1 Samwelo 11 - Baibo Busansulushi Bwa Libuku Ili

Saulo mbwaakakoma bene Amoni

¹ Ndipakeendabo mpashi mweenshi, Naashi mwaami wa bene Amoni wakatanjilila bashilumamba bakwe ayi bakalwane ndabala ya Jabeshi mucishi ca Gilyadi. Ndibakakoma ndabala iyo, basankwa ba muJabeshi bakasenga Naashi ayi, “Apabebo cipangano pakati kesu amwebo ayi tunoomusebensela.”

² Naashi wakakumbula ayi, “Ee, ntoopanga cipangano amwebo na tusuminishanyebo pacikani comwi. Cikani ici ncakwaamba ayi womwi awomwi mutulule liinso lyalulyo kwaamba ayi nenshe nsoni bene Isilaeli boonse.”

³ Mpeeke bamaloba ba kuJabeshi bakaamba ayi, “Ncibotu, ono amutupe nshiku shosanwe ashobilo kwaamba ayi tutume beshinkombe mucishi coonse ca Isilaeli. Na kubule weenga watucafwa, ncakwiila tutooba mumaansaanu.”

⁴ Beshinkombe bakashika kuGibiya uko Saulo nkwaakalinga kwikala. Mpeeke ndibakashimika makani ayo, bantu boonse bakatalika kulila kubuumba.

⁵ Paciindi ico Saulo wakashika abasune bakwe kuswa kumuunda. Mpeeke wakeepusha ayi, “Anu kwabanshi? Ceebonshi bantu boonse batoolila?” Mpomunyaawo bakamulwiita makani akaleta beshinkombe ba kuJabeshi.

⁶ Saulo ndyaakanyumfwa boobo Mushimu wakwe Lesa wakamuselukila cankusu, mpeeke wakakalala abuumbi.

⁷ Lyalo wakabwesa basune bobilo, wabatimboola mushipwashipwa sha nyama akupa beshinkombe bakwe ayi bashiinshaanye mucishi coonse ca Isilaeli alimwi akuya caamba ayi, “Uyo woonse weshi abule kuya kunkondo pantu pomwi aSaulo alimwi aSamwelo, basune bakwe mbweshi bakacitwe bulya!” Bene Isilaeli boonse bakaloonda ico Mwaami Lesa nceenga wacita na babula kuya. Mpeeke boonse cakubula aucaala bakaya babungana.

⁸ Saulo wakababunganishisha kuBeseki. Bashilumamba bakaswa muIsilaeli bakalinga 300,000, abalo bakaswa kuJuda bakalinga 30,000.

⁹ Lyalo bakaambila beshinkombe ba kuJabeshi ayi, “Kamuya mulwiite bantu bene mishaanu ayi ciilo lisuba kalitana kushika pakati ka mutwi, mulaakufunwa.” Bantu ba kuJabeshi ndibakanyumfwa makani aya bakasangalala abuumbi

¹⁰ akwaambila Naashi ayi, “Ciilo tulaakuba mumaansaanu, alimwi mulaakucita cili coonse ncemusuni ayi mucite kuli ndiswe.”

¹¹ Bushiku bwakaboolaawo kumuyamaca Saulo wakapansaanya bashilumamba bakwe mumakoto otatwe. Mpeeke kalitana kuswa bakawuumukila mumisumba ya bene Amoni akubalwana. Lyalo bakabacaya tibili lisuba ndilyakashika pakati ka mutwi. Pabaabo bakapuluka bakapalangana cakwaamba ayi umwi aumwi wakalinga kuya cicicabo eenka.

¹² Mpomunyaawo bene Isilaeli bakaambila Samwelo ayi, “Balya bakaamba ayi Saulo taakoonshi kuba mwaami wesu bali kuli? Amubaabe mumaanseesu tubacaaye!”

¹³ Sombi Saulo wakaamba ayi, “Sobwe! Taakuuwo eshi acaikwe sunu, mukwiinga buno mbobushiku Mwaami Lesa mbwaafuna bene Isilaeli.”

¹⁴ Mpomunyaawo Samwelo wakaambila bantu ayi, “Katiya soonse kuGilugala. Tuye tukaambilishe alimwi ayi Saulo ngomwaami wesu.”

¹⁵ Aboobo boonse bakaya kuGilugala. Mpeeke kulya bakaambilisha alimwi kunembo lya Mwaami Lesa ayi Saulo ngomwaami. Bakabenga milambu ya bwanabwankashi. Lyalo Saulo pantu pomwi abantu boonse bene Isilaeli bakasekelela bushiku ubo.