1 Makani 28 - Baibo Busansulushi Bwa Libuku Ili

Milasho yakwe Defedi paŊanda yakwe Lesa

¹ Mwaami Defedi wakeeta bacinenenene bene Isilaeli boonse ayi babungane muJelusalemu. Wakeeta bamatanjilili ba mikowa, bamatanjilili ba makoto a beshikweendelesha mulimo wa bwaami, bamatanjilili ba bashilumamba bali cuulu aba bali mwaanda, beshikweendelesha buboni boonse ashifubwa shoonse sha mwaami abana bakwe, bacinenenene ba kuŋanda ya bwaami, basankwa bapukite alimwi abashilumamba boonse batacite boowa.

² Defedi wakeemikana kunembo lyabo akubaambila ayi, “Nobene misheesu, amunkutike. Ndalinga kusuni kuyaka ŋanda yakukalikamo Libokoshi lya Cipangano, ilyo lili mpopakulyata myeendo pakwe Lesa wesu. Ndakalibambila ashiyandika kwaamba ayi njake Ŋanda yakumulambililaamo.

³ Sombi Lesa wakaŋambila ayi, ‘Teshi ndiwe weelete kunjakila Ŋanda, mukwiinga uli shilumamba uyo wakatila bulowa.’

⁴ “Mwaami Lesa, Lesa wa bene Isilaeli, wakasala ndime abamulunyungu lwangu kwaamba ayi noolela cishi ca Isilaeli kwalyoonse. Wakasala bamukowa wakwe Juda ayi kababatanjilila. Lyalo mumukowa wakwe Juda wakasala bamuŋanda ya bata. Pabamuŋanda ya bata cakamukonda kubika ndime pabwaami bwa bene Isilaeli.

⁵ Mwaami Lesa wakampa baana basankwa baanji. Kuswa pali mbabo wakasala Solomoni kwaamba ayi akalele cishi ca Isilaeli, bwaami bwa Mwaami Lesa.

⁶ “Mwaami Lesa wakaŋambila ayi, ‘Solomoni mwanaako ngweshi akanjakile Ŋanda. Ndamusala ayi abe mwanaangu, anebo ndaakuba baishi.

⁷ Ndaakulengesha bwaami bwakwe ayi bukanooliikobo lyoonse alyoonse na akatolele kukonkela milawo amilasho yangu yoonse bweenka mbwaatoocita bulya.’

⁸ “Ono bulya nobantu ba Mwaami Lesa, pameenso akwe Lesa wesu alikoto lyanu ili nobene Isilaeli, ntoomukonkomesha ayi munookonkela milasho yoonse iyo Mwaami Lesa, Lesa wesu njaakatupa kwaamba ayi cishi ici cibotu cikatolelele kunooli caanu alimwi mukacishiile abamulunyungu lwanu ayi ncabo kwalyoonse alyoonse.”

⁹ Lyalo Defedi wakaambila Solomoni ayi, “Ono webo omwanaangu, ndakukonkomesha kwaamba ayi unoonyumfwila Lesa wa baiso akumulambila camoyo woonse amiyeeyo yoonse. Ceebo Mwaami Lesa ulishi miyeeyo yesu yoonse acitulengesha kuyeeya boobo. Na wasandukila kuli nguwe, ulaakukutambula, sombi na ukamufutatile, ulaakukusuula kwalyoonse alyoonse.

¹⁰ Ulyeelete kwishiba ayi Mwaami Lesa wakakusala ayi ukayake Ŋanda yakwe isalalite. Ono yaka! Wiiyake cakutatyongola.”

¹¹ Defedi wakapa Solomoni miyeeyo yoonse bwakuyaka shipinda shoonse sha muŊanda yakwe Lesa, nkokwaamba ayi shipinda shakusungilamo shintu, shipinda shimwi shoonse kubikaawo acipinda ca Musena Usalalite Wiindaawo umo mulekelelelwa shibiibi.

¹² Wakamupa amiyeeyo yoonse njaakalinga kucite bwakupanga mansa sha Ŋanda yakwe Lesa alimwi aya maanda ashingulukite imansa isho, ŋanda yakusungilamo shisebensesho sha muŊanda yakwe Lesa ayakusungilamo shipo shakabengwa kuMwaami Lesa.

¹³ Defedi wakamulwiita abwakupansaanya bapailishi abene Lefi mumakoto, bwakucita milimo ya muŊanda yakwe Lesa alimwi abwakubamba kabotu shintu shisebenseshekwa pakulambila.

¹⁴ Wakamulwiita kulema kwa golodi asilifa ngwaaelete kusebensesha pakupanga shisebensesho sha muŊanda yakwe Lesa.

¹⁵ Shisebensesho isho ngamalampi, shakubikaawo malampi ayo,

¹⁶ matebulu a silifa alimwi amatebulu a golodi apo pakubika shimaande shakapekwa kuli Lesa.

¹⁷ Wakamulwiita kulema kwa golodi wiine wiine weelete kusebenseshekwa pakupanga shakusubushako nyama, mbale shifongomene, nkomeshi akulema kwa silifa agolodi weelete kusebenseshekwa pakupanga mbale.

¹⁸ Wakamulwiita kulema kwa golodi wiine wiine wa kucipaililo ca tununkila kabotu pakutenta alimwi awa kucikoci ca bakelebu abo bacite mapapaminwa afwekelesha Libokoshi lya Cipangano ca Mwaami Lesa.

¹⁹ Mpeeke Defedi wakaamba ayi, “Shoonse ishi shililembetwe kweelana amilasho ya Mwaami Lesa iyo njaakandwiita.”

²⁰ Mwaami Defedi wakaambila Solomoni mwanaakwe ayi, “Ulyeelete kuyuma akulishoma alimwi ukacite mulimo uyo. Utakaloondi nabi kutyongola mukwiinga Mwaami Lesa, Lesa wangu, uli awebo. Teshi akakulekelesheewo, sombi ulaakunooli awebo kushikila ukamanishe kuyaka Ŋanda yakwe.

²¹ Makoto a bapailishi abene Lefi alilibambite kucita mulimo uyu wa muŊanda yakwe Lesa. Bayaki abacishi shakupangapanga shipusenepusene boonse balilibambite kukucafwa mumulimo uyu woonse. Bacinenenene boonse pantu pomwi abantu bamwi boonse balaakunoonyumfwila shoonse nsheenga waamba.”