1 Makani 12 - Baibo Busansulushi Bwa Libuku Ili

Bakakonkela Defedi kuswa kumukowa wakwe Benjameni

¹ Defedi wakalinga kwikala muSikilagi, uko nkwaakaya ndyaakaloboka kuswa kumwaami Saulo mwanaakwe Kishi. Kweenka uko bashilumamba baanji bacibwene kulwana alimwi batacite boowa bakasenkanaakwe.

² Bashilumamba abo bakalinga bene Benjameni beshikamukowa bakwe Saulo. Bakalinga kucishi kulwana amata pakuwaala mifwi akusebensesha cipaya cakuwaalisha mabwe kululyo nabi kucipiko.

³ Bashilumamba abo mbaaba: Aiyesa mutanjilili wabo alimwi aJoashi bana bakwe Shema wa kuGibiya, Jesiyelo aPeleti bana bakwe Asimafeti, Belaka, Jewu wa kuAnatoti,

⁴ Ishimaya wa kuGibyoni uyo wakalinga shilumamba upukite womwi pabamatanjilili ba bashilumamba bakalinga kwiitwa ayi Makumi Otatwe, Jelemiya, Jaasiyelo, Jowanani, Josabadi wakalinga wa kuGedela,

⁵ Elusayi, Jelimoti, Beyaliya, Shemaliya alimwi aShefatiya wa kuAlifu,

⁶ Elikana, Ishiya, Asalelo, Jowesa alimwi aJashobeyamu wa kuKola,

⁷ Joela alimwi aSebadiya bana bakwe Jeloamu wa kuGedo.

Bakakonkela Defedi kuswa kumukowa wakwe Gadi

⁸ Aya ngomeena a bashilumamba bapukite batacite boowa kuswa kumukowa wakwe Gadi abo bakaya mukusenkana abashilumamba bakwe Defedi ndyaakalinga kulilinga lya mabwe muluyanga. Bantu abo bakalinga kucishi kulwanisha mayawo amasumo. Bashilumamba abo bakalinga bakali anga ninkalamu alimwi bacabeene anga ninsefu ya mutulundu.

⁹ Esa ngowakalinga mutanjilili wabo, kuboolaawo nguObadiya, kuboolaawo nguElyabu,

¹⁰ kuboolaawo nguMishimana, kuboolaawo nguJelemiya,

¹¹ kuboolaawo nguAtayi, kuboolaawo nguEliyelo,

¹² kuboolaawo nguJowanani, kuboolaawo nguElisabadi,

¹³ kuboolaawo nguJelemiya, wakweelaako nguMakibanayi.

¹⁴ Bashilumamba aba bakaswa kumukowa wakwe Gadi bakalinga bamatanjilili ba bashilumamba. Bamwi bakalinga kweendelesha bashilumamba bali 1,000 alimwi bamwi bakalinga kweendelesha bashilumamba bali 100.

¹⁵ Bashilumamba aba mbobakasubuka Mulonga wa Joodani mumweenshi utaanshi mumwaaka, mulonga uyo ndyeusula. Bakaya mukupalanganya bantu bakalinga kwikala mushinyika shoonse kwicwe akumbo.

Bakakonkela Defedi kuswa kumukowa wakwe Benjameni awakwe Juda

¹⁶ Bene Benjameni bamwi pantu pomwi abene Juda bamwi bakaya kuli Defedi mulilinga lyakwe lya mabwe.

¹⁷ Defedi wakaya mukubakumanya akubaambila ayi, “Na mwesa muluumuno ayi muncaafwe, ingayi mwatambulwa kuno. Atusenkane! Sombi na mulipingite kungaba mumaansa a balwani bangu, nabi taaku cibiibi ncendakacita kuli ndimwe, Lesa wa bamashali besu bakulukulu utooshiba akumupa mulandu.”

¹⁸ Mpomunyaawo Mushimu wakwe Lesa wakaselukila Amasayi uyo wakesa mukuba mutanjilili wa bashilumamba bakalinga kwiitwa ayi Makumi Otatwe. Mpeeke wakoolobesha ayi, “Tuli baanu swebo nobaDefedi! Tuli kulubasu lwanu nobana babo baJese! Amuswitilile pantu pomwi abaabo batoomucafwa! Ncakwiila Lesa uli kulubasu lwanu.” Lyalo Defedi wakabatambula akubasuminisha ayi babe bamatanjilili ba bashilumamba bakwe.

Bakakonkela Defedi kuswa kumukowa wakwe Manase

¹⁹ Bashilumamba bene Manase bamwi bakaya kuli Defedi uko ndyaakalinga kuya abene Filisiti mukulwana Saulo. Nakubi boobo Defedi abashilumamba bakwe tabakwe kucafwa bene Filisiti mukwiinga bamaami ba bene Filisiti bakaloonda ayi inga baya mukuba kulubasu lwakwe Saulo. Aboobo bakaboosha Defedi kuSikilagi.

²⁰ Aba mbobashilumamba bene Manase abo bakaya kulubasu lwakwe Defedi ndyaakalinga kuboolela. Adina, Josabadi, Jediayelo, Mikaeli, Josabadi, Eliyu, alimwi aSiletayi. Mucishi cakwe Manase aba boonse bakalinga bamatanjilili ba bashilumamba bali 1,000.

²¹ Bakalinga kucafwa Defedi kulwana makoto a baabo bakalinga kwisa mukusaala. Boonse bakalinga bashilumamba batacite boowa alimwi bakalinga bamatanjilili ba bashilumamba bakwe.

²² Bushiku abushiku, bashilumamba bakalinga kwisa mukusenkana aDefedi cakwaamba ayi bashilumamba bakwe bakafula abuumbi.

Mundando wa bashilumamba bakwe Defedi

²³ Ciindi ico Defedi ndyaakalinga kuEbuloni bashilumamba baanji bakenjila mulikoto lya bashilumamba bakwe akumucafwa kuba mwaami pamusena wakwe Saulo kweelana abwakashomesha Mwaami Lesa. Myeelo yabo njeeyi:

²⁴ Bene Juda bakalinga 6,800 abo bakalinga kupakete mayawo amasumo.

²⁵ Bene Simyoni bakalinga 7,100 basankwa balibambite kulwana.

²⁶ Bene Lefi bakalinga 4,600

²⁷ kubikaawo aJeoiyada, mutanjilili wa bamulunyungu lwakwe Aloni abo bakalinga 3,700

²⁸ alimwi aSadoki uyo wakalinga shilumamba utacite boowa pantu pomwi abamakwabo bali 22 bakalinga bamatanjilili ba bashilumamba.

²⁹ Bene Benjameni alimwi beshikamukowa bakwe Saulo bakalinga 3,000 mbobakatolelela kushomeka kuli Saulo kushikila ciindi ico.

³⁰ Bene Efuleemu bakalinga bashilumamba batacite boowa alimwi bakalinga kupukite mushipani shabo bakalinga 20,800.

³¹ Bashilumamba ba mumusa wa mukowa wakwe Manase abo bakasalwa ayi baye babike Defedi pabwaami, bakalinga 18,000.

³² Bene Isaka abo bakalinga bamatanjilili bali 200 pantu pomwi abamakwababo. Bamatanjilili abo bakalinga kwishi kabotu sheelete kucita bene Isilaeli paciindi comwi acomwi.

³³ Bene Sebuluni bakalinga 50,000. Boonse bakalinga kushomeka alimwi balibambite kulwana abo bakeeishikwa kusebensesha shakulwanisha sha mishobo yoonse.

³⁴ Bene Nafutali bakalinga bamatanjilili bali 1,000 pantu pomwi abashilumamba bali 37,000 bakalinga kupakete mayawo amasumo.

³⁵ Bene Dani bakalinga 28,600 abo bakalinga kulibambite kulwana.

³⁶ Bene Asha bakalinga 40,000 bacibwene kulwana.

³⁷ Ngayi kuswa kwicwe lya Mulonga wa Joodani bakalinga 120,000 nkokwaamba ayi kuswa kubene Lubeni, bene Gadi alimwi akumusa wa mukowa wakwe Manase. Boonse bakalinga kupakete shakulwanisha sha mushobo uli woonse.

³⁸ Bashilumamba aba boonse bakalinga kulibambite kulwana, bakaya kuEbuloni, bakalinga kupingite kubika Defedi pacuuna ca bwaami bwa bene Isilaeli boonse. Bene Isilaeli bamwi boonse bakalinga kucite muyeeyo womwi ambabo.

³⁹ Bashilumamba abo bakekala aDefedi kwanshiku shotatwe kabalya cakusangalala shakulya ashakunwa isho bene mishaabo nshebakababambila.

⁴⁰ Abalo beshikamukobonyinaabo kuswa kucishi ca bene Isaka, ca bene Sebuluni alimwi aca bene Nafutali, bakabaletela shakulya pambongolo, ngamela, shifubwa shili anga nimbongolo alimwi abasune. Mpeeke fulaulo, shaampe sha nkuyu shakuyanika, shisankata sha minyansa yakuyanika, waini, mafuta a olifi, ŋombe alimwi ambelele isho nshebakaleta shakafula abuumbi. Bakacita boobo ceebo mucishi ca Isilaeli coonse mwakalinga kusangalala.