1 Samwelo 13 - Baibo Busansulushi Bwa Libuku Ili

Inkondo yakaba pakati kabene Isilaeli abene Filisiti

¹ Ono Saulo wakalinga amyaaka makumi otatwe ndyaakaba mwaami. Wakeendelesha bene Isilaeli kwamyaaka makumi one ayobilo.

² Saulo wakasala basankwa bene Isilaeli shuulu shotatwe. Bali shuulu shobilo wakalingaabo muMikimashi amucishi ca tulundu ca Betelo. Bali cuulu wakabatuma amwanaakwe musankwa Jonasani kuGibiya mucishi ca mukowa wakwe Benjameni. Basankwa bamwi boonse Saulo wakabaambila ayi bayebo mwabo mwabo.

³ Jonasani wakacaya mutanjilili wa bashilumamba bene Filisiti muGeba alimwi ici cikani bene Filisiti bakacinyumfwa. Lyalo Saulo wakatuma beshinkombe bakwe ayi baye beete baEbulu kuya kunkondo kwiinda mukulisha lupeenga mucishi coonse.

⁴ Bene Isilaeli boonse bakalwiitikwa ayi Saulo wakacaya mutanjilili wa bashilumamba bene Filisiti. Aboobo balipatitwe kubene Filisiti. Mpeeke bantu boonse bakanyumfwa kwiita kwakwe Saulo akuya kuGilugala uko nkwaakalinga.

⁵ Bene Filisiti bakalibungabunga ayi balwane bene Isilaeli. Bakalinga kucite shikoci sha nkondo shili shuulu makumi otatwe, beshikulwanina pamaaki bali shuulu shosanwe acomwi alimwi abashilumamba bamwi baanji anga ngumuseese wa muloombe lwa lweenge. Bakaya kuMikimashi kwicwe lya Beti Afeni akuyaka misumba yabo uko.

⁶ Lyalo bene Isilaeli ndibakabona ayi bakalinga munkasaalo, bamwi bakalinga kuyuba mushimfwengo, mushilingo, pakati ka mabwe, mushilindi alimwi amumikalo.

⁷ Bamwi bakasubuka Mulonga wa Joodani kuya mucishi cakwe Gadi alimwi aca Gilyadi. Paciindi ici Saulo kaacili kuGilugala, alimwi bantu mbwaakalingaabo bakalinga kunootutumabo kuboowa.

⁸ Wakalindila kwanshiku shili shosanwe ashobilo ayi Samwelo ese kweelana ambwaakalinga walasha ayi acite. Sombi Samwelo taakwe kwisa kuGilugala. Mpeeke bantu bakatalika kushiya Saulo,

⁹ aboobo wakabaambila ayi, “Amundetele mulambu wakutenta amilambu ya bwanabwankashi ilya.” Mpeeke wakabenga mulambu wakutenta.

¹⁰ Lyalo ndyaakalinga kuyabo cimanisha, Samwelo wakapola. Saulo wakaya wamukumanya akumutambula.

¹¹ Sombi Samwelo wakaamba ayi, “Ino nciinshi ncewacita?” Saulo wakakumbula ayi, “Bantu bakalinga batalika kunshiya, alimwi tamukwe kushika paciindi ncemwakaamba ayi inga mwesa. Kuteshibo boobo bweenka, bene Filisiti abalo babungana kale kuMikimashi.

¹² Aboobo ndayeeya ayi bene Filisiti batoosa bandwaane kuno kuGilugala alimwi nshina kusenga nkumbu kuMwaami Lesa. Lyalo ndaboona ayi ndyeelete kubenga mulambu wakutenta.”

¹³ Samwelo wakamwaambila ayi, “Waciita cintu cabuluya. Tookwe kukonkela mulawo wakakupa Mwaami Lesa wako. Niwacita boobo, naakwiinga Mwaami Lesa wabika bweendeleshi bwa bene Isilaeli mumaansaako abamulunyungu lwako kwamuyayaya.

¹⁴ Sombi bulya bweendeleshi bwako teshi butolelele. Ono mukwiinga tookwe kumunyumfwila, Mwaami Lesa walangoola kale musankwa ucite mibo njaasuni kwaamba ayi abe mwaami wa bantu bakwe.”

¹⁵ Mpeeke Samwelo wakaswaako kuGilugala akuya kuGibiya mucishi ca bene Benjameni. Lyalo Saulo wakabelenga bashilumamba abo mbwaakalingaabo akucana ayi bakalinga mpashi myaanda yosanwe awomwi.

¹⁶ Saulo aJonasani mwanaakwe alimwi abashilumamba babo bakayaka misumba yabo kuGeba mucishi cakwe Benjameni. Sombi misumba yabene Filisiti yakalinga kuMikimashi.

¹⁷ Ono bashilumamba ba bene Filisiti bakanyamuka kuswa pamisumba yabo mutukoto tuli totatwe. Kakoto kamwi kakalulama kuOfula mucishi ca Shuwalu,

¹⁸ kamwi kakalulama kuBeti Oloni, akalo kamwi kakaya kunyinsa ya cishi ciboneka kwiindilila cinyika ca Seboimu alimwi aluyanga.

¹⁹ Ono muIsilaeli temwakalingaawo beshikufula sheela mukwiinga bene Filisiti bakalinga kusuminite kutaleka baEbulu kutalika kupanga mipeeni amasumo.

²⁰ Liinji liinji bene Isilaeli bakalinga kuya kubene Filisiti mukunonesha mapulau, mase, tweembe alimwi ashicekeshi.

²¹ Mweelo wakunonesha tweembe akubamba tweela twakutyunkisha basune, wakalinga lyaali lyomwi. Kunona mapulau nabi mase, bakalinga kucita maali obilo.

²² Aboobo pabushiku bwa nkondo pakati ka bashilumamba bene Isilaeli nguSaulobo aJonasani mwanaakwe bakalinga kucite mipeeni amasumo.

²³ Bene Filisiti bakatuma bashilumamba kuya mukushinkila mwinjililo ushaankene wa Mikimashi.