1 Makani 18 - Baibo Busansulushi Bwa Libuku Ili

Defedi mbwaakakoma shishi shimwi shakalinga kushingulukite

¹ Mukuya kwanshiku Defedi wakalwana bene Filisiti alimwi, wakabakoma akukusha ndabala ya Gati amishi yakalinga kushingulukite mumaansaabo.

² Mpeeke Defedi wakakoma abene Moabu. Aboobo bene Moabu bakaba basebenshi bakwe Defedi akutalika kumutolela misonko.

³ Kuswawaawo Defedi wakakoma Adadesa mwaami wa cishi ca Soba kushikila akuAmati, Adadesa ndyaakalinga kuya mukuboosha cishi ca muya Mulonga wa Yufuletisi mumaansaakwe.

⁴ Defedi wakacata shikoci shakwe sha maaki shili 1,000 akucata busha bashilumamba balwanina mushikoci sha maaki bali 7,000 pantu pomwi abapanshibo bali 20,000. Mpeeke Defedi wakatyoloola myeendo ya maaki oonse akushiyabo akwana shikoci shili mwaanda.

⁵ Bene Silya ba muDamasikasi ndibakesa ayi bacafwe Adadesa mwaami wa kuSoba, Defedi wakabalwana akucayaawo bashilumamba bali 22,000 pakati lyabo.

⁶ Mpomunyaawo Defedi wakayakaamo misumba ya bashilumamba mucishi ca bene Silya ba muDamasikasi. Lyalo bakaba basebenshi bakwe Defedi akutalika kumutolela misonko. Ncakwiila Mwaami Lesa wakalinga kulengesha Defedi kukoma kuli koonse nkweenga waya.

⁷ Defedi wakabwesa mayawo a golodi ayo bacinenenene bakwe Adadesa ngobakalinga kunyamuna akwaatola kuJelusalemu.

⁸ Wakabwesa abulonse uunji abuumbi kuswa muTeba amuKuni, mandabala anene akalinga kweendeleshekwa aAdadesa. Kunembo Solomoni wakasebensesha bulonse uyo kupanga cingomo, macinko alimwi ashisebensesho sha muŊanda yakwe Lesa.

⁹ Ono Toyi mwaami wa kuAmati wakanyumfwa ayi Defedi wakakoma likoto lyoonse lya bashilumamba bakwe Adadesa.

¹⁰ Mpeeke wakatumako Jolamu mwanaakwe ayi akaanshe mwaami Defedi akumusunsa mumaansa ceebo cakukoma Adadesa, uyo mwaami Toyi ngwaakalwana kwashiindi shiinji. Jolamu wakatolelela ashipo sha shintu shakapangwa asilifa, golodi alimwi abulonse.

¹¹ Shintu isho Defedi wakashibika palubasu ayi nshakusebensesha pakulambila, pantu pomwi asilifa alimwi agolodi ngwaakabwesa kuswa kumishobo imwi iyo njaakakoma. Nkokwaamba ayi ngooyo wakaswa kubene Edomu, bene Moabu, bene Amoni, bene Filisiti alimwi abene Amaleki.

¹² Abishayi mwanaakwe Seluiya wakacaya bene Edomu bali 18,000 muCinyika ca Mwiinyo.

¹³ Mucishi cabo wakashiya wayakamo misumba ya bashilumamba. Mpeeke bene Edomu boonse bakaba basebenshi bakwe Defedi. Ncakwiila Mwaami Lesa wakalinga kulengesha Defedi kukoma kuli koonse nkweenga waya.

¹⁴ Mboboobo Defedi mbwaakaba mwaami wa cishi ca Isilaeli coonse, alimwi wakeendelesha bantu boonse cabululami alimwi cakutanyengelela.

¹⁵ Joabu mwanaakwe Seluiya wakalinga ngomutanjilili wa bashilumamba, Jeoshafati mwanaakwe Ayiludi kaali ngoshikulemba makani amwi oonse.

¹⁶ Bapailishi bakalinga Sadoki mwanaakwe Aitubu aAimeleki mwanaakwe Abyata. Selaya ngowakalinga ngomulembi wa kubwalo.

¹⁷ Wakalinga munene wa beshikulindilila Defedi nguBenaya mwanaakwe Jeoiyada. Beshikupandako maano mwaami Defedi bakalinga mbana bakwe basankwa mwiine.