1 Makani 22 - Baibo Busansulushi Bwa Libuku Ili

¹ Mpomunyaawo Defedi wakaamba ayi, “Apa peenka mpeshi pakabe Ŋanda yakwe Lesa pantu pomwi acipaililo ca milambu yakutenta ya bene Isilaeli boonse.”

Kulibambila kuyaka Ŋanda yakwe Lesa

² Kuswawaawo mwaami Defedi wakaambilisha kubaswamashi abo bakalinga kwikala mucishi ca Isilaeli kwaamba ayi babungane akubapa ncito. Pakati kabo wakasalaawo beshikubesa mabwe akuyakisha Ŋanda yakwe Lesa.

³ Wakaleta sheela shilemulemu shiinji shakupangisha misomaali alimwi asheela shakucatisha shisasa sha kuminjililo. Wakaleta abulonse uunji utakonsheki kupimwa.

⁴ Wakaambila bene Sidoni abene Taya kuleta mapulanga a shisamu sha sida aanji abuumbi.

⁵ Lyalo Defedi wakayeeya ayi, “Ŋanda yakwe Lesa iyo mwanaangu Solomoni njeshi akayake ilyeelete kubota abuumbi alimwi ikankamika bamucishi coonse ca panshi. Sombi mwanaangu ucili mwanike alimwi taana kuba alushibo. Ono nebo ndyeelete kutalika kulibambila.” Mpomunyaawo Defedi wakabamba shintu shiinji shakuyakisha kaatana kufwa.

⁶ Lyalo Defedi wakeeta mwanaakwe Solomoni akumwaambila ayi akayake Ŋanda yakwe Lesa, Lesa wa bene Isilaeli.

⁷ Defedi wakaamba ayi, “Omwanaangu, ndalinga kusuni kuyaka Ŋanda yakwe Lesa mukupa bulemu Mwaami Lesa, Lesa wangu.

⁸ Sombi Mwaami Lesa wakaŋambila ayi ndakacaya bantu baanji abuumbi alimwi ayi ndakalwana nkondo shiinji. Ono ceebo ca bulowa kufula mbondakatila, Mwaami Lesa wakankasha kumuyakila Ŋanda yakwe.

⁹ Sombi Mwaami Lesa wakanshomesha ayi, ‘Ulaakuba amwaana musankwa uyo weshi akanoolela muluumuno mukwiinga ndaakulengesha ayi akabule cakulisukama kuswa kubalwani bakwe beshi bakanoomushingulukite. Ulaakunookwiitwa ayi Solomoni mukwiinga mubwaami bwakwe, ndaakupa bene Isilaeli luumuno mukubula cakulisukama.

¹⁰ Mwaana uyo ngweshi akanjakile Ŋanda. Ulaakuba mwanaangu, anebo ndaakuba baishi alimwi ndaakulengesha cuuna cakwe ca bwaami ayi cikanooliikobo lyoonse alyoonse.’ ”

¹¹ Defedi wakatolelela akwaamba ayi, “Ono omwanaangu, Mwaami Lesa, Lesa wako abe awebo alimwi akulengeshe kuswitilila mukumuyakila Ŋanda kweelana ambwaakashomesha.

¹² Mwaami Lesa, Lesa wako aakupe lushibo abusongo kwaamba ayi ukalele kabotu cishi cino ca Isilaeli kweelana aMilawo yakwe.

¹³ Na ukakonkele milasho amilawo yoonse iyo Mwaami Lesa njaakapa bene Isilaeli kwiinda muli Mose, ulaakuswitilila. Ulyeelete kuyuma akulishoma. Utakaloondi nabi kutyongola.

¹⁴ Ndakalipensha abuumbi ceebo cakucana shiyandika pakuyaka Ŋanda yakwe Lesa. Ndabambaako makilogilamu a golodi ali 3,400,000 alimwi amakilogilamu a silifa ali 34,000,000. Kuteelabo pasheesho sheenka, kuli bulonse uunji asheela shilemulemu shiinji shitakonsheki kupimwa. Aalo mapulanga amabwe ndabamba kale, sombi ulyeelete kuletelaawo ashimwi.

¹⁵ Ulicite basebenshi baanji. Kuli basankwa beshikutimbula mabwe, beshikuyakisha mabwe, beshikupala mapulanga alimwi abamwi bacishi kupanga shintu shipusenepusene

¹⁶ sha golodi, silifa, bulonse alimwi asha sheela shilemulemu. Ono bulya talika mulimo uyu. Mwaami Lesa abe awebo.”

¹⁷ Mpomunyaawo Defedi wakaambila bamatanjilili ba bene Isilaeli ayi banoocafwa Solomoni.

¹⁸ Wakaamba ayi, “Mwaami Lesa, Lesa wanu wakalinga amwebo akumupa luumuno kumbasu shoonse. Wakanengesha ayi nkome bantu boonse bakalinga kwikala mucishi cino. Ciindi cino bali mumaansaanu amumaansa a Mwaami Lesa.

¹⁹ Ono bulya amusebensele Mwaami Lesa, Lesa wanu amyoyo yanu yoonse alimwi abuumi bwanu boonse. Amutalike kuyaka Ŋanda yakwe Lesa kwaamba ayi mukabikemo Libokoshi lya Cipangano ashimwi shintu shisalalite isho shakusebensesha pakumulambila.”