1 Makani 26 - Baibo Busansulushi Bwa Libuku Ili

Beshikulindilila minjililo ya Ŋanda yakwe Lesa

¹ Aya akalinga makoto a beshikulindilila minjililo ya Ŋanda yakwe Lesa. Kuswa mucipani cakwe Kola kwakalinga Meshelemiya mwanaakwe Kole uyo wakalinga mwanaakwe Asafu.

² Meshelemiya wakashala baana basankwa bosanwe abobilo, nkokwaamba ayi Sekaliya wakwiiya, kuboolaawo nguJediayelo, kuboolaawo nguSebadiya, kuboolaawo nguJatiniyelo,

³ kuboolaawo nguElamu, kuboolaawo nguJeowanani, wakweelaako nguEliyeoyenayi.

⁴ Kwakalinga aObedi Edomu uyo Lesa ngwaakapa coolwe mukumupa baana basankwa bosanwe abotatwe, nkokwaamba ayi Shemaya wakwiiya, kuboolaawo nguJeosobadi, kuboolaawo nguJowa, kuboolaawo nguSaka, kuboolaawo nguNetanelo,

⁵ kuboolaawo nguAmiyelo, kuboolaawo nguIsaka, wakweelaako nguPeyuletayi.

⁶ Shemaya mwanaakwe Obedi Edomu musankwa wakwiiya wakashala baana bosanwe awomwi abo bakalinga bamatanjilili ba bamumaandaabo mukwiinga bakalinga bantu beelete.

⁷ Bana bakwe Shemaya nguOtini, Lafayeli, Obedi, Elisabadi, Eliyu alimwi aSemakiya.

⁸ Boonse aba bakalinga bamulunyungu lwakwe Obedi Edomu. Bantu aba pantu pomwi abana babo alimwi abeshikamukowa babo abo bakalinga bantu beelete kulindilila minjililo. Bamulunyungu lwakwe Obedi Edomu boonse bakalinga 62.

⁹ Bamulunyungu lwakwe Meshelemiya abo bakalinga bantu beelete kupekwa mulimo uyo bakalinga 18.

¹⁰ Kucipani cakwe Melali kwakaswa Osa uyo wakashala baana bone, nkokwaamba ayi Shimuli uyo baishi ngobakapa bunenebantu nabi teshi ngowakalinga wakwiiya,

¹¹ kuboolaawo nguIlikiya, kuboolaawo nguTebaliya, wakweelaako nguSekaliya. Bamulunyungu lwakwe Osa abo bakalinga beshikulindilila minjililo boonse bakalinga 13.

¹² Beshikulindilila minjililo ya Ŋanda yakwe Lesa bakabapansaanya mumakoto makoto bweenka mbuli mbobakashalwa. Bakapekwa milimo imwi muŊanda yakwe Lesa bweenka bwakapekwa bene Lefinyinaabo.

¹³ Bamuŋanda aŋanda, baanji nabi baniini, bakooma cisolo kwaamba ayi babone mwinjililo ngweshi banoolindilila.

¹⁴ Cisolo ca mwinjililo wakwicwe, cakawita Shelemiya. Lyalo cakoomwa pali Sekaliya mwanaakwe uyo wakalinga shikupanda maano mubotu. Lakwe wakawitwa cisolo ca mwinjililo wakumatwa.

¹⁵ Obedi Edomu wakawitwa cisolo ca mwinjililo wakumalenge. Mpeeke cisolo cakulindilila maanda akusungilamo shintu cakawita bana bakwe basankwa.

¹⁶ Cisolo ca mwinjililo wakumbo aca mwinjililo wa Shaleketi pamukwakwa wa peculu shakawita Shupimu aOsa. Beshikulindilila minjililo bakalinga kupaana malishi.

¹⁷ Kulubasu lwakwicwe beshikulindilila bakalinga kuba bosanwe awomwi akwalo kumatwa bone, kumalenge bone. Kumaanda akusungilamo shintu bakalinga kubikaako bone, nkokwaamba ayi bantu bobilo kuŋanda yomwi yomwi.

¹⁸ Pafwaafwi alubansa lwakumbo pakalinga beshikulindilila bone munshaanshila, bobilo mulubansa lwiine.

¹⁹ Anu aya ngwaakalinga makoto abeshikulindilila minjililo ya Ŋanda yakwe Lesa bamulunyungu lwakwe Kola alwakwe Melali.

Milimo imwi ya kuŊanda yakwe Lesa

²⁰ Bene Lefinyinaabo bamwi bakalinga kulama ŋanda yakusungilamo buboni muŊanda yakwe Lesa akulama maanda akusungilamo shintu shimwi isho shakalinga kubengwa kuli Lesa.

²¹ Ladani womwi pabana bakwe Geshoni wakalinga mushali wa makoto a mushipani shabo shiinji kubikaawo abamuŋanda yakwe Jeiyeli mwanaakwe.

²² Bana bakwe Ladani basankwa bamwi bobilo, Setamu aJowelo bakalinga kulama ŋanda yakusungilamo buboni muŊanda yakwe Lesa amaanda akusungilamo shintu shamakwebo.

²³ Lyalo kwakalinga milimo imwi yakapekwa bamulunyungu lwa bene Amulamu, bene Isa, bene Ebuloni alwa bene Usiyelo.

²⁴ Shubayelo wamulunyungu lwakwe Geshomu mwanaakwe Mose wakalinga wacinenenene wa beshikulindilila ŋanda yakusungilamo buboni muŊanda yakwe Lesa.

²⁵ Bana bakwe Eliyasa bamakwabo Shelomiti nguLeyabiya, Jeshaya Jolamu alimwi aSikili.

²⁶ Shelomiti abeshikamukowa wakwe boonse bakalinga kulama maanda akusungilamo shintu shoonse shakabengwa kuli Lesa. Shintu isho shakabengwa amwaami Defedi, bamatanjilili ba bamumaanda abo bakalinga bamatanjilili ba bantu bali cuulu aba bali mwaanda alimwi abamatanjilili bamwi ba bashilumamba.

²⁷ Bakabwesa shintu nshebakasaala munkondo akushibenga kuli Lesa ayi shikasebenseshekwe muŊanda yakwe Lesa.

²⁸ Lakwe Shelomiti abamulunyungu lwakwe bakalinga kulama shintu shoonse isho shakabengwa kubikwaawo ashipo isho shakaleta mulaluki Samwelo, mwaami Saulo mwanaakwe Kishi, Abina mwanaakwe Neli alimwi aJoabu mwanaakwe Seluiya.

Milimo ya bene Lefi bamwi

²⁹ Kuswa pabamulunyungu lwakwe Isa, Kenaniya abana bakwe bakasalwa kuba bacinenenene aboomboloshi pakati ka bene Isilaeli. Balo tebakalinga kusebensa muŊanda yakwe Lesa.

³⁰ Kuswa pabamulunyungu lwakwe Ebuloni, Ashabiya abamulunyungu lwakwe bali 1,700, basankwa bacibwene mumulimo, bakasalwa kweendelesha shakulambila shoonse alimwi ashacishi muIsilaeli kulubasu lwa kumbo lya Joodani.

³¹ Jeliya wakalinga mutanjilili wa bamulunyungu lwakwe Ebuloni kweelana amakani akalinga kusansulula bamulunyungu lwabo. Mumwaaka wamakumi one wa bwaami bwakwe Defedi, bakayandoola mumakani akalembwa ayo akucana ayi bashilumamba bacibwene, bakalinga kwikala muJasa mucishi ca Gilyadi.

³² Mwaami Defedi wakasala bamatanjilili bacibwene ba bamumaandaabo bali 2,700 kuswa kubeshikamukowa bakwe Jeliya. Mpeeke bakababika mumulimo wakweendelesha shakulambila shoonse ashacishi muIsilaeli kulubasu lwakwicwe lya Joodani. Bakalinga kucita mulimo wabo pakati ka mukowa wakwe Lubeni, Gadi alimwi amusa wa mukowa wakwe Manase.