1 Makani 23 - Baibo Busansulushi Bwa Libuku Ili

¹ Defedi ndyaakacembela bunene wakabika Solomoni mwanaakwe pabwaami bwa bene Isilaeli.

Mulimo wa bene Lefi

² Defedi wakabunganya bamatanjilili ba bene Isilaeli kubikaawo abapailishi boonse alimwi abene Lefi.

³ Bene Lefi basankwa bakabelengwa bakalinga kucite myaaka makumi otatwe akuya peculu. Pantu pomwi bakalinga 38,000.

⁴ Mwaami Defedi wakasala bantu bali 24,000 kwaamba ayi banokweendelesha mulimo wakuyaka Ŋanda yakwe Lesa. Wakasala abamwi bali 6,000 ayi bakabe bacinenenene aboomboloshi.

⁵ Bamwi bali 4,000 wakabasala ayi babe beshikulindilila minjililo abamwi bali 4,000 ayi babe beshikulumbaisha Mwaami Lesa, mukusebensesha shakulisha pakwiimba isho shakabapa mwaami ceebo ca mulimo uyu.

⁶ Defedi wakapansaanya bene Lefi mumakoto otatwe kweelana ashipani shabo nkokwaamba ayi Geshomu, Koati alimwi aMelali.

⁷ Geshomu wakashala baana basankwa bobilo, Ladani alimwi aShimeyi.

⁸ Ladani wakashala baana basankwa botatwe, nkokwaamba ayi Jeiyelo, Setamu alimwi aJowelo.

⁹ Aba boonse bakalinga bamatanjilili ba mushipani shakwe Ladani. Shimeyi wakashala baana basankwa botatwe, nkokwaamba ayi Shelomoti, Asiyelo alimwi aAlani.

¹⁰ Pesule Shimeyi wakashala baana basankwa abamwi bone, nkokwaamba ayi Jaati, Sisa, Jeyushi alimwi aBeliya.

¹¹ Mutaanshi kushalwa nguJaati kuboolaawo nguSisa, sombi Jeyushi aBeliya tabakwe kushalawo baana baanji, paceebo ceeco bakabelengwa ayi ncipani comwi akupekwa mulimo womwi.

¹² Koati wakashala baana basankwa bone, nkokwaamba ayi Amulamu, Isa, Ebuloni alimwi aUsiyelo.

¹³ Amulamu munenebantu wakashala Aloni alimwi aMose. Aloni abamulunyungu lwakwe bakapekwa mulimo wakulama shintu shisalalite lyoonsebo, kubenga milambu kunembo lya Mwaami Lesa, kumusebensela alimwi akupa shoolwe bantu muliina lyakwe kwalyoonse alyoonse.

¹⁴ Ono bana bakwe Mose, muntu wakwe Lesa, bakabelengelwa kubene Lefi.

¹⁵ Mose wakashala baana basankwa bobilo, Geshomu alimwi aEliyesa.

¹⁶ Munene pabana bakwe Geshomu nguShebuwelo.

¹⁷ Eliyesa wakashala mwana musankwa womwi, Leyabiya. Leyabiya wakalinga kucite bamulunyungu lwakwe baanji baanji.

¹⁸ Isa mwanaakwe Koati wabili wakashala mwaana wakwiiya musankwa Shelomiti.

¹⁹ Ebuloni mwanaakwe Koati watatu wakashala baana basankwa bone, nkokwaamba ayi Jeliya, Amaliya, Jeyasiyelo alimwi aJekameyamu.

²⁰ Usiyelo mwanaakwe Koati wane wakashala baana bobilo, Mika aIshiya.

²¹ Melali wakashala baana basankwa bobilo, Maali aMushi. Maali alakwe wakashala baana basankwa bobilo, Eliyasa aKishi.

²² Eliyasa wakafwa cakubula kushalawo mwaana musankwa, sombi wakashalabo baana banakashi. Bana bakwe banakashi bakeebwa kubana bakwe Kishi.

²³ Mushi mwanaakwe Melali wabili wakashala baana basankwa botatwe, nkokwaamba ayi Maali, Eda alimwi aJelemoti.

²⁴ Aba mbobakalinga bamulunyungu lwakwe Lefi mucipani acipani, ŋanda aŋanda. Womwi awomwi wakalembwa liina. Bamulunyungu lwakwe womwi awomwi uyo wakalinga kucite myaaka makumi obilo akuya peculu, bakapekwa mulimo muŊanda yakwe Lesa.

²⁵ Ceebo Defedi wakaamba ayi, “Mwaami Lesa, Lesa wa bene Isilaeli wapa luumuno kubantu bakwe alimwi lakwe mwiine ulanookala muJelusalemu lyoonse alyoonse.

²⁶ Aboobo bene Lefi tabeelete kunoonyamuna Tente ya Cipangano ashintu shimwi shoonse shisebenseshekwa pakulambila Lesa.”

²⁷ Kweelana amulasho wakweelaako wakwe Defedi, bene Lefi bakalinga kulembwa na bakwanisha myaaka ili makumi obilo.

²⁸ Milimo ya bene Lefi yakalinga yakucafwa bamulunyungu lwakwe Aloni mukucita shiyandika muŊanda yakwe Lesa mbuli kulama mumansa sha Ŋanda yakwe Lesa, kubona maanda ashinguluka Ŋanda yakwe Lesa, kusalasha shintu shoonse shakwe Lesa akucita milimo imwi muŊanda yakwe Lesa.

²⁹ Bakalinga kulama shimaande shakalinga kubengwa kuli Lesa, akubona fulaulo wakusebensesha mushipo shakalinga kupekwa kuli Lesa, shimaande shipampamene, shipo shakapangilwa mucitofu, fulaulo uyo usenkene amafuta a olifi alimwi akunoopima kulema akufula kwa sheesho shoonse shakalinga kubengwa muŊanda yakwe Lesa.

³⁰ Bakalinga kulemeka akulumbaisha Mwaami Lesa lyoonse macuunsa amacolesha

³¹ alimwi apakubenga milambu yakutenta kuMwaami Lesa pabushiku bwakookesha bwa Cibelu, pabushiku bwa Mweenshi Upya anshiiku shimwibo shakusekelela. Milasho yakapangwa kusansulula mweelo wa bene Lefi beelete kusebensa ciindi aciindi. Bene Lefi bakapekwa mulimo wakulambila Mwaami Lesa ciindi coonse.

³² Anu mboboobo bene Lefi mbobakalinga kusebensa muTente ya Cipangano alimwi amuŊanda yakwe Lesa. Bakalinga kucafwa bamakwababo abo bakalinga bamulunyungu lwakwe Aloni mumulimo wakulambila muŊanda yakwe Lesa.