1 Samwelo 12 - Baibo Busansulushi Bwa Libuku Ili

Samwelo mbwaakaamba kubene Isilaeli

¹ Lyalo Samwelo wakaambila bene Isilaeli ayi, “Ndaciita kweelana ambomwakansenga ayi ncite. Ndamupa mwaami eshi anoomulela,

² aboobo ngweshi anoomutanjilila. Nebo amubone imfwi, ndacembela. Sombi bana bangu mucili abo. Ndakalinga mutanjilili wanu kuswa kubucikula bwangu kushikila sunu.

³ Ono mpoondi pano. Na kuli cilubo ncendakacita amunshinine pameenso aMwaami Lesa amwaami ngwaasala. Sa ndakabwesaawo kale ŋombe nabi mbongolo ya muntu umwi uli woonse? Sa kuli ngondakacenjeekawo kale nabi kupensha? Sa ndakatambulawo kale makulo kumuntu uli woonse? Na pasheeshi shoonse kuli ncendakacitaawo, ntoolipila ico ncendakabwesa.”

⁴ Bantu bakakumbula ayi, “Tamukwe kutucenjeekaawo nabi kutupensha, alimwi taaku ngomwakabweselaawo cintu.”

⁵ Lyalo Samwelo wakabaambila ayi, “Mwaami Lesa amwaami ngwaakasala baba bakamboni sunu kwaamba ayi mwasumina ayi nshicite mulandu napaceyuubo.” Abalo bakaamba ayi, “Ee, Mwaami Lesa ngukamboni wesu.”

⁶ Mpeeke Samwelo wakabaambila ayi, “Mwaami Lesa ngowakasala Mose aAloni alimwi ngowakakusha bamashali banu bakulukulu muIjipiti.

⁷ Ono amwiimikane peenka mpomubete, ntoomushinina pameenso akwe Mwaami Lesa kwiinda mukumwiibalusha milimo ya nkusu shiindaawo yoonse Mwaami Lesa njaakacita ayi apulushe ndimwe abamashali banu bakulukulu.

⁸ Jakobo abamuŋanda yakwe ndibakaya kuIjipiti alimwi bene Ijipiti ndibakabapensha, bamashali bakulukulu abo bakalilila Mwaami Lesa ayi abacaafwe. Lyalo wakatuma Mose aAloni abo bakabakusha muIjipiti akubakalika mucishi cino.

⁹ Sombi bantu bakaluba Mwaami Lesa wabo. Mpeeke wakasuminisha Sisela uyo wakalinga mutanjilili wa bashilumamba ba ndabala inene ya Asoli, bene Filisiti alimwi amwaami wa cishi ca Moabu kulwana bamashali banu bakulukulu akubakoma.

¹⁰ Lyalo bakalilila Mwaami Lesa ayi abacaafwe akwaamba ayi, ‘Twakabisha mukwiinga twakafutatila ndimwe noBaami baLesa, akulambila shibumbwabumbwa shakwe Baali ashikoshanyo shakwe Ashitaloti. Amutufuune ono kubalwani besu. Lyalo tulaakunoolambilabo ndimwe!’

¹¹ Mpomunyaawo Mwaami Lesa wakatuma Gidyoni, Balaki, Jefuta, alimwi kumeelelesho ndime neSamwelo. Womwi awomwi pakati kesu wakamufuna kuswa kubalwani banu. Mpeeke mwakekala muluumuno.

¹² Sombi ndimwakabona ayi Naashi mwaami wa bene Amoni utooyanda kumulwana, mwakakaka Mwaami Lesa kuba mwaami wanu, akuŋambila ayi, ‘Tulisunibo mwaami kwaamba ayi atuleele.’

¹³ “Ono ngooyu mwaami ngomwakasala. Mwakamusenga, lyalo Mwaami Lesa wakamupa nguwe.

¹⁴ Shintu shoonse shinanoomweendela kabotu na munoolemeka Mwaami Lesa, Lesa wanu, munoomusebensela, munoomukutika alimwi akunoonyumfwila milawo yakwe. Nkokwaamba ayi mwebo amwaami wanu na mwamukonkela.

¹⁵ Ono na mukabule kunookutika Mwaami Lesa, alimwi akutakonkela milawo yakwe, ulaakuba mulwani wanu bweenka mbwaakaba mulwani wa bamashali banu bakulukulu.

¹⁶ Aboobo amulindile mubone cintu cinene abuumbi ico Mwaami Lesa ncaatooyanda kucita.

¹⁷ Sa te nciindi cakutebula witi bulya? Ntoopaila kuMwaami Lesa ayi atume cilulumo amfuula. Lyalo mutooshiba ayi mwakacita cilubo cinene pameenso a Mwaami Lesa ndimwakasenga ayi amupe mwaami.”

¹⁸ Mpeeke Samwelo wakapaila. Aboobo pabushiku ubo bweenka Mwaami Lesa wakatuma cilulumo amfuula. Lyalo bantu boonse bakaloonda nkusu sha Mwaami Lesa alimwi ashakwe Samwelo.

¹⁹ Mpomunyaawo bantu bakaambila Samwelo ayi, “Amutupailileeko kuMwaami Lesa, Lesa wanu, kwaamba ayi tutafwi. Tweshiiba ono kwaamba ayi peculu pashibiibi shesu shimwi shoonse, tweelikaawo acibiibi cakusenga mwaami.”

²⁰ Lyalo Samwelo wakabaambila ayi, “Mutaloondi, nakubi kwaamba ayi mwakacita cibiibi ca mushobo uyo, mutafutatili Mwaami Lesa, sombi kamumusebenselabo camoyo woonse.

²¹ Mutakonkeli shibumbwabumbwa shitacite mpindu. Tashikoonshi kumucafwa nabi kumufuna mukwiinga taaku mboshibete.

²² Mwaami Lesa wakashomesha cakulumbila ayi teshi akamushiyeewo mukwiinga cakamukonda kwaamba ayi mwebo mube bantu bakwe.

²³ Kulubasu lwangu, nshisuni kwaamba ayi mbishishe Mwaami Lesa mukucileka kumupaililaako. Ndaakumwiisha nshila ibotu alimwi iluleme ayi mwiikonkele.

²⁴ Ono kamunyumfwila Mwaami Lesa akumusebensela cakushomeka alimwi acamoyo woonse. Amwiibaluke shintu shikankamanisha isho nshaakamucitila.

²⁵ Sombi na mwatolelela kucita shibiibi, nkokwaamba ayi mwebo amwaami wanu mulaakunyonyoolwa.”