1 Makani 21 - Baibo Busansulushi Bwa Libuku Ili

Defedi mbwaakabelenga bantu

¹ Satana wakalinga kusuni kuleta mapensho pabene Isilaeli, aboobo wakalengesha Defedi kwaamba ayi abelenge bantu.

² Mpeeke Defedi wakaambila Joabu abamatanjilili ba bashilumamba bamwi ayi, “Kamuya mubelenge bantu mucishi ca Isilaeli kuswa kuBiyasheba kushikila akuDani. Lyalo mukese mukaluule kwaamba ayi nkeshibe mbobabete kufula.”

³ Sombi Joabu wakakumbula ayi, “Mwaami Lesa aafushe bene Isilaeli mankanda ali mwaanda kwiinda mbobabete bulya nobaami bangu kamuciliiwo. Nomulemekwa boonse mbasebenshi banu. Ino ono nceebonshi ncemusunini ayi bantu babelengwe akulengesha bene Isilaeli kuba amulandu?”

⁴ Nakubi boobo maswi a mwaami Defedi taakwe kupilululwa. Lyalo Joabu wakanyamuka waya mucishi ca Isilaeli coonse akuboola kuJelusalemu.

⁵ Mpeeke Joabu wakaluula kuli Defedi mweelo wa bantu abo bakalinga kweelete kuya kukondo. Mucishi ca Isilaeli mwakalinga 1,100,000 amwalo mucishi ca Juda mwakalinga 470,000.

⁶ Ono ceebo cakwaamba ayi Joabu taakwe kusumina cakaamba mwaami, taakwe kubelengaawo bamumukowa wakwe Lefi alimwi awakwe Benjameni.

⁷ Alakwe Lesa taakwe kukondwa pacikani ico cakacita Defedi. Aboobo bene Isilaeli wakabapa mulandu.

⁸ Mpeeke Defedi wakaambila Lesa ayi, “Ndabiisha abuumbi kucita cintu ici. Ono ndaseenga kwaamba ayi mulekelele cibiibi cangu nebo nemusebenshi wanu mukwiinga ndaciita cintu cabuluya.”

⁹ Lyalo Mwaami Lesa wakaambila Gadi mulaluki wakwe Defedi ayi,

¹⁰ “Koya ulwiite Defedi ayi, ‘Mwaami Lesa waamba ayi kuli shintu shotatwe nsheelete kusalaawo comwi nceshi ncicitike kuli ndiwe.’ ”

¹¹ Lyalo Gadi wakaya kuli Defedi akumwaambila ayi, “Ono amusaleewo.

¹² Sa mulisuni kuba ansala kwamyaaka yotatwe mucishi canu? Sa mulisuni kucica balwani abalo kabesa cimuyandoola kwamyeenshi yotatwe? Sa mulisuni nshiku shotatwe Mwaami Lesa kaamulwana amupeeni wakwe? Ulaakucita boobo mukutuma mwaalu mucishi canu akusebensesha munjelo wakwe kuleta lufu mucishi coonse ca Isilaeli. Ono muyeeye pashintu ishi, lyalo mundwiite bukumbulo bwanu mboonjelete kutola kuMwaami Lesa.”

¹³ Mpomunyaawo Defedi wakaamba ayi, “Nebo ndi mumapensho anene abuumbi. Ono inga cabota kwaabwa mumaansa a Mwaami Lesa mukwiinga ngushinkumbu, kwiinda kwaabwa mumaansa a bantu.”

¹⁴ Aboobo Mwaami Lesa wakatuma mwaalu pakati ka bene Isilaeli, lyalo basankwa bali 70,000 bakafwa.

¹⁵ Mpomunyaawo Mwaami Lesa wakatuma munjelo wakwe kuya mukunyonyoola Jelusalemu. Sombi wakayeeya bumbi akwaambila munjelo wakwe ayi, “Mbubo ono! Cileke.” Lyalo wakacileka. Munjelo uyo wakalinga kwiimfwi palubansa lwakulupwitaawo lwakwe Alauna mwine Jebusi.

¹⁶ Defedi wakabona munjelo wakalinga kwiimfwi muluuwobo alimwi wakalinga kucite mupeeni mulyaansa lyakwe kaalibambite kunyonyoola Jelusalemu. Lyalo Defedi abamaloba abo boonse bakalinga kufwete masaka, bakafukama cakushisha shiwa panshi.

¹⁷ Mpeeke Defedi wakapaila ayi, “NobaLesa, ndime ndakabisha. Ndime ndakaamba ayi bantu babelengwe. Ino balo bacitanshi? NoBaami baLesa, baLesa bangu amupe ndime mulandu abamuŋanda yangu, mutaleeki mwaalu kukalilila pabantu banu aba.”

¹⁸ Mpomunyaawo munjelo wakaambila Gadi ayi alwiite Defedi ayi, “Kamuya muyakile Mwaami Lesa cipaililo palubansa lwakulupwitaawo lwakwe Alauna mwine Jebusi ulya.”

¹⁹ Defedi wakakonkela makani aMwaami Lesa akamwaambila Gadi ayi acite.

²⁰ Lyalo kulya kulubansa lwakulupwitaawo, Alauna abana bakwe bone bakalinga kulupula witi. Ndibakabona munjelo, baana abo bakacica akuya mukuyuba.

²¹ Paciindi ico ceenka Alauna wakabona mwaami Defedi keesa. Mpeeke wakaswa palubansa lwakulupwitaawo akufukama cakushisha ciwa panshi.

²² Defedi wakaambila Alauna ayi, “Ngulishe lubansa lwako lwakulupwitaawo kwaamba ayi njakile Mwaami Lesa cipaililo ingaawo mwaalu umane pakati ka bantu. Ntookulipila mweelo ukwene.”

²³ Alauna wakaambila Defedi ayi, “Ncibotu, nobaami inga mwaciita cili coonse cimusangalasha kubenga kuMwaami Lesa. Abasune mba ba mulambu wakutenta. Ishi shileyi shibebo nkuni awalo witi ngu wakupa cipo kuli Lesa. Ishi shoonse ndamupabo.”

²⁴ Sombi mwaami Defedi wakakumbula ayi, “Sobwe, ntookulipila mweelo ukwene. Nshikoonshi kubwesa cintu cako nabi kubenga mulambu wakutenta kuMwaami Lesa kwakubula kuloshawo lipepe, sobwe.”

²⁵ Kuswawaawo wakalipila Alauna maali a golodi akalinga 600 kuula lubansa ulo lwakulupwitaawo.

²⁶ Lyalo wakayakila Mwaami Lesa cipaililo kweenka uko akubenga milambu yakutenta aya bwanabwankashi. Wakapaila kushikila Mwaami Lesa wakatuma mulilo kuswa kwiculu kwaamba ayi milambu pacipaililo itentekwe.

²⁷ Mwaami Lesa wakaambila munjelo kwaamba ayi abooshe mupeeni munkomwe ya nguwo. Mpomunyaawo munjelo uyo wakacita mbomunya ubo.

²⁸ Defedi ndyaakabona ayi Mwaami Lesa wakumbula mupailo wakwe, wakabenga milambu aimwi pacipaililo mulubansa lwakulupwitaawo lwakwe Alauna mwine Jebusi.

²⁹ Tente ya Cipangano iyo Mose njaakapanga muluyanga alimwi acipaililo apo milambu mpoyakalinga kutentelwa shakalinga kumusena wakulambililaako wa kuGibyoni paciindi ico.

³⁰ Sombi Defedi taakalinga kuyaako mukwiipusha kuli Lesa mukwiinga wakalinga kuloonda mupeeni wa munjelo wa Mwaami Lesa ulya.