1 Makani 13 - Baibo Busansulushi Bwa Libuku Ili

Libokoshi lya Cipangano mbolyakaswa kuKilyati Jeyalimu

¹ Ono Defedi wakeepusha bamatanjilili ba bashilumamba bakwe abo bakalinga kweendelesha bashilumamba bali 1,000 nabi bashilumamba bali 100.

² Lyalo wakaambila bene Isilaeli boonse ayi, “Na mulisuminite alimwi na Mwaami Lesa, Lesa wesu wasuminisha, atutume beshinkombe kubene misheesu boonse mushipansha sha cishi cesu ca Isilaeli, pantu pomwi abapailishi abene Lefi mumandabalaabo akubaambila ayi soonse tukakumane kuno.

³ Lyalo ndyeshi tukaye mukuleta Libokoshi lya Cipangano cakwe Lesa, ilyo ndyetwakasuula mubwaami bwakwe Saulo.”

⁴ Bantu boonse bakasumina kucita boobo mukwiinga bakabona ayi ncibotu.

⁵ Mpomunyaawo Defedi wakabunganya bene Isilaeli boonse mucishi coonse, kutalikila kunyinsa ya cishi ca Ijipiti kumalenge tibili akumwinjililo wa Amati kumatwa kwaamba ayi balete Libokoshi lya Cipangano kuswa kuKilyati Jeyalimu.

⁶ Mpeeke Defedi abene Isilaeli boonse bakaya kundabala inene ya Baala nkokwaamba ayi kuKilyati Jeyalimu mucishi ca Juda. Bakaya mukubwesa Libokoshi lya Cipangano cakwe Lesa ilyo licite liina lya Mwaami Lesa uyo ushiite pacuuna ca bwaami cili pakati ka bakelebu.

⁷ Ndibakashika kuŋanda yakwe Abinadabu bakakusha Libokoshi lya Cipangano akulibika mucikoci cipya. Usa alimwi aAiyo mbobakalinga kuya ceenda acikoci.

⁸ Defedi abene Isilaeli bamwi boonse bakalinga kushana cankusu shabo shoonse mukulemeka Lesa. Bakalinga kwiimba akulisha tulumbu tuniini atunene, ngoma, tusenke twakulisha amapeenga.

⁹ Ono ndibakashika palubansa lwakulupwitaawo lwa kuKidoni, basune bakalinga kuyanda kuwa. Mpeeke Usa wakatambika lyaansa akucatilila Libokoshi lya Cipangano.

¹⁰ Mpomunyaawo Mwaami Lesa wakakalalila Usa akumucaya ceebo cakucata Libokoshi ilyo. Mpeeke wakafwa mpomunyaawo kunembo lyakwe Lesa.

¹¹ Lyalo Defedi wakakalala abuumbi kubona bukali bwa Mwaami Lesa mbobwakafuumukila Usa. Paceebo ceeci musena uyo abobulya uciitwa ayi Pelesi Usa.

¹² Lyalo Defedi wakaloonda Lesa bushiku ubo akwaamba ayi, “Ono bulya inga ndatola buyani Libokoshi lya Cipangano cakwe Lesa kuŋanda yangu?”

¹³ Taakwe kulitola ayi akanooli alyo muNdabala yakwe Defedi. Aboobo wakaseesha akulitola kuŋanda yakwe Obedi Edomu mwine Gati.

¹⁴ Lyalo lyakekala muŋanda yakwe Obedi Edomu mwine Gati kwamyeenshi yotatwe. Mpeeke Mwaami Lesa wakamupa coolwe pantu pomwi abamuŋanda yakwe boonse ashintu shoonse nshaakalinga kucite.