1 Makani 29 - Baibo Busansulushi Bwa Libuku Ili

Shipo shakapekwa pakuyaka Ŋanda yakwe Lesa

¹ Mpomunyaawo mwaami Defedi wakaambila bantu boonse ayi, “Mwanaangu Solomoni uyo Lesa ngwaakasala ucili mwanike alimwi taana kuba alushibo. Mulimo uyu ngunene mukwiinga teshi kuyaka ŋanda ya bwaami ya muntu wa pacishi cino, sombi niŊanda ya Mwaami Lesa, Lesa wesu.

² Shintu shakuyakisha Ŋanda yakwe Lesa, Lesa wangu shoonse ndabamba. Ndabamba golodi, silifa, bulonse, sheela shilemulemu, mapulanga, mabwe amakwebo eetwa ayi Onikisi amabwe amwi a mishobo mishobo, mabwe akuyakisha alimwi amabwe aanji atuba.

³ Ono kwiilika pashintu shoonse nshindaamba, ndabenga silifa agolodi kuswa pabuboni bwangu mukwiinga walusuno ndooncite paŊanda yakwe Lesa, Lesa wangu.

⁴ Ndabenga makilogilamu a golodi wiine wiine ali 100,000 alimwi amakilogilamu a silifa wiine wiine ali 240,000 a kubotesha lubumbu lwa Ŋanda yakwe Lesa.

⁵ Pashintu shoonse isho ndeelikaawo asheesho bacishi shakupangapanga nsheshi bakapange. Ono ngani aumwi usuni kulibenga kuMwaami Lesa sunu mukumupa cipo amoyo woonse?”

⁶ Mpomunyaawo bamatanjilili ba bamumaandaabo, bacinenenene ba bene Isilaeli, bamatanjilili ba bashilumamba bali cuulu aba bali mwaanda, beshikweendelesha mulimo wa bwaami boonse bakapa cakulyaaba.

⁷ Shintu nshebakapa kumulimo wa kuŊanda yakwe Lesa nsheeshi: Makilogilamu a golodi ali 170,000, makilogilamu a silifa ali 340,000, makilogilamu a bulonse ali 620,000 alimwi amakilogilamu asheela shilemulemu ali 3,400,000.

⁸ Abalo bakalinga kucite mabwe amakwebo bakaapa kuŋanda yakusungilamo buboni bwa Ŋanda yakwe Lesa iyo yakalinga kweendeleshekwa aJeiyelo mwine Geshoni.

⁹ Bantu boonse bakasangalala abuumbi kubona bamatanjilili mbobakapa kuMwaami Lesa cakulyaaba alimwi camyoyo yoonse. Ncakwiila alakwe Defedi wakasangalala abuumbi.

Defedi mbwaakalumbaisha Lesa

¹⁰ Mpomunyaawo mwaami Defedi wakalumbaisha Mwaami Lesa kunembo lya bantu boonse ayi, “NoBaami baLesa, baLesa ba mushali wesu mukulukulu Jakobo, amulumbaishikwe kwalyoonse alyoonse!

¹¹ Nkusu, bulemu, bwaami abubotu, nshanu noBaami baLesa mukwiinga shintu shoonse shili kwiculu apacishi ca panshi nshanu. Ncakwiila bwaami mbwanu alimwi ndimwe mweendelesha shintu shoonse.

¹² Bubile abulemu shilaswa kuli ndimwe. Ndimwe mulela shintu shoonse. Nkusu shili mumaansaanu shakusumpula muntu akumuyumya.

¹³ Ono nobaLesa besu, twamulumba abuumbi akulumbaisha liina lyanu lyabulemu.

¹⁴ “Ono nceebonshi nebo abantu bangu nceenga twakondelwa ayi twamupa shipo ishi? Shintu shoonse shilaswa kuli ndimwe, aboobo twabooshabo shintu shili kale shaanu.

¹⁵ NoBaami baLesa mulishi kwaamba ayi mubuumi tuli anga mbeensu beendilite bweenka mbocakaba kubamashali besu bakulukulu. Inshiku shesu shili anga nshimfule shitokweenda alimwi lufu tatukoonshi kuluyuba.

¹⁶ NoBaami baLesa, baLesa besu, twabunganya bubile ubu buunji kwaamba ayi tuyake Ŋanda yanu mukulemeka liina lyanu lisalalite. Nakubi boobo bubile boonse ubu bwakaswa kuli ndimwe alimwi boonse mbwanu.

¹⁷ Ndishi kwaamba ayi mulabonabona mumoyo wa muntu uli woonse alimwi mulakondwa bantu bacite myoyo yakushomeka. Shintu shoonse ishi ndashipa cakulyaaba alimwi amoyo womwi. Ono bulya ndasangalala kubona abalo bantu banu baliiwo pano mbobapa cakulyaaba.

¹⁸ Ono noBaami baLesa, baLesa bakwe Abulaamu, Isaki alimwi aJakobo bamashali besu bakulukulu, lyoonse amulame kuyandishisha kuli mumyoyo yabo uku akulengesha ayi batolelele kushomeka kuli ndimwe.

¹⁹ Amupe Solomoni mwanaangu moyo wakulyaaba kuli ndimwe cakumaninina kwaamba ayi anookonkela milawo amilasho yanu yoonse akuyaka Ŋanda yanu iyo njendabambila kale shintu shoonse.”

²⁰ Kuswawaawo Defedi wakaambila bantu boonse ayi, “Amulumbaishe Mwaami Lesa, Lesa wanu!” Mpomunyaawo bantu boonse bakalumbaisha Mwaami Lesa, Lesa wa bamashali babo bakulukulu akufukama cakushisha shiwa panshi kunembo lya Mwaami Lesa alimwi amwaami wabo Defedi.

²¹ Bushiku bwakaboolaawo bantu bakabenga milambu imwi pantu pomwi amilambu yakutenta kuMwaami Lesa. Bakabenga bacende bali cuulu, mbelele shisankwa shili cuulu atwana twa mbelele tuli cuulu, pantu pomwi ashipo sha cakunwa. Bushiku ubo kwabengwa milambu iinji ceebo ca bene Isilaeli boonse.

²² Pabushiku ubo bantu boonse bakasangalala abuumbi ndibakalinga kulya akunwa kunembo lya Mwaami Lesa. Bakabooshaawo kwaambilisha ayi Solomoni mwanaakwe Defedi ngumwaami wabo akumunanika mafuta a bwaami pameenso akwe Lesa. Mpeeke bakananika aSadoki kuba mupailishi.

²³ Lyalo Solomoni wakapyana cuuna ca bwaami ca baishi baDefedi ico cakabapa Mwaami Lesa. Wakaswitilila mubwaami bwakwe alimwi bene Isilaeli boonse bakalinga kumunyumfwila.

²⁴ Bacinenenene boonse abashilumamba kubikaawo abana bakwe Defedi bakashomesha kunyumfwila Solomoni.

²⁵ Mwaami Lesa wakasumpula Solomoni abuumbi pameenso a bene Isilaeli boonse akumupa bulemu bwa bwaami ubo butana kubaawo kale pamwaami wa bene Isilaeli.

Mamanino a bwaami bwakwe Defedi

²⁶ Defedi mwanaakwe Jese wakalela cishi coonse ca Isilaeli

²⁷ kwamyaaka ili makumi one. MuEbuloni wakalela kwamyaaka yosanwe ayobilo amwalo muJelusalemu wakalela kwamyaaka makumi otatwe amyaaka yotatwe.

²⁸ Wakafwa kaali paciimo cakwiinga ayi wakalya weenkula, amyaaka imweelete kaalemekwa alimwi kaabilite. Solomoni mwanaakwe ngowakapyana bwaami bwakwe.

²⁹ Shintu shoonse shakacita Defedi mubwaami bwakwe shililembetwe mumakani akalemba balaluki botatwe, Samwelo, Natani alimwi aGadi.

³⁰ Makani ayo alaamba mbwaakalela, mbwaakalinga mwaami shinkusu, shintu shoonse shakacitika kuli nguwe, kubene Isilaeli alimwi akumalelo akalinga kumushingulukite.