1 Makani 19 - Baibo Busansulushi Bwa Libuku Ili

Defedi mbwaakakoma bene Amoli

¹ Mukuya kwanshiku Naashi mwaami wa bene Amoni wakafwa. Lyalo Anuni mwanaakwe musankwa wakapyana bwaami bwakwe.

² Mpeeke Defedi wakaamba ayi, “Ndyeelete kutondesha bushicibusa kuli Anuni mwanaakwe Naashi, bweenka bwakacita baishi kuli ndime.” Lyalo wakatuma beshikumwiimikaninaako ayi bakalishaanisheko Anuni pakufwa kwa baishi. Basankwa bakwe Defedi ndibakashika kuAnuni mucishi ca bene Amoni,

³ bamaloba ba bene Amoni bakaambila Anuni mwaami wabo ayi, “Sa mutooyeeya ayi ndushinisho nceebo cakupa bulemu baishiwanu Defedi ncaatumina basankwa bakwe ayi bese bamulishaanisheeko pakufwa kwabo? Sa taakwe kubatumabo kuli ndimwe ayi babonebone ndabala inene mbweebete akwiisensa, lyalo akese akeekoome?”

⁴ Mpomunyaawo Anuni wakacata basankwa bakwe Defedi abo, wabacesa ndesu lubasu, watimbula shakufwala shabo kuswa mucibuno kuya panshi, akubaambila ayi banooya.

⁵ Basankwa abo bakalinga kuloonda kuboola kumishaabo mukwiinga bakalinga kufwite nsoni abuumbi. Defedi ndyaakanyumfwa, wakatuma beshinkombe ayi baye babakumanye akubalwiita ayi bekale muJeliko kushikila ndesu shikakule.

⁶ Mwaami Anuni abene Amoni bakeshiba ayi bakalengesha mwaami Defedi kuba mulwani wabo. Mpeeke bakalipila makilogilamu a Silifa ali 34,000 kwaamba ayi kuMesopotamya, kuMaaka aSoba mucishi ca Silya kuswe shikoci abashilumamba balwanina mushikoci.

⁷ Bakalipilila shikoci shili 32,000 abashilumamba balwanina muli nshisho. Balo pantu pomwi abashilumamba bakwe Maaka bakaya mukuyaka misumba pafwaafwi aMedeba. Abalo bene Amoni bakaswa mumandabala anene ene mishaabo akulibambila kulwana.

⁸ Defedi ndyaakanyumfwa cikani ici, wakatuma Joabu abashilumamba boonse ayi bakabalwaane.

⁹ Mpeeke bene Amoni bakaswa mundabala inene yabo ya Laba akulibambila kulwana kumwinjililo wa ndabala iyo. Mpeeke bamaami abo bakesa mukucafwa, bakalibamba kulwana muliwesa.

¹⁰ Ono Joabu wakabona kwaamba ayi kunembo akwisule kuli bashilumamba balibambite kulwana. Lyalo wakasala bashilumamba bakalinga kwiinditeewo mucishi ca Isilaeli coonse akubalansha kwakalingila bene Silya.

¹¹ Bashilumamba bamwi boonse bakacaalaawo wakababika mumaansaakwe Abishayi mukwabo uyo wakabalansha kwakalingila bene Amoni.

¹² Mpeeke Joabu wakaambila Abishayi ayi, “Na bene Silya banjumine kubakoma, webo inga wesa wamfunaako. Sombi na bene Amoni bakuyumine kubakoma, ingayi nebo ntoosa mukukufunaako.

¹³ Uyume alimwi tulwane cakubula boowa kwiimikanina bene misheesu amandabala anene akwe Lesa wesu. Mwaami Lesa aacite kweelana akuyanda kwakwe.”

¹⁴ Mpomunyaawo Joabu abashilumamba mbwaakalingaabo bakanyamuka kuya mukulwana bene Silya, mpeeke bene Silya bakacica.

¹⁵ Lyalo bene Amoni ndibakabona ayi bene Silya bacica, abalo bakacica kuloonda Abishayi akwinjila mundabala inene iyo. Lyalo Joabu wakaboolela kuJelusalemu.

¹⁶ Bene Silya ndibakaciyeeya akubona kwaamba ayi bakomwa kubene Isilaeli, bakaleta bene Silya kuswa kwicwe lya Mulonga wa Yufuletisi. Mpeeke bakababika mumaansaakwe Shobaki mutanjilili wa bashilumamba bakwe Adadesa mwaami wa cishi ca Soba.

¹⁷ Defedi ndyaakashibishikwa cikani ico, wakabunganya bene Isilaeli boonse, basubuka Mulonga wa Joodani akubalansha kwakalingila bene Silya. Mpeeke bakatalika kulwana,

¹⁸ sombi bene Silya bakacica kuloonda bene Isilaeli. Mpeeke Defedi wakacayaawo bashilumamba beshikulwanina mushikoci sha maaki bali 7,000 alimwi abapanshibo bali 40,000. Shobaki mutanjilili wa bashilumamba babo alakwe bakamuyasa akufwa peenka apo.

¹⁹ Lyalo bamaami, abo bakalinga basebenshi bakwe Adadesa, ndibakabona ayi bakomwa kubene Isilaeli, bakabasenga luumuno kuli Defedi. Mpeeke bakaba basebenshi bakwe. Kuswawaawo bene Silya bakalinga kuloonda kucafwa tubili bene Amoni.