1 Makani 15 - Baibo Busansulushi Bwa Libuku Ili

Mbobakalibambila kuleta Libokoshi lya Cipangano

¹ Defedi ndyaakamana kuyaka maandaakwe muNdabala yakwe Defedi, wakabamba amusena wakubikawo Libokoshi lya Cipangano. Wakaliyakila tente.

² Lyalo wakaamba ayi, “Bene Lefi beenkabo mbweshi banoonyamuna Libokoshi lya Cipangano mukwiinga Mwaami Lesa mbwaakasala ayi banoolinyamuna alimwi akunoomusebensela lyoonse alyoonse.”

³ Mpeeke Defedi wakeeta bene Isilaeli boonse kwisa kuJelusalemu kwaamba ayi bakalete Libokoshi lya Cipangano kumusena ngwaakalibambila.

⁴ Kuswawaawo wakeeta bamulunyungu lwakwe Aloni abene Lefi.

⁵ Kuswa kucipani cakwe Koati kwakesa Uliyelo uyo wakalinga mutanjilili wa bamucipani cabo bali 120.

⁶ Kuswa kucipani cakwe Melali kwakesa Asaya uyo wakalinga mutanjilili wa bamucipani cabo bali 220.

⁷ Kuswa kucipani cakwe Geshoni kwakesa Jowelo uyo wakalinga mutanjilili wa bamucipani cabo bali 130.

⁸ Kuswa kucipani cakwe Elisafani kwakesa Shemaya uyo wakalinga mutanjilili wa bamucipani cabo bali 200.

⁹ Kuswa kucipani cakwe Ebuloni kwakesa Eliyelo uyo wakalinga mutanjilili wa bamucipani cabo bali 80.

¹⁰ Kuswa kucipani cakwe Usiyelo kwakesa Aminadabu uyo wakalinga mutanjilili wa bamucipani cabo bali 112.

¹¹ Lyalo Defedi wakeeta Sadoki alimwi aAbiyata bapailishi pantu pomwi aUliyelo, Asaya, Jowelo, Shemaya, Eliyelo alimwi aAminadabu. Boonse aba bakalinga bene Lefi.

¹² Wakabaambila ayi, “Muli bamatanjilili ba shipani sha bene Lefi. Mwebo abene Lefinyinaanu amulisalashe kwaamba ayi mulete Libokoshi lya Cipangano ca Mwaami Lesa, Lesa wa bene Isilaeli pamusena ngondalibambila.

¹³ Mwaami Lesa wakatukalalila kataanshi ceebo mwebo nobene Lefi tamukwe kulinyamuna. Ncakwiila tatukwe kumwiipusha mbotweelete kulinyamuna.”

¹⁴ Mpomunyaawo bapailishi abene Lefi bakalisalasha kwaamba ayi banyamune Libokoshi lya Cipangano ca Mwaami Lesa, Lesa wa bene Isilaeli.

¹⁵ Bene Lefi bakanyamuna Libokoshi lya Cipangano ashisamu pashifushi shabo bweenka mbwaakaamba Mwaami Lesa kwiinda muli Mose.

¹⁶ Kuswawaawo Defedi wakaambila bamatanjilili bene Lefi ayi basale bamakwababo beshi banokwiimba nyimbo shakusangalala alimwi banoolisha tulumbu tunene atuniini alimwi atusenke twakulisha.

¹⁷ Lyalo bene Lefi bakasala Emani mwanaakwe Jowelo, amukwabo Asafu mwanaakwe Belekiya, alimwi aEtani mwanaakwe Kushaya kuswa kucipani cakwe Melali.

¹⁸ Beshikubacafwa mbobakasala kulisha tulumbu tuniini mbaaba: Sekaliya, Jaasiyelo, Shemilamoti, Jeiyelo, Uni, Elyabu, Benaya, Maaseiya. Mbobakasala kulisha tulumbu tunene mbaaba: Matitiya, Elifelewu, Mikineiya alimwi aObedi Edomu aJeiyelo beshikulindilila minjililo ya Ŋanda yakwe Lesa.

¹⁹ Beshikulisha tusenke nguEmani, Asafu alimwi aEtani.

²⁰ Sekaliya, Asiyelo, Shemilamoti, Jeiyelo, Uni, Elyabu, Maaseiya alimwi aBenaya bakanoolisha tulumbu tuniini kweelana aAlamoti.

²¹ Matitiya, Elifele, Mikineiya, Obedi Edomu, Jeiyelo alimwi aAsasiya bakasalwa kulisha tulumbu tunene kweelana aSheminiti.

²² Kenaniya mutanjilili wa bene Lefi ngowakasalwa kutanjilila abwiimbi ceebo wakalinga kucibwene abuumbi kwiimba.

²³ Belekiya aElikana bakasalwa ayi babe beshikulindilila Libokoshi lya Cipangano.

²⁴ Shebaniya, Joshafati, Netanelo, Amasayi, Sekaliya, Benaya alimwi aEliyesa bapailishi bakasalwa ayi banoolisha mapeenga kunembo lya Libokoshi lya Cipangano. Obedi Edomu alimwi aJeiya abalo bakasalwa ayi babe beshikulindilila Libokoshi lya Cipangano.

Libokoshi lya Cipangano mbolyakatolwa kuJelusalemu

²⁵ Ndibakamana kubamba shoonse ishi Defedi, bamaloba bene Isilaeli alimwi abamatanjilili ba bashilumamba bali 1,000 bakaya mukulileta Libokoshi lya Cipangano ca Mwaami Lesa kuswa kuŋanda yakwe Obedi Edomu. Bakacita boobo akusekelela abuumbi.

²⁶ Mpeeke bakabenga baceende bali bosanwe abobilo alimwi ambelele shili shosanwe ashobilo kwaamba ayi Lesa acafwe bene Lefi abo bakanyamuna Libokoshi lya Cipangano.

²⁷ Defedi lyalo wakafwala mungaanjo wa nsalu iteshimite bweenka mbuli bene Lefi abo bakanyamuna Libokoshi lya Cipangano, beshikwiimba alimwi aKenaniya uyo wakalinga kutanjilila bwiimbi. Defedi wakafwala acakufwala ciitwa ayi Efodi ca nsalu iteshimite.

²⁸ Lyalo bene Isilaeli boonse bakaleta Libokoshi lya Cipangano ca Mwaami Lesa kuJelusalemu cakusangalala. Bakalinga kulisha meeca a mbelele shisankwa, mapeenga, tusenke alimwi atulumbu tunene atuniini.

²⁹ Ono Libokoshi lya Cipangano ca Mwaami Lesa ndilyakalinga kwinjishikwa muNdabala yakwe Defedi, Mikali mwanaakwe Saulo wakalinga kweebela pambwelyo. Lyalo ndyaakabona mwaami Defedi kaashana akusotooka, wakamucima abuumbi mumoyo.