1 Makani 27 - Baibo Busansulushi Bwa Libuku Ili

Makoto a bashilumamba

¹ Uyu ngumundando wa bamatanjilili ba bamumaanda, bamatanjilili ba bashilumamba bali cuulu aba bali mwaanda abamatanjilili ba bashilumamba babo bamwi, abo bakalinga kusebensela mwaami mukweendelesha shamakoto a bashilumamba ayo akalinga kuba pabulishi, mweenshi amweenshi mumwaaka oonse. Likoto lyomwi alyomwi lyakalinga kucite basankwa bali 24,000.

² Mutanjilili wa likoto lyakalinga kuba pabulishi mumweenshi utaanshi nguJashobeyamu mwanaakwe Sabudyelo.

³ Jashobeyamu uyo wakalinga wamulunyungu lwakwe Pelesi alimwi wakalinga mutanjilili wa bamatanjilili boonse ba bashilumamba mumweenshi uyo.

⁴ Wakalinga mutanjilili wa likoto mumweenshi wabili nguDodayi mwine Awowi. Wakalinga kumukonkela nguMikiloti.

⁵ Mutanjilili watatu wa bashilumamba pabulishi bwa mweenshi watatu nguBenaya mwanaakwe Jeoiyada mupailishi.

⁶ Uyu ngoBenaya wakalinga mutanjilili wa bashilumamba balya bakalinga kwiitwa ayi Makumi Otatwe. Amisabadi mwanaakwe ngowakapyana musena wa baishi.

⁷ Mutanjilili wane wa bashilumamba pabulishi bwa mweenshi wane wakalinga nguAsayelo mukwabo Joabu. Sebadiya mwanaakwe ngowakapyana musena wakwe.

⁸ Mutanjilili wasanu pabulishi bwa mweenshi wasanu ngumutanjilili wa bashilumamba, Shamuti wamulunyungu lwakwe Isa.

⁹ Mutanjilili wasanu awomwi pabulishi bwa mweenshi wasanu awomwi nguIla mwanaakwe Ikeshi mwine Tekowa.

¹⁰ Mutanjilili wasanu abobilo pabulishi bwa mweenshi wasanu ayobilo nguElesi mwine Efuleemu kuswa kuPeloni.

¹¹ Mutanjilili wasanu abotatwe pabulishi bwa mweenshi wasanu ayotatwe nguSibekayi wa kuUsha uyo wakalinga wamucipani cakwe Sela.

¹² Mutanjilili wasanu abone pabulishi bwa mweenshi wasanu ayone nguAbiyesa mwine Benjameni wa kuAnatoti.

¹³ Mutanjilili walikumi pabulishi bwa mweenshi walikumi nguMaalayi wa kuNetofa uyo wakalinga wamucipani cakwe Sela.

¹⁴ Mutanjilili walikumi awomwi pabulishi bwa mweenshi walikumi awomwi nguBenaya wa kuPilatoni mucishi ca bene Efuleemu.

¹⁵ Mutanjilili walikumi abobilo pabulishi bwa mweenshi walikumi ayobilo nguEludayi wa kuNetofa uyo wakalinga wamucipani cakwe Otiniyelo.

Bacinenenene ba mikowa ya bene Isilaeli

¹⁶ Uyu ngumundando wa bacinenenene ba mikowa ya bene Isilaeli. Mumukowa wakwe Lubeni, nguEliyesa mwanaakwe Sikili. Mumukowa wakwe Simyoni, nguShefatiya mwanaakwe Maaka.

¹⁷ Mumukowa wakwe Lefi, nguAshabiya mwanaakwe Kemuwelo. Mumukowa wakwe Aloni nguSadoki.

¹⁸ Mumukowa wakwe Juda, nguEliyu mwanaakwe Defedi. Mumukowa wakwe Isaka, nguOmuli mwanaakwe Mikaeli.

¹⁹ Mumukowa wakwe Sebuluni, nguIshimaya mwanaakwe Obadiya. Mumukowa wakwe Nafutali, nguJelimoti mwanaakwe Asiliyelo.

²⁰ Mumukowa wakwe Efuleemu, nguOsheya mwanaakwe Asasiya. Mumusa wa mukowa wakwe Manase, nguJowelo mwanaakwe Pedaya.

²¹ Mumusa wa mukowa wakwe Manase wa mucishi ca Gilyadi, nguIdo mwanaakwe Sekaliya. Mumukowa wakwe Benjameni, nguJaasiyelo mwanaakwe Abina.

²² Mumukowa wakwe Dani, nguAsalelo mwanaakwe Jeloamu. Anu ubo bacinenenene ba mikowa ya bene Isilaeli mbobakalinga.

²³ Mwaami Defedi taakwe kubelenga bantu bakalinga kucite myaaka makumi obilo akwisa panshi mukwiinga Mwaami Lesa wakabashomesha ayi ulaakufusha bene Isilaeli anga ninyenyeenshi mwiculu.

²⁴ Joabu mwanaakwe Seluiya wakalinga watalika kubelenga basankwa, sombi taakwe kumanisha. Lesa wakapa mulandu bene Isilaeli ceebo cakubelenga. Aboobo mweelo wa bantu tookwe kulembwaawo muLibuku lya buumi bwakwe Defedi.

Beshikweendelesha shintu sha mwaami

²⁵ Asimafeti mwanaakwe Adiyelo wakalinga kweendelesha maanda akusungilamo shintu a kubwalo. Jonasani mwanaakwe Usiya wakalinga kweendelesha maanda amwi akusungilamo shintu ayo akalinga mumandabala, mumishi alimwi amumaanda alaamfu a beshikulindilila.

²⁶ Esili mwanaakwe Kelubu wakalinga kweendelesha basebenshi ba kumyuunda.

²⁷ Shimeyi wa kuLama wakalinga kweendelesha myuunda ya minyansa. Sabudi wa kuShifamu wakalinga kweendelesha shakulama waini akuusunga.

²⁸ Baali Anani wa kuGeda wakalinga kweendelesha muunda wa shisamu sha maolifi asha nkuyu munshaatulundu, kumbo. Joashi wakalinga kweendelesha shakulama mafuta a olifi.

²⁹ Shitilayi wa kuShaloni wakalinga kweendelesha ŋombe shakalinga kulita kuShaloni. Shafati mwanaakwe Adilayi wakalinga kweendelesha ŋombe shakalinga kulita kushinyika.

³⁰ Obili mwine Ishimaeli wakalinga kweendelesha ngamela. Jedeiya mwine Melonoti wakalinga kweendelesha mbongolo.

³¹ Jasisi mwine Agi wakalinga kweendelesha mbelele ampongo. Anu aba mbobakalinga bacinenenene bakalinga kweendelesha shintu sha mwaami Defedi.

Bakalinga kupanda maano mwaami Defedi

³² Jonasani ishi Defedi umwi wakalinga shikupanda maano musongo alimwi wakalinga mulembi. Lakwe aJeiyelo mwanaakwe Akimoni bakalinga kwiisha bana bakwe Defedi basankwa.

³³ Shikupanda Defedi maano mutaanshi nguAitofelo. Umwi nguUshayi mwine Aki uyo kumwi wakalinga mubye mwaami.

³⁴ Aitofelo ndyaakafwa wakapyana musena wakwe nguJeoiyada mwanaakwe Benaya alimwi aAbiyata. Joabu wakalinga mutanjilili wa bashilumamba ba mwaami.