1 Pita 2 - Baibo Busansulushi Bwa Libuku Ili

Libwe lyuumi

¹ Aboobo amucileeke bubi boonse, bubeshi, kwaamba nshemutaciti, munyono alimwi amusebaanyo wa mushobo woonse.

² Ono mbuli bakateta mbobalilila mukupa, muyandishishe mukupa wiine wiine wa mushimu, kwaamba ayi kwiinda mukuunwa mukomene akupuluka,

³ kamuli mwanyumfwawo kale bubotu bwa Mwaami.

⁴ Ono amwise kuli nguwe uyo uli ndyelibwe lyuumi lyakakakwa abantu, sombi Lesa wakalisala akulilemeka.

⁵ Amwebo mube anga ngamabwe oomi ayo Lesa ngweshi ayakishe ŋanda yakwe ya mushimu. Muŋanda iyo mweshi mukasebensele mbuli bapailishi basalalite mukubenga milambu ya mushimu itambulwa kuli Lesa kwiinda muli Jesu Klistu.

⁶ Mukwiinga Malembo alaamba ayi, “Amubone, ndasala libwe liyandika abuumbi. Ndalibika muSiyoni mulikonko lya ŋanda, ushoma muli nguwe teshi akanyumfwe nsoni.”

⁷ Kuli ndimwe nomushoma, libwe ili lilayandika abuumbi. Sombi kuli baabo batashomi, Lesa wakaamba ayi, “Libwe bayaki ndibakakaka, lyakaba ndyelibwe liyandika lya mulikonko lya ŋanda.”

⁸ Malembo akwe Lesa alaamba alimwi ayi, “Ili ndyelibwe lyeshi likalengeshe bantu kulisuntula ndyelyeelyo lyeshi likalengeshe bantu kuwa.” Bakalisuntula ceebo tabakwe kunyumfwila maswi akwe Lesa. Ici cakacitika kweelana akuyanda kwakwe.

⁹ Sombi mwebo muli bantu basalitwe, bapailishi ba bwaami, mushobo usalalite alimwi bantu bakwe Lesa. Wakamusala kwaamba ayi mukashimikile shamicito yankusu ya wooyo wakamwiita kuswa kumunshinshe akumwinjisha mumumuni wakwe ukankamika.

¹⁰ Kale kale temwakalinga bantu bakwe Lesa, sombi ono muli bantu bakwe. Kale kale temwakalinga kwishi nkumbu shakwe Lesa, sombi ono mwatambula nkumbu shakwe.

Basebenshi bakwe Lesa

¹¹ Nomusunikwi, ntoomusenga cankusu, mbuli beensu bapalangene mucishi ca panshi, amuswe kulunkumbwa lwa mubili ulo lulwana amuuya wanu.

¹² Micito yanu pakati ka bakunsengwe ilyeelete kuba ibotu kwaamba ayi na bamubekesha kucita cibiibi, babone micito yanu ibotu akulemeka Lesa pabushiku ubo Lesa aakwisa mukutoombolosha.

¹³ Ceebo ca Mwaami Lesa, amulibombye kubeendeleshi boonse ba mucishi ca panshi nabi kumuleli munene wa kuLoma, mweendeleshi wiindaawo,

¹⁴ nabi kubeendeleshi mbaakabika kupa mulandu abo bacita shitaluleme akulumbaisha bacita shiluleme.

¹⁵ Mukwiinga nkuyanda kwakwe Lesa ayi kwiinda mukucita shiluleme muumushe kwaamba kwa baluya kwakubula lushibo.

¹⁶ Amwikale mbuli bantu baangulukite, kutasebensesha lwaanguluko lwanu ayi lube cakufwekesha bubi, sombi amwikale mbuli basebenshi bakwe Lesa.

¹⁷ Amulemeke bantu boonse. Amusunane abashominyinaanu. Kamuloonda Lesa. Amulemeke muleli munene wa kuLoma.

Mapensho akwe Klistu

¹⁸ Nobasebenshi kamulibombya kubamaami banu akubalemeka cancinencine, kuteshibo baabo bali kabotu alimwi bamunyumfwila nkumbu, sombi abaabo beshilunkutwe.

¹⁹ Mukwiinga ncibotu na muntu wapenshekwa kwakubula mulandu ceebo ulishi ayi Lesa nkwaali.

²⁰ Ino muli mpindunshi na mwapenshekwa akuumwa uko kumweelete mukwiinga mwacita cilubo? Sombi na mwapenshekwa nakubi kwaamba ayi mwacita kabotu, Lesa ulaakumupa coolwe.

²¹ Bwikaalo ubu Lesa mbwaakamwiitila. Mukwiinga Klistu wakamupengela kumushiila citondesho ayi munookonkela mwaakeenda.

²² Lakwe taakwe kucitawo cibiibi nabi kubecaawo.

²³ Ndibakalinga kumutukana taakwe kubabooshesha. Ndibakamupensha taakwe kubakonga, sombi wakabika shoonse mumaansaakwe Lesa moomboloshi ululeme.

²⁴ Klistu mwiine wakayumuna shibiibi shesu mumubili wakwe pamucilingano kwaamba ayi tuswe munkusu sha shibiibi akwikala lyoonse mubululami. Ceebo ca shilonda shakwe mwashilikwa.

²⁵ Mwakalinga anga nimbelele shakasoweka, sombi bulya mwaboola kuMweembeshi uyo utanjilila buumi bwanu.