1 Makani 25 - Baibo Busansulushi Bwa Libuku Ili

Beshikwiimba mbobakabikwa

¹ Mwaami Defedi abacinenenene ba Ŋanda yakwe Lesa bakasala cipani cakwe Asafu, Emani acakwe Jedutuni pakati ka bene Lefi kutanjilila mulimo wakulambila Mwaami Lesa. Bakasalwa ayi banokwiimba shabulaluki mukusebensesha tulumbu tunene atuniini alimwi atusenke twakulisha. Meena a bantu aba ngaaya:

² Bana bakwe Asafu bakalinga bone, nkokwaamba ayi Saku, Josefu, Netaniya alimwi aAshayela. Aba bakalinga kutanjililwa aAsafu uyo wakalinga kwiimba shabulaluki lyoonse na mwaami waamba.

³ Bana bakwe Jedutuni bakalinga bosanwe awomwi, nkokwaamba ayi Gedaliya, Seli, Jeshaya, Shimeyi, Ashabiya alimwi aMatitiya. Aba bakalinga kutanjililwa aJedutuni ishiwabo uyo wakalinga kwiimba shabulaluki akusebensesha kalumbu mukulumba akulumbaisha Mwaami Lesa.

⁴ Bana bakwe Emani bakalinga likumi abone, nkokwaamba ayi Bukiya, Mataniya, Usiyelo, Shebuwelo, Jelimoti, Ananiya, Anani, Eliyata, Gidaluti, Lomamuti, Esa, Joshibekasha, Maloti, Ota alimwi aMaasiyoti.

⁵ Lesa wakapa Emani mulaluki wa mwaami, baana aba bakalinga likumi abone abaana banakashi botatwe, bweenka mbwaakalinga washomesha kupa Emani bulemu.

⁶ Bana bakwe boonse bakalinga kutanjililwa abamashali babo basankwa mukulisha tusenke atulumbu tunene atuniini pakulambila muŊanda yakwe Lesa. Asafu, Jedutuni alimwi aEmani balo bakalinga kutanjililwa amwaami Defedi.

⁷ Bantu abo pantu pomwi abaimbinyinaabo bakalinga 288. Boonse bakalinga beshikulisha bakeeishikwa kabotu kulisha nyimbo sha Mwaami Lesa.

⁸ Pakupekwa mulimo aba bantu boonse banike nabi banene, bacishi kale nabi batootalika, boonse bakalinga kusalwa kwiinda mukuuma cisolo.

^9-31 Ono abo bali 288 bakababika mumakoto ali makumi obilo aone kweelana amaandaabo. Mulikoto lyomwi alyomwi mwakalinga kuba bantu likumi abobilo kubikaawo amutanjilili. Anu mbulya mundando wa malishi abo mbowakalinga. 1. Josefu wamuŋanda yakwe Asafu 2. Gedaliya 3. Saku 4. Seli 5. Netaniya 6. Bukiya 7. Ashayela 8. Jeshaya 9. Mataniya 10. Shimeyi 11. Usiyelo 12. Ashabiya 13. Shebuwelo 14. Matitiya 15. Jelimoti 16. Ananiya 17. Joshibekasha 18. Anani 19. Maloti 20. Eliyata 21. Otili 22. Gidaluti 23. Maasiyoti 24. Lomamuti Esa.