1 Makani 20 - Baibo Busansulushi Bwa Libuku Ili

Defedi mbwaakabwesa Laba

¹ Ono ciindi ca mupewo bamaami ncebakalinga kwiitamo kunkondo, Joabu wakatanjilila bashilumamba bakwe kuya mukulwana acishi ca bene Amoni. Sombi Defedi wakacaala muJelusalemu. Bashilumamba abo bakaya kundabala ya Laba beeshinguluka akwiinyoyoola.

² Ono lesa wa bene Amoni wakalinga kucite mushini wa bwaami uyo wakalinga kulema makilogilamu ali 34. Mushini uyo wakalinga kucite libwe lya makwebo. Mushini uyo wakabikwa kumutwi wakwe Defedi. Defedi wakasaala shintu shiinji kuswa mundabala iyo.

³ Bantu ba mumo wakabapa ncito yakusebensesha shakutimbusha mapulanga, mase alimwi atweembe. Wakacita bweenka ubo akumandabala amwi a bene Amoni. Lyalo lakwe abashilumamba bakwe bakaboolela kuJelusalemu.

Nkondo shakalwana bene Isilaeli abene Filisiti bapolomene

⁴ Mukuya kwanshiku, nkondo yakatalika alimwi pakati ka bene Isilaeli abene Filisiti kuGesa. KuGesa uko Sibekayi wa kuUsha nkwaakacaila musankwa upolomene wiitwa ayi Sipayi. Mpeeke bene Filisiti bakakomwa.

⁵ Pesule kwakabuka aimwi nkoondo pakati kabo. Mpeeke Eloanani mwanaakwe Jeya wakacaya Lami mukwabo Golyati wa kuGati. Lami wakalinga kucite lisumo lyakalinga linene abuumbi anga ngumutika wa mungwala.

⁶ Lyalo kwakabuka aimwi kuGati uko kwakalinga musankwa upolomene wakalinga kucite minwe yosanwe awomwi kulyaansa lyomwi lyomwi, tukumo tosanwe akomwi kucimpanta comwi comwi. Musankwa uyo wakalinga wamulunyungu lwa bantu bapolomene bakulukulu.

⁷ Musankwa uyo wakanyansha bene Isilaeli. Mpeeke Jonasani mwanaakwe Shimeya mukwabo Defedi, wakaya wamucaya.

⁸ Basankwa botatwe abo Defedi abashilumamba bakwe mbwaakacaya, bakalinga bamulunyungu lwa bantu bapolomene ba kuGati.