1 Makani 5 - Baibo Busansulushi Bwa Libuku Ili

Bamulunyungu lwakwe Lubeni

¹ Aba mbamulunyungu lwakwe Lubeni uyo wakalinga mwanaakwe Jakobo musankwa wakwiiya. Ono ceebo mwaana uyo wakakumana akasuwa wa baishi, wakasowa nkusu sha bunenebantu bwakwe lyalo nkusu isho shakapekwa kubana bakwe Josefu mwanaakwe Isilaeli. Paceebo ceeco taakwe kubelengelwa pamundando wa bamulunyungu lwakwe Jakobo kweelana akushalwa kwakwe.

² Nakubi kwaamba ayi mukowa wakwe Juda wakalinga wakaba ushinkusu kwiinda mikowa ya bamakwabo, nkusu sha bunenebantu shakapekwa kuli Josefu.

³ Bana bakwe Lubeni mwanaakwe Isilaeli wakwiiya, nguAnoki, Palu, Esiloni alimwi aKami.

⁴ Bamulunyungu lwakwe Jowelo mbaaba: Jowelo wakashala Shemaya, Shemaya wakashala Gogi, Gogi wakashala Shimeyi,

⁵ Shimeyi wakashala Mika, Mika wakashala Leaya, Leaya wakashala Baali,

⁶ Baali wakashala Bila. Bila ngowooyo Tigilati Pilesa mwaami wa bene Asilya ngwaakatola busha mucishi cakwe. Bila wakalinga mutanjilili wa bene Lubeni.

⁷ Mumakani akalinga kusansulula bamulunyungu lwabo mulilembetwe bamatanjilili ba mushipani sha mumukowa wakwe Lubeni aba: Jeyelo mutanjilili wa boonse, Sekaliya,

⁸ Bela mwanaakwe Asasi mwishikulu wakwe Shema, wa mucipani cakwe Jowelo. Cipani ico cakalinga kwikala mucishi ca Alowa kuya mukushika kuNebo akuBaali Meoni.

⁹ Kulubasu lwa kwicwe bakaya mukwikala mucishi cakweela kwa luyanga ulo luya mukushika kuMulonga wa Yufuletisi mukwiinga shifubwa shabo shakafula mucishi ca Gilyadi.

¹⁰ Mubwaami bwakwe Saulo, bakaya mukulwana bene Agi, abo mbobakamana kucaya munkondo. Lyalo bakabwesa cishi cabo ico cakalinga kwicwe mucishi ca Gilyadi.

Bamulunyungu lwakwe Gadi

¹¹ Bene Gadi bakekala kumatwa lya cishi ca bene Lubeni mucishi ca Bashani kuya mukushika akuSaleka kwicwe.

¹² Jowelo wakalinga mutanjilili munene, kuboolaawo nguShafamu, kuboolaawo nguJanayi, lyalo nkokwisa Shafati. Boonse aba bakalinga bamatanjilili ba shipani muBashani.

¹³ Bamatanjilili ba beshikamukowa wabo bamwi kweelana ashipani shabo mbaaba: Mikaeli, Meshulamu, Sheba, Joliya, Jakani, Siya alimwi aEba. Shipani shoonse shakalinga shosanwe ashobilo.

¹⁴ Bamulunyungu lwakwe Abiyaili mwanaakwe Uli, Uli mwanaakwe Jalowa, Jalowa mwanaakwe Gilyadi, Gilyadi mwanaakwe Mikaeli, Mikaeli mwanaakwe Jeshishayi, Jeshishayi mwanaakwe Jado, Jado mwanaakwe Busi mbaaba:

¹⁵ Ayi mwanaakwe Abudiyelo, mwishikulu wakwe Guni, uyo wakalinga mutanjilili wa cipani cabo.

¹⁶ Bene Gadi bakalinga kwikala mucishi ca Bashani alimwi aca Gilyadi, mumandabala a kooko amumafulo oonse a muShaloni.

¹⁷ Shintu ishi shakalembwa mumakani ngobakalemba kusansulula bamulunyungu mubwaami bwakwe Jotamu mwaami wa bene Juda abwakwe Jeloboamu mwaami wa bene Isilaeli.

Mikowa ya kwicwe lya Joodani ya bene Isilaeli mbobakakoma

¹⁸ Mumukowa wakwe Lubeni, Gadi alimwi amusa wa mukowa wakwe Manase mwakalinga bashilumamba bali 44,760, abo bakeeishikwa kabotu kulwanisha mayawo, mipeeni alimwi amata.

¹⁹ Bakaya mukulwana bene Agi, bene Jetu, bene Nafishi alimwi abene Nodabu.

²⁰ Bantu aba bakalinga kucinkite manungo muli Lesa, aboobo bakapaila kuli nguwe ayi abacaafwe. Lesa wakabacafwa akubalengesha kukoma bene Agi abaabo mbobakalinga kucafwanaabo.

²¹ Mpeeke bakabwesa ngamela shili 50,000, mbelele shili 250,000 alimwi ambongolo shili 2,000 kuswa kubene Agi. Bakatola busha abantu bali 100,000.

²² Bakacaya bene Agi baanji mukwiinga nkondo iyo yakalinga yakwe Lesa. Kuswawaawo bakekala mucishi ico kushikila ciindi ndibakatolwa busha kushishi shimwi.

Musa wa mukowa wakwe Manase

²³ Musa wa mukowa wa bene Manase wakaya mukwikala mucishi ca Bashani kuya mukushika kuBaali Emoni kumatwa, kuSeni alimwi akuKalundu ka Emoni. Bantu abo bakafula abuumbi.

²⁴ Bamatanjilili ba shipani shabo mbaaba: Efa, Ishi, Eliyelo, Asiliyelo, Jelemiya, Odafiya alimwi aJadiyelo. Boonse aba bakalinga bashilumamba beshinkusu alimwi bakalinga bamatanjilili ba shipani shabo bapukite abuumbi.

Mikowa ya kwicwe lya Joodani mboyakatolwa busha

²⁵ Nakubi boobo tebakalinga kushomeka kuli Lesa wa bamashali babo bakulukulu, bakamusuula akutalika kulambila balesa ba mishobo iyo Lesa njaakatanda mucishi ico.

²⁶ Lyalo Lesa wa bene Isilaeli wakalengesha Pulu mwaami wa bene Asilya uyo wakalinga kwiitwa ayi Tigilati Pilesa, kulwana cishi cabo. Wakatola busha boonse bamumukowa wakwe Lubeni, Gadi alimwi amusa wa mukowa wakwe Manase. Wakabatola kuAla, Abo, Aala alimwi amuya Mulonga wa Gosani uko nkobabete asunu.