1 Pita 4 - Baibo Busansulushi Bwa Libuku Ili

Buumi bwa bwine Klistu

¹ Ono mukwiinga Klistu wakapenshekwa mumubili, amwebo mulyeelete kuliyumyayumya kwiinda mumuyeeyo ngomunya wakalinga kucite Klistu ceebo uyo woonse upenshekwa, teendeleshekwi abubi.

² Paceebo ceeco, mubuumi bwanu bwa mucishi ca panshi tamweelete kukonkela shiyanda mibili yanu, sombi shiyanda Lesa.

³ Mukwiinga mwakaswaamo kale muciindi cakucita shintu shisuni kucita bakunsengwe. Mwakalinga kwikala buumi bwakutalilemeka, lunkumbwa, bucakolwa, kusekelela kwa bufuule, kusekelela kwakukolwa alimwi akulambila kulensha nsoni kwa shibumbwabumbwa.

⁴ Ono bulya bakunsengwe balakankamana ndibabona kwaamba ayi tamutokala buumi bwakubisha pantu pomwi ambabo, nceceeco ncebatoomutukanina.

⁵ Sombi balaakulyaambilila mulandu wabo pameenso akwe Lesa, uyo weshi akoomboloshe boomi abafu.

⁶ Nceceeco Makani Abotu ncaakashimikililwa akubaabo bakafwa, kwaamba ayi nabi bakoomboloshekwa mumubili bweenka mbuli bantu boonse, sombi mumushimu banookala abuumi bweenka mbuli Lesa.

Tusebenseshe kabotu shipo shakwe Lesa

⁷ Ono mamanino a shintu shoonse ali pafwaafwi. Paceebo ceeco, kamulitibuka alimwi mucenjele, kwaamba ayi mukonshe kupaila.

⁸ Cinene ncakwaamba ayi musunane cankusu ceebo na mwasunana, inga kamulibambite kulekelelana shibiibi.

⁹ Pakufwakashilana mumaandaanu amutambulane cakutatongooka.

¹⁰ Lesa wakamupa shipo shipusenepusene alimwi muntu womwi awomwi ulyeelete kuba mbuli shikulama buboni mubotu. Ulyeelete kusebensesha ico ncaakatambula mukucafwa bamwi.

¹¹ Uyo woonse ushimikila, ulyeelete kwaamba maswi akwe Lesa. Uyo woonse usebensa milimo mucoonde, ulyeelete kusebensa kweelana ankusu Lesa nshaamupa, kwaamba ayi mushintu shoonse Lesa alemekwe kwiinda muli Jesu Klistu. Bulemu ankusu nshakwe Jesu Klistu lyoonse alyoonse. Ameni.

Kusangalala pakupenshekwa

¹² Nomusunikwi, mutakankamani amulilo wa mapensho wamushikila mukumusunka. Mutayeeyi kwaamba ayi nceensu kupenshekwa boobo.

¹³ Sombi amusangalale mukwiinga mutoopenga bweenka mbuli Klistu kwaamba ayi bwaakuboneka bulemu bwakwe, mukasangalale abuumbi.

¹⁴ Na mwacobolwa ceebo ca liina lyakwe Klistu, mulicite coolwe, mukwiinga cilabonesha ayi Mushimu wakwe Lesa wa bulemu uli muli ndimwe.

¹⁵ Ono na umwi wapenshekwa, citabi ceebo cakwaamba ayi ngumucayi, mwiipi, shikutyola milawo nabi shikunjila mumakani ngwaateshi.

¹⁶ Sombi na mwapenshekwa ceebo cakuba bene Klistu, mutanyumfwi nsoni, sombi mulumbe Lesa ceebo ca liina ilyo.

¹⁷ Mukwiinga ciindi cashikila cakwaamba ayi Lesa atalike koombolosha bantu bakwe. Ono na Lesa ulaakutaanguna koombolosha ndiswe, ino cilaakuba buyani kubaabo batashomi Makani Abotu akwe Lesa?

¹⁸ Kweelana abwaamba Malembo akwe Lesa ayi, “Ono na ululeme ulaakupulushikwa cakupengapenga, ino bamucita shibi batanyumfwili Lesa balaakweela kuli?”

¹⁹ Aboobo abo bapenshekwa ceebo cakuyanda kwakwe Lesa, balibeenge mumaansa a Mulengi wabo ushomeka, akutolelela kucita milimo ibotu.