1 Makani 24 - Baibo Busansulushi Bwa Libuku Ili

Mulimo wakapekwa bapailishi

¹ Ono aya ngomakoto a bamulunyungu lwakwe Aloni. Aloni wakashala baana bone, nkokwaamba ayi, Nadabu, Abiyu, Eliyasa alimwi aItama.

² Nadabu aAbiyu bakafwa baishiwabo kabatana, alimwi balo tabakwe kushiyaawo baana. Lyalo Eliyasa aItama bamakwabo bakaba bapailishi.

³ Lyalo mwaami Defedi wakabamba bamulunyungu lwakwe Aloni akubabika mumakoto kweelana amilimo yabo. Wakacafwa Defedi kucita boobo nguSadoki wamulunyungu lwakwe Eliyasa alimwi aAimeleki wamulunyungu lwakwe Itama.

⁴ Pabamulunyungu lwakwe Eliyasa pakapangwa makoto ali likumi aosanwe alyomwi. Pabamulunyungu lwakwe Itama pakapangwa makoto ali osanwe aotatwe. Cakaba boobo mukwiinga bamatanjilili ba bamulunyungu lwakwe Eliyasa bakalinga baanji kwiinda bakwe Itama.

⁵ Wakabapansaanya cakutasalulula kwiinda mukuuma cisolo ceebo pakalinga bacinenenene ba Ŋanda yakwe Lesa alimwi abeshikutanjilila shakulambila pabamulunyungu lwakwe Eliyasa abakwe Itama.

⁶ Mpeeke Shemaya mulembi mwanaakwe Netanelo wakalemba meenaabo pameenso a mwaami, bacinenenene, Sadoki mupailishi, Aimeleki mwanaakwe Abiyata alimwi abamatanjilili ba bamumaanda a bapailishi alimwi abene Lefi. Cisolo cakalinga kuuma koonse koonse, nkokwaamba ayi ŋanda yomwi pabamulunyungu lwakwe Eliyasa, ŋanda yomwi pabakwe Itama.

^7-18 Ono mbulya makoto ayo a bamumaandaabo mbwaakapekwa milimo. 1. Jeoiyalibu 2. Jedaya 3. Alimu 4. Seolimu 5. Malukija 6. Mijamini 7. Akosi 8. Abija 9. Jeshuwa 10. Shekaniya 11. Eliyashibu 12. Jakimu 13. Upa 14. Jeshebeyabu 15. Biliga 16. Ima 17. Esili 18. Apisesi 19. Petaiya 20. Jeesekelo 21. Jakini 22. Gamulu 23. Delaya 24. Maasiya

¹⁹ Anu mboboobo bantu aba mbobakalinga kukonkelana mumundando wa milimo yabo muŊanda yakwe Lesa. Milimo iyo bakalinga kwiicita kweelana amilasho yakaamba Aloni mushali wabo mukulukulu iyo alakwe njaakalwiitikwa kuMwaami Lesa, Lesa wa bene Isilaeli.

Bene Lefi bamwi boonse

²⁰ Bamulunyungu lwakwe Lefi bamwi mbaaba: Kuswa kubana bakwe Amulamu nguShebuwelo. Kuswa kubana bakwe Shebuwelo nguJedeiya.

²¹ Kuswa kubana bakwe Leyabiya nguIshiya wakwiiya.

²² Kuswa kubana bakwe Isa nguShelomoti. Kuswa kubana bakwe Shelomoti nguJaati.

²³ Ebuloni wakashala baana bone, nkokwaamba ayi Jeliya wakwiiya, kuboolaawo nguAmaliya, kuboolaawo nguJaasiyelo wakweelaako nguJekameyamu.

²⁴ Usiyelo wakashala Mika. Kuswa kubana bakwe Mika nguShamiya.

²⁵ Ishiya wakalinga mukwabo Mika. Kuswa kubana bakwe Ishiya nguSekaliya.

²⁶ Melali wakashala baana basankwa botatwe, nkokwaamba ayi Maali, Mushi alimwi aJaasiya.

²⁷ Jaasiya wakashala baana basankwa botatwe, nkokwaamba ayi Shoamu, Saku alimwi aIbili.

²⁸ Kuswa kuli Maali nguEliyasa uyo utakwe kushalawo mwaana musankwa.

²⁹ Kuswa kuli Kishi nguJelamiilu mwanaakwe Kishi.

³⁰ Mushi wakashala baana basankwa botatwe, nkokwaamba ayi Maali, Eda alimwi aJelimoti. Aba mbobakalinga bamulunyungu lwakwe Lefi kweelana amaandaabo.

³¹ Abalo bakooma cisolo bweenka bwakacita bamakwababo bamulunyungu lwakwe Aloni pameenso a mwaami Defedi, bacinenenene, Sadoki mupailishi, Aimeleki mwanaakwe Abiyata alimwi abamatanjilili ba bamumaanda a bapailishi alimwi abene Lefi. Bamuŋanda ya mwanikebantu bakapekwa mulimo bweenka bwakapekwa bamuŋanda ya munenebantu.