1 Samwelo 10 - Baibo Busansulushi Bwa Libuku Ili

¹ Lyalo Samwelo wakabwesa musaashi wa mafuta a olifi wapuumwita Saulo pamutwi, wamufyonta akwaamba ayi, “Mwaami Lesa wakusala ayi ube muleli wa bene Isilaeli. Ulaakulela bantu bakwe akubafuna kubalwani babo. Ono citondesho ici ncakwaamba ayi Mwaami Lesa wakusala kuba muleli wa bantu bakwe.

² Waswa kokuno sunu, utookumanya basankwa bobilo pafwaafwi acuumbwe cakwe Lakelo kuSelusa mucishi cakwe Benjameni. Basankwa abo batookulwiita ayi mbongolo nshemwakalinga kulangoola shacanika. Aboobo baiso bacileka kulisukama pambongolo, sombi balilisukemebo pali ndiwe. Balicitekobo kuliipusha ayi, ‘Anu ntoocita buyani pamwanaangu.’

³ Lyalo utootolelela kushikila kumubanga wa kuTaboli, uko nkweshi ukumanye basankwa botatwe abo beshi banooya kuBetelo mukubenga mulambu kuli Lesa. Umwi unanooyumwite twana twa mpongo totatwe, umwi shinkwa wotatwe, alimwi watatu unanooyumwite nkomwe ya cipaya iswite waini.

⁴ Batookwaansha alimwi batookutambika shinkwa wobilo ayi ubwese. Shinkwa uyo ulyeelete kuutambula.

⁵ Kuswawaawo utooya kukalundu kakwe Lesa muGibiya, uko kuli misumba ine Filisiti. Ono pamwinjililo wa ndabala utookumanya likoto lya balaluki beshi banooswa kucipaililo pakalundu, kabesa cilisha tulumbu, ngoma, mitoolilo atunkobele, uku kabalaluka.

⁶ Mpomunyaawo cakuteengashila Mushimu wa Mwaami Lesa utookuselukila cankusu, lyalo utoolaluka pantu pomwi ambabo alimwi utooba muntu umbi.

⁷ Lyalo shitondesho ishi shacitika, cita cili coonse Lesa nceshi akutanjilile ayi ucite.

⁸ Utootanjila kuya kuGilugala uko nkweshi nkakucaane akubenga milambu yakutenta aya bwanabwankashi. Ukanindile uko kwanshiku shili shosanwe ashobilo kushikila nkese mukukulwiita ncooelete kucita.”

⁹ Mpomunyaawo Saulo ndyaakasandulukabo ayi bapansaane aSamwelo, Lesa wakamupa mibo ipya. Mpeeke shoonse shakaamba Samwelo shakacitika bushiku ubo.

¹⁰ Saulo amusebenshi wakwe ndibakashika kuGibiya, likoto lya balaluki lyakabakumanya. Cakuteengashila Mushimu wakwe Lesa wakamuselukila cankusu. Lyalo wakalaluka pantu pomwi ambabo.

¹¹ Mpeeke bantu bakalinga kumwishi lyoonse ndibakamubona kaacita boobo bakeepushanya ayi, “Ino nciinshi cacitika kumwanaakwe Kishi? Sa Saulo alakwe waba mulaluki?”

¹² Lyalo musankwa umwi wa kooko wakeepusha ayi, “Ino balaluki bamwi aba, bameeshiwabo mbaani?” Mboboobo mbowaakatalika mwaambo wakwaamba ayi, “Sa Saulo alakwe waba mulaluki?”

¹³ Saulo ndyaakamanisha kulaluka, wakaya kucipaililo pakalundu.

¹⁴ Bashimishaabo Saulo ndibakamubona amusebenshi wakwe, bakabeepusha ayi, “Mwakalinga kuli?” Mpeeke Saulo wakakumbula ayi, “Mukulangoola mbongolo. Nditwakalema kulangoola kutashicana, twakaya kuli Samwelo.”

¹⁵ Bashimishaabo Saulo bakeepusha alimwi ayi, “Ono wakamulwiita ayinshi?”

¹⁶ Saulo wakakumbula ayi, “Wakatulwiita ayi shacanika kale.” Saulo wakeelabo waawo nkokwaamba ayi taakwe kulwiita bashimishaabo cikani cakuba mwaami kwakwe.

Saulo mbwaakaambilishikwa ayi ngomwaami

¹⁷ Mpomunyaawo Samwelo wakeeta bantu boonse ayi babungane mukulemeka Lesa kuMisipa.

¹⁸ Wakabaambila ayi, “Mwaami Lesa, Lesa wa bene Isilaeli waamba ayi, ‘Ndakamukusha mucishi ca Ijipiti akumufuna kubene Ijipiti akubantu bamwi bakalinga kumupensha.

¹⁹ Ndime Lesa wanu, uyo eenka umufuna kuswa kumapensho amakatasho anu. Ono sunu mwankaaka akusenga ayi mupe mwaami. Ncibotu, amubungane pameenso angu neMwaami Lesa mumukowa amukowa, cipani acipani.’ ”

²⁰ Lyalo Samwelo wakalengesha ayi mukowa womwi awomwi use kunembo. Mpomunyaawo Mwaami Lesa wakasalaawo mukowa wakwe Benjameni.

²¹ Mpeeke wakalengesha ayi mukowa wakwe Benjameni use kunembo mucipani acipani. Lyalo cipani cakwe Matili cakasalwa. Kuswawaawo cipani cakwe Matili cakesa kunembo. Kumeelelesho Saulo mwanaakwe Kishi wakasalwa. Sombi ndibakamulangoola, bakaalilwa kumucana.

²² Aboobo bakeepusha Mwaami Lesa ayi, “Sa muntu uyo mpwaali pano?” Lyalo Mwaami Lesa wakakumbula ayi, “Ee, mpwaali. Wayuba pakati ka shintu shilya.”

²³ Aboobo bakacica baya bamuyubulula akumuleta kubantu, alimwi boonse bakabona ayi wakalinga kubeenditeewo kulaampa amutwibo.

²⁴ Mpomunyaawo Samwelo wakaamba ayi, “Sa mwamubona musankwa uyo Mwaami Lesa ngwaasala? Taaku aumwi uli mbuli nguwe pakati kesu.” Lyalo bantu boonse bakoolobesha ayi, “Abekale ciindi cilaamfu baami!”

²⁵ Samwelo wakasansulula milimo ya mwaami anshaaelete kucita, akushilemba mulibuku ilyo ndyaakabika mumusena usalalite. Lyalo wakabaambila ayi bamwaike.

²⁶ Saulo alakwe wakaboolela kuGibiya kumishaabo. Bantu bamwi beshinkusu abo Lesa mbwaakayungoola bakayaakwe.

²⁷ Sombi bantu bamwi batayeeyi kabotu bakaamba ayi, “Anu musankwa uyu inga watupulusha buyani?” Bakaamba shibiibi pali Saulo, aboobo taaku cipo ncibakamuletelaawo. Sombi Saulo wakalinga kuumwitebo.