1 Samwelo 1 - Baibo Busansulushi Bwa Libuku Ili

Elikana abamuŋanda yakwe kuShilo

¹ Kwakalinga musankwa wa mumukowa wakwe Efuleemu wakalinga kwiitwa ayi Elikana. Wakalinga kwikala mundabala ya Lama, mucishi ca tulundu ca Efuleemu. Elikana wakalinga mwanaakwe Jeloamu alimwi mwishikulu wakwe Eliyu mwanaakwe Towu mucipani cakwe Sufu.

² Elikana wakalinga kupalikite banakashi bobilo, Aana aPenina. Penina wakashala baana, sombi Aana taakalinga kuciteewo nabibo womwi.

³ Ono mwaaka amwaaka Elikana wakalinga kuya kuShilo mukulambila Mwaami Lesa Shinkusu shoonse akubenga milambu. Ofini aFineyasi, bana bakwe Eli, mbobakalinga bapailishi ba Mwaami Lesa uko.

⁴ Lyoonse Elikana na wabenga mulambu wakwe, wakalinga kupa Penina cipansha ca nyama akubaanya bana bakwe basankwa abanakashi cipansha comwi comwi.

⁵ Ono mukwiinga wakalinga kusuni Aana abuumbi, lakwe wakalinga kumupa shipansha shobilo nakubi kwaamba ayi Mwaami Lesa wakeemika lushalo lwakwe.

⁶ Penina nabukashinyina wakalinga kumuseka akumulensha nsoni ceebo Mwaami Lesa wakeemika lushalo lwakwe.

⁷ Cikani ici cakatolelela mwaaka amwaaka. Kulilabo na baya kuŊanda ya Mwaami Lesa, Penina wakalinga kupensha Aana cakwaamba ayi wakalinga kunoolilabo akukaka kulya cili coonse.

⁸ Elikana ibaye, wakalinga kwiipusha ayi, “Aana utoolilanshi? Ceebonshi tootekulya? Anu utookuungumaninanshi lyoonse? Sa nebo kuba ibayo taciindi kushala baana basankwa bali likumi?”

Aana aEli

⁹ Ono bushiku bumwi kuShilo ndibakamanisha kulya, Aana wakanyamuka kuya mukupaila. Eli mupailishi wakalinga kushiite pacuuna mumulyango wa Ŋanda yakwe Lesa.

¹⁰ Aana wakatalika kupaila kuMwaami Lesa uku kaalila cakupenga abuumbi mumoyo.

¹¹ Mpeeke wakashomesha cakulumbila ayi, “NoBaami baLesa Beshinkusu shoonse, amumboone nemusebenshi wanu! Amulangishishe mapensho angu akunyumfwila nkumbu! Mutamfutatili! Na mwampa mwaana musankwa, ndashomesha ayi ndaakumupa kuli ndimwe kwa buumi bwakwe boonse alimwi ayi teshi akaceseewo misusu yakwe.”

¹² Aana wakatolelela kupaila kuMwaami Lesa kwaciindi cilaamfu, lakwe Eli kaalangilishabo mulomo wakwe.

¹³ Wakalinga kupaila buumwite. Mulomo wakalinga kunyanyaala, sombi liswi telyakalinga kuswa. Mpomunyaawo Eli wakayeeya ayi wakolwa

¹⁴ akumwaambila ayi, “Cileke kucita shabucakolwa! Cileke kukolwa ukale mumeenso tuba!”

¹⁵ Sombi lakwe wakakumbula ayi, “Sobwe, nshikoletweewo nkambo. Nshindalinga kunwa! Kuli ncindapenga. Aboobo ndalinga kupaila ayi mbike mapensho angu kuMwaami Lesa.

¹⁶ Mutayeeyi ayi ndimwanakashi utaaku mbwaabete. Ndalinga kupaila mushobo uyu ceebo ndyuungumene abuumbi.”

¹⁷ Eli wakaamba ayi, “Koya muluumuno alimwi Lesa wa bene Isilaeli aakupe ncewamusenga.”

¹⁸ Alakwe wakakumbula ayi, “Amube ankuumbu lyoonse pali ndime.” Lyalo wakaya walya alimwi abuumba bwakamana.

Samwelo mbwaakashalwa akubengwa kuli Lesa

¹⁹ Macuunsacuunsa bushiku bwakaboolaawo, Elikana abamuŋanda yakwe bakabuka. Lyalo ndibakamana kulambila Mwaami Lesa, bakaboolela kuLama. Elikana wakakumana aAana mukaakwe. Mpeeke Mwaami Lesa wakakumbula mupailo wakwe Aana.

²⁰ Aboobo wakamita. Lyalo wakashala mwaana musankwa akumutumba ayi Samwelo, caamba ayi, “Ndakamusenga kuMwaami Lesa.”

²¹ Ciindi cakashikila alimwi cakwaamba ayi Elikana abamuŋanda yakwe baye kuShilo mukubenga mulambu kuMwaami Lesa wa pamwaaka amulambu umwi upanseene uyo ngwaakashomesha.

²² Nakubi boobo Aana lakwe mulweendo ulu taakwe kuyaako. Mpeeke wakalwiita ibaye ayi, “Ndaakumuleshabo mwaana uyu, ndaakumutola kuŊanda ya Mwaami Lesa akumubenga kuli nguwe. Ulaakunokala kooko lyoonsebo.”

²³ Elikana wakakumbula ayi, “Ncibotu cita mbuli mboosuni. Koshiite kuno kuŋanda kushikila ukaleeshe. Mwaami Lesa aakulengeshe kucita cancinencine ico ncewakashomesha.” Aboobo Aana wakacaala kuŋanda akulela mwaana kushikila waleka.

²⁴ Lyalo ndyaakamulesha, wakamutola kuShilo. Wakatolelela amucende wa myaaka yotatwe, makilogilamu ali 10 a fulaulo, alimwi ankomwe ya cipaya keeswite waini. Wakatola Samwelo kuŊanda yakwe Lesa muShilo kaacili mwanike abuumbi.

²⁵ Ndibakamana kucaya mucende uyo, bakatola mwaana uyo kuli Eli.

²⁶ Lyalo Aana wakamwaambila ayi, “Nkambo, sa mwanyingashila? Ndime walutundu ulya ngomwakabona kaaimfwi apa, kaapaila kuMwaami Lesa.

²⁷ Ndakasenga mwaana uyu kuswa kuMwaami Lesa. Mpeeke wakakumbula kusenga kwangu.

²⁸ Aboobo ntoomubenga kuMwaami Lesa. Unanooli musebenshi wakwe Lesa lyoonsebo.” Mpomunyaawo bakalambila Mwaami Lesa apo.