulubasu lwa bene Filisiti alimwi bakalinga baya ambabo mumisumba yabo, bakaboola alimwi kulubasu lwakwe Saulo aJonasani.

²² Bene Isilaeli bamwi bakalinga kuyubite mucishi ca tulundu ca Efuleemu, bakanyumfwa ayi bene Filisiti bacica. Mpeeke abalo bakasenkana a bene Isilaelinyinaabo akulwana bene Filisiti.

²³ Bakalinga kunooya cilwanabo nshila yoonse kwiindilila akuBeti Afeni. Bushiku ubo Mwaami Lesa wakapulusha bene Isilaeli.

Shakacitika nkoondo ndiyakamana

²⁴ Ono bushiku ubo bene Isilaeli bakalinga balefuka kunsala mukwiinga Saulo, kwiinda mukushomesha cakulumbila kuli Lesa, wakalinga waambilisha ayi, “Lishingo libe pamuntu uli woonse eshi alye cakulya bushiku bwasunu kaantana kuboosha cishole pabalwani bangu.” Aboobo taaku shilumamba nabi womwi wakalya bushiku ubo.

²⁵ Ono boonse bakashika mumusaansa umwi akucana buuci buunji.

²⁶ Ncakwiila bakacana ayi buuci ubo butookunkabo. Nakubi boobo taaku wakalya nakaceyuubo ceebo boonse bakalinga kuloonda lishingo lyakaamba Saulo.

²⁷ Jonasani taakwe kunyumfwa baishi, ndibakaamba shalishingo ilyo. Aboobo wakayasa mpuma akakoli nkaakalinga kucite akulya buuci ubo. Paciindi ceenka ico wakanyumfwa kabotu.

²⁸ Ono shilumamba umwi wakaamba ayi, “Soonse twalefuka kunsala, sombi baishiwanu baamba ayi, ‘Lishingo libe pamuntu uli woonse eshi alye cakulya bushiku bwasunu.’ ”

²⁹ Jonasani wakakumbula ayi, “Bata bapensha bantu bene misheesu. Amubone nebo ndanyumfwa kabotu mukwiinga ndalyaawo tubuuci!

³⁰ Ono niceendaawo buyani kubota naakwiinga bene misheesu balyaawo ashakulya nshibalinga kusaala pakati ka balwani. Sa te nekwacaikwa bene Filisiti baanji kwiinda bobulya?”

³¹ Bushiku ubo bene Isilaeli bakakoma bene Filisiti, bakalinga kuya cilwanabo kuswa kuMikimashi kushika akuAijaloni. Paciindi ico bene Isilaeli kabalefukite kunsala.

³² Aboobo bakacicilabo pashintu nshibakasaala balwani, akubwesa mbelele aŋombe. Bakashicaya pamusena mpomunyaawo alimwi akulya nyama keecicitebo abulowa.

³³ Lyalo umwi wakalwiita Saulo ayi, “Amubone bantu batoobishisha Mwaami Lesa kwiinda mukulya nyama icite bulowa.” Mpomunyaawo wakaamba ayi, “Tamukwe kushomeka. Amukunkulushe libwe linene mulilete waano bulya onoono.”

³⁴ Mpeeke wakaamba alimwi ayi, “Amupalanganine pakati ka bashilumamba bamwi boonse mubalwiite ayi, ‘Womwi awomwi pakati kanu aalete ŋombe na mbelele yaakwe kuli ndime, bacaye kuno akushilya. Mutabishishi Mwaami Lesa kwiinda mukulya nyama icite abulowa.’ ” Lyalo womwi awomwi wakabwesa ŋombe yakwe mashiku ayo wesa wacaya apo peenka.

³⁵ Mpomunyaawo Saulo wakayakila Mwaami Lesa cipaililo ico cakaba citaanshi kuyaka mubuumi bwakwe.

³⁶ Kuswawaawo Saulo wakaambila bashilumamba bakwe ayi, “Tiya tulwane bene Filisiti bulya bweenka mashiku kwaamba ayi tubasaale shintu kushikila kumuyamaca, alimwi tubacaaye boonse.” Balo bakakumbula ayi, “Amucite coonse ncemutooyeeya ayi ncibotu.” Sombi mupailishi wakaamba ayi, “Tulyeelete kutaanguna kwiipusha Lesa.”

³⁷ Lyalo Saulo wakeepusha kuli Lesa ayi, “Sa nje mukulwana bene Filisiti? Sa mutootupa nkusu shakubakoma?” Ono Lesa taakwe kukumbula bushiku ubo.

³⁸ Mpeeke Saulo wakaambila bamatanjilili ba bashilumamba ayi, “Amwisookuno tubone cibiibi cacitwa sunu.

³⁹ Ntooshomesha muliina lya Mwaami Lesa muumi uyo upa bene Isilaeli nkusu shakukoma balwani, kwaamba ayi wacicita utoocaikwa nabibo na ngumwanaangu Jonasani.” Ono bantu taaku wakaambaawo nabi liswi.

⁴⁰ Mpomunyaawo Saulo wakaambila bantu ayi, “Mwebo amwiimikane uko, nebo aJonasani mwanaangu twiimikane kokuno.” Bantu bakakumbula ayi, “Amucite coonse ncemutooyeeya ayi ncibotu.”

⁴¹ Mpeeke Saulo wakapaila kuMwaami Lesa, Lesa wa bene Isilaeli ayi, “NoBaami baLesa, ceebonshi tamukwe kunkumbula sunu? NoBaami baLesa, baLesa ba bene Isilaeli amunkumbule kwiinda muli Ulimu aTumimu. Na ndime ndacita cibiibi nabi na ngumwanaangu Jonasani, mutondeshe kwiinda muli Ulimu. Sombi na mbantu banu bene Isilaeli bacita cibiibi, mutondeshe kwiinda muli Tumimu.” Lyalo cisolo cakawita Jonasani aSaulo, sombi bantu bakaanguluka.

⁴² Mpeeke Saulo wakaamba ayi, “Amuume cisolo pakati kangu aJonasani mwanaangu.” Lyalo cisolo cakawita Jonasani.

⁴³ Mpomunyaawo Saulo wakaambila Jonasani ayi, “Ndwiite ncewacita.” Jonasani wakakumbula ayi, “Ndalyaawo tubuuci tuniini kukakoli kangu. Aamfwebo, nebo ndilibambite.”

⁴⁴ Saulo wakaamba ayi, “Lesa aacite cili coonse pali ndime nabi cibiibi buyani, na webo Jonasani ubule kufwa.”

⁴⁵ Sombi bashilumamba bakaambila Saulo ayi, “Jonasani inga wafwa buyani? Jonasani ngowalengesha ayi bene Isilaeli bakome munshila ikankamanisha. Sobwe! Mbuli Mwaami Lesa mbwaali muumi, taaku mususu nabi womwi weshi ulokele panshi kuswa mumutwi wakwe Jonasani. Mukwiinga ico ncaacita sunu cacitwa kwiinda mukucafwikwa aLesa.” Munshila iyo bantu abo bakafuna Jonasani ayi atacaikwi.

⁴⁶ Mpomunyaawo Saulo wakacileka kukonkela bene Filisiti, abalo bakaboolela kucishi cine mishaabo.

Bweendeleshi bwakwe Saulo abamuŋanda yakwe

⁴⁷ Lyalo Saulo ndyaakaba mwaami wa bene Isilaeli, wakalwana balwani bakwe boonse kumbasu shoonse. Wakalwana bene Moabu, bene Amoni, bene Edomu, bamaami ba Soba alimwi abene Filisiti. Kuli koonse nkwaakaya mukulwana wakabakoma.

⁴⁸ Wakalwana cankusu akukomena kumwi abene Amaleki. Wakafuna bene Isilaeli kubaabo boonse bakalinga babasaala shintu.

⁴⁹ Bana bakwe Saulo basankwa bakalinga nguJonasani, Ishifi, alimwi aMalukishuwa. Mwanaakwe mwanakashi munenebantu wakalinga nguMelabu, mwanikebantu wakalinga Mikali.

⁵⁰ Mukaakwe wakalinga Ayinoamu mwanaakwe Ayimaasi. Mutanjilili wa bashilumamba bakwe wakalinga Abina mwanaakwe Na shimishaabo Saulo.

⁵¹ Kishi baishi Saulo alimwi aNa baishi Abina boonse bobilo bakalinga bana bakwe Abiyelo.

⁵² Saulo wakalinga kulwana bene Filisiti cankusu kwabuumi bwakwe boonse. Ono wakalinga kucita na wacana musankwa ushimpite alimwi utacite boowa pakati ka bene Isilaeli, wakalinga kumubika mulikoto lya bashilumamba bakwe.