1 Makani 16 - Baibo Busansulushi Bwa Libuku Ili

¹ Mpeeke bakashisha Libokoshi lya Cipangano akulibika mumusena wa ndilyo mutente yakayaka Defedi ayi likakaleemo. Lyalo Defedi wakabenga milambu yakutenta aya bwanabwankashi kunembo lya Mwaami Lesa.

² Ndyaakamana kubenga milambu iyo, wakapa coolwe bantu boonse muliina lya Mwaami Lesa.

³ Kuswawaawo bantu boonse, nkokwaamba ayi bene Isilaeli boonse, basankwa abanakashi wakabaabila shinkwa womwi womwi, cipumputa ca nyama yakutenta acisankata ca minyansa comwi comwi.

⁴ Wakasala bene Lefi bamwi kwaamba ayi banoosebensela kunembo lya Libokoshi lya Cipangano ca Mwaami Lesa kwaamba ayi banoosenga, banoolumba akulumbaisha Mwaami Lesa, Lesa wa bene Isilaeli.

⁵ Asafu wakalinga ngomutanjilili munene, Sekaliya ngowakalinga kumukonkela. Bamwi nguJeiyelo, Shemilamoti Jeiyelo, Matitiya, Elyabu, Benaya, Obedi Edomu alimwi aJeiyelo boonse bakalinga kulisha tulumbu. Asafu wakalinga kulisha tusenke.

⁶ Bapailishi bobilo, Benaya alimwi aJaasiyelo mbobakalinga kulisha mapeenga kunembo lya Libokoshi lya Cipangano.

⁷ Ndyelyeelyo Defedi ndyaakapa Asafu abene Lefinyina lwiimbo ulu lwakulumba Mwaami Lesa.

Lwiimbo lwakwe Defedi lwakulumba

⁸ Amulumbe Mwaami Lesa, amumulambile mukwiita liina lyakwe. Amupukishe nshaakacita kumishobo yoonse.

⁹ Amumwiimbile, amwiimbe nyimbo shakumulumbaisha, amushimike isho shoonse shikankamika nshaakacita.

¹⁰ Amusangalale akulambila liina lyakwe lisalalite. Ncakwiila myoyo ya bantu boonse bamulambila aisangalale.

¹¹ Amulangilishe kuMwaami Lesa akusenga nkusu shakwe. Amulambile Mwaami Lesa cakutacilekaawo.

¹² Kamwiibaluka shitondesho sha nkusu sha kwiculu nshaakacita, shaankamiko shakwe alimwi abupingushi mbwaakapa.

¹³ Kamushiibaluka nobamulunyungu lwakwe Jakobo musebenshi wakwe, Nobamulunyungu lwakwe Isilaeli, mwebo nomwakasalwa.

¹⁴ Mwaami Lesa, ngoLesa wesu, milawo yakwe ili mucishi ca panshi coonse.

¹⁵ Ulaakulama cipangano cakwe kwalyoonse alyoonse, ee, kushomesha kwakwe mumashalane ali cuulu.

¹⁶ Ulaakulama cipangano ncaakapanga aAbulaamu, kushomesha nkwaakalumbila kuli Isaki.

¹⁷ Cipangano ico wakacipanga aJakobo ayi ngumulawo, wakacipanga ayi ncamuyayaya kubene Isilaeli.

¹⁸ Wakaamba ayi, “Ndaakukupa cishi ca Kenani kwaamba ayi cikabe caako.”

¹⁹ Bantu bakwe Lesa bakalinga baniini, bakalinga mbeensu mucishi ca Kenani.

²⁰ Bakeenda kuswa mucishi comwi akuya mucishi cimwi, kuswa mubuleelo bomwi akuya mubuleelo bumwi.

²¹ Sombi Lesa taakwe kusuminisha uli woonse kubalyatilila. Ceebo ca mbabo wakalinga kukalalila bamaami.

²² Wakalinga kubaambila ayi, “Mutacisi bantu bangu mbondakasala. Muteeleshi kucata balaluki bangu.”

²³ Nocishi coonse, amwiimbile Mwaami Lesa! Nshiku shoonse amwaambilishe makani abotu akwaamba ayi wakatupulusha.

²⁴ Amwaambilishe bulemu bwakwe kumishobo yoonse. Amwaambilishe micito yakwe ya nkusu kubantu boonse.

²⁵ Mwaami Lesa uleendaawo alimwi ulyeelete kulumbaishikwa. Ncakwiila ulyeelete kulemekwa kwiinda balesa boonse.

²⁶ Balesa ba mishobo imwi yoonse nshibumbwabumbwabo, sombi Mwaami Lesa ngowakalenga liculu.

²⁷ Bulemu abwaami shilimushingulukite, nkusu akusangalala shili muŊanda yakwe.

²⁸ Amulumbaishe Mwaami Lesa noonse nobamucishi ca panshi. Amulumbaishe bulemu ankusu shakwe.

²⁹ Amulumbaishe liina lyabulemu lya Mwaami Lesa. Amulete cipo akwisa muŊanda yakwe. Amulambile Mwaami Lesa mubulemu bumweelete.

³⁰ Amututume kunembo lyakwe nobamucishi coonse! Cishi ca panshi ciliimfwi mumusena womwi, aboobo tacitenkaani.

³¹ Liculu acishi ca panshi ashisangalale! Amwaambile mishobo yoonse ayi Mwaami Lesa ngumwaami.

³² Lweenge aluwoote pantu pomwi ashintu shoonse shiliimo! Myuunda ashoonse shiliimo ashisangalale!

³³ Shisamu muluundu shilaakoolobesha cakusangalala paciindi Mwaami Lesa aakwisa mukulela cishi.

³⁴ Amulumbe Mwaami Lesa mukwiinga uli kabotu, ee, mukwiinga lusuno lwakwe ndwamuyayaya.

³⁵ Kamwaamba kuli nguwe ayi, “NoBaami baLesa, baLesa besu amutufuneeko. Mutubunganye kuswa kumishobo iimbi, kwaamba ayi tulumbe liina lyanu lisalalite akumulumbaisha abuumbi.”

³⁶ Aalumbaishikwe Mwaami Lesa, Lesa wa bene Isilaeli. Amumulumbaishe lyoonse alyoonse. Lyalo bantu boonse bakaamba ayi, “Ameni,” akulemeka Mwaami Lesa.

Kulambila kuJelusalemu akuGibyoni

³⁷ Mwaami Defedi wakasala Asafu abene Lefinyina ayi basebensele kunembo lya Libokoshi lya Cipangano bushiku abushiku.

³⁸ Alakwe Obedi Edomu mwanaakwe Jedutuni abamucipani cakwe bali 68 bakasalwa ayi banoobacafwa. Osa alimwi aObedi Edomu bakalinga beshikulindilila minjililo.

³⁹ Defedi wakasala Sadoki mupailishi abapailishinyina ayi banoosebensela kunembo lya Tente ya Cipangano pamusena wakulambililaako kuGibyoni.

⁴⁰ Macuunsa lyoonsebo alimwi amacolesha bakalinga kubenga milambu yakutenta pacipaililo kweelana ashoonse shilembetwe muMilawo ya Mwaami Lesa iyo njaakapa bene Isilaeli.

⁴¹ Bamwi bakalinga ambabo nguEmani aJedutuni kubikaawo abamwi abo bakasalwa kwaamba ayi bakanokwiimba akulemeka Mwaami Lesa ceebo ca lusuno lwakwe lwamuyayaya.

⁴² Emani alimwi aJedutuni bakalinga bamatanjilili ba beshikulisha mapeenga, tusenke alimwi ashimwi shakalinga kulishikwa pakwiimba nyimbo shakulumbaisha. Bamucipani cakwe Jedutuni bakalinga kulindilila minjililo.

⁴³ Lyalo bantu boonse bakaboolela mwabo mwabo. Alakwe Defedi wakaboolela kumishaabo kuya mukwikala abamuŋanda yakwe.