1 Makani 11 - Baibo Busansulushi Bwa Libuku Ili

Defedi mbwaakaba mwaami wa bene Isilaeli abene Juda

¹ Mpeeke bene Isilaeli boonse bakaya kuli Defedi kuEbuloni akwaamba ayi, “Swebo amwebo tuli bulowa bomwi.

² Kalekale, Saulo kaacili mwaami wesu, ndimwe mwakalinga kutanjilila bashilumamba ba bene Isilaeli kuya kunkondo. Paciindi ico Mwaami Lesa wakamulwiita ayi, ‘Ulaakutanjilila bantu bangu bene Isilaeli akuba mwaami wabo.’ ”

³ Mpeeke bamaloba boonse bene Isilaeli ndibakashika kuli Defedi kuEbuloni, Defedi wakapanga cipangano ambabo uko pameenso aMwaami Lesa. Lyalo bakamunanika mafuta ayi abe mwaami wa bene Isilaeli bweenka bwakashomesha Mwaami Lesa kwiinda muli Samwelo.

⁴ Kuswawaawo Defedi abene Isilaeli boonse bakaya kundabala ya Jelusalemu iyo yakalinga kwiitwa ayi Jebusi paciindi ico. Bene Jebusi abo bakalinga kwikala kooko,

⁵ bakaambila Defedi ayi, “Teshi unjileemo muno.” Sombi Defedi wakaya wakoma lilinga lya Siyoni ilyo bantu ndyebakatumba ayi Ndabala yakwe Defedi.

⁶ Lyalo Defedi wakaamba ayi, “Uyo woonse weshi ataangune kulwana bene Jebusi ngweshi abe mutanjilili wa bashilumamba boonse.” Mpeeke Joabu mwanaakwe Seluiya ngowakataanguna kuya mukulwana akuba mutanjilili wa bashilumamba.

⁷ Defedi wakaya mukwikala mulilinga ilyo, paceebo ceeco bakalitumba ayi Ndabala yakwe Defedi.

⁸ Wakayakulula ndabala kushinguluka lilinga ilyo, kuswa kumusena wakeelanishikwa abulongo kwicwe lya kalundu. Joabu wakalinga kuyakulula lubasu lumwi loonse lwa ndabala iyo.

⁹ Ciindi ico nkusu shakwe Defedi shakafula abuumbi mukwiinga Mwaami Lesa Shinkusu shoonse wakalinga anguwe.

Bashilumamba bakwe Defedi bapukite

¹⁰ Aya ngameena a bashilumamba bakwe Defedi bapukite, kubikaawo abene Isilaeli bamwi boonse abo bakamucafwa kuba mwaami bweenka bwakashomesha Mwaami Lesa. Ncakwiila mbomunya aba mbobakayumya bwaami bwakwe.

¹¹ Mutaanshi nguJashobeyamu wamucipani cakwe Akimoni uyo wakalinga mutanjilili wa “Bashilumamba Botatwe Bapukite.” Wakalwana nkondo alisumo lyakwe pabantu bakalinga 300 akubacaya boonse munkondo iyo.

¹² Wakuboolaawo nguEliyasa mwanaakwe Dodo wamucipani cakwe Awowi, womwi pakati ka “Bashilumamba Botatwe Bapukite.”

¹³ Eliyasa wakalwana bene Filisiti kulubasu lwakwe Defedi kuPasi Damimu. Wakalinga mumuunda wa bale bene Isilaeli ndibakatalika kucica.

¹⁴ Mpeeke lakwe abashilumamba bakwe bakeemikana pakati ka muunda uyo akulwana bene Filisiti. Mwaami Lesa wakamulengesha kukoma cikankamika.

¹⁵ Bumwi bushiku, basankwa botatwe pakati ka bashilumamba bakalinga kupukite bali makumi otatwe, bakaya kumwaandami uko kwakalinga Defedi pafwaafwi acimfwengo ca kuAdulamu. Ciindi ico likoto lya bashilumamba ba bene Filisiti kabali bayaka misumba muCinyika ca Lefaimu.

¹⁶ Paciindi ico Defedi wakalinga mucimfwengo alyalo likoto lya bashilumamba ba bene Filisiti lishikushinkila lyakalinga kuBetileemu.

¹⁷ Ono Defedi wakafwa nyotwa akwaamba ayi, “Kubota muntu waya wakuletelawo maanshi akunwa kumukalo uli kufwaafwi amwinjililo wa ndabala ya Betileemu.”

¹⁸ Mpomunyaawo bashilumamba bakalinga kupukite botatwe abo bakaya bapalanganya beshikushinkila bene Filisiti. Lyalo bakateka maanshi kufwaafwi amwinjililo wa ndabala ya Betileemu akwaatola kuli nguwe. Nakubi boobo Defedi taakwe kwaanwa, sombi wakaatila panshi mukulemeka Mwaami Lesa.

¹⁹ Wakaamba ayi, “Cintu ca mushobo uyu nsheelete kucicita napaceyi. Bantu aba beensha buumi bwabo mumaansa kuya mukuteka maanshi aya. Aboobo inga caba anga ntoonwa bulowa bwabo.” Munshila iyo wakakaka kunwa maanshi ayo. Shamushobo uyo nsheshintu bashilumamba bakalinga kupukite botatwe abo nshebakacita mukubula boowa.

²⁰ Ono Abishayi mukwabo Joabu, lakwe wakalinga mutanjilili wa baabo bakalinga kwiitwa ayi Makumi Otatwe. Wakalwana basankwa bali 300 akubacaya alisumo. Paceebo ceeco alakwe wakapuka pakati ka “Bashilumamba Makumi Otatwe Bapukite.”

²¹ Nakubi kwaamba ayi taakalinga kucite bulemu bweelene abwa “Bashilumamba Botatwe Bapukite,” wakalinga kulemekwa kwiinda “Bashilumamba Makumi Otatwe Bapukite” alimwi wakaba mutanjilili wabo.

²² Musankwa umwi wakalinga kupukite nguBenaya wa kuKabusiili mwanaakwe Jeoiyada. Musankwa uyo wakacita milimo iinji itondesha kubula boowa kwakwe. Benaya wakacaya bashilumamba beene beene bobilo ba bene Moabu. Bumwi bushiku kakuli caandwa wakenjila mucikanda akucaya nkalamu.

²³ Musankwa eenka uyo wakacaya mwine Ijipiti mulaamfu kwiinda pamamita obilo alimwi ushimpite uyo wakalinga kucite alisumo. Benaya wakaya wamulwana kaacitebo nkoli. Pakulwana Benaya wakamusompola lisumo lyakwe ilyo akumucaishaako mwiine.

²⁴ Iyi njemilimo itondesha kubula boowa yakacita Benaya mwanaakwe Jeoiyada womwi wa “Bashilumamba Makumi Otatwe Bapukite.”

²⁵ Wakalinga kupukite abuumbi pakati ka “Bashilumamba Makumi Otatwe Bapukite.” nakubi kwaamba ayi taakalinga kucite bulemu bweelene abwa “Bashilumamba Botatwe Bapukite.” Mwaami Defedi wakamupa bunene pakati ka beshikumulindilila.

²⁶ Bashilumamba bamwi bakalinga kupukite mbaaba: Asayelo mukwabo Joabu, Elanani mwanaakwe Dodo wa kuBetileemu,

²⁷ Shamoti wa kuAlodi, aElesi mwine Peloni,

²⁸ Ila mwanaakwe Ikeshi wa kuTekowa, Abiyesa wa kuAnatoti,

²⁹ Sibekayi wa kuUsha, Ilayi wa kuAwowi,

³⁰ Maalayi wa kuNetofa, Eledi mwanaakwe Baana wa kuNetofa,

³¹ Itayi mwanaakwe Libayi wa kuGibiya mucishi ca bene Benjameni, Benaya wa kuPilatoni,

³² Ulayi wa kushinyika shili pafwaafwi aGaashi, Abiyelo wa kuAba,

³³ Asimafeti wa kuBaulumu, Eliyaba wa kuShaaluboni,

³⁴ Ashemu wa kuGisoni, Jonasani mwanaakwe Shage wa kuAla,

³⁵ Aiyamu mwanaakwe Saka wa kuAla, Elifali mwanaakwe Uli,

³⁶ Efeli wa kuMekela aAija wa kuPeloni,

³⁷ Esilo wa kuKamelo, Naalayi mwanaakwe Esibayi,

³⁸ Jowelo mukwabo Natani, Miba mwanaakwe Agili,

³⁹ Seleki wa kuAmoni, Naalayi wa kuBeloti uyo wakalinga kunyamuna shakulwanisha shakwe Joabu mwanaakwe Seluiya,

⁴⁰ Ila wa kuJatiya, Galebu wa kuJatiya,

⁴¹ Uliya mwine Iti, Sabadi mwanaakwe Aalayi,

⁴² Adina mwanaakwe Shisa mwine Lubeni uyo wakalinga mutanjilili wa bene Lubeni alimwi abashilumamba bali makumi otatwe.

⁴³ Anani mwanaakwe Maaka, Joshafati wa kuMitani.

⁴⁴ Usiya wa kuAshitela, Shama alimwi aJeiyelo bana bakwe Otamu wa kuAlowa,

⁴⁵ Jediayelo mwanaakwe Shimuli alimwi amukwabo Jowa wa kuTisi,

⁴⁶ Eliyelo wa kuMaafa, Jelibayi alimwi aJoshafiya bana bakwe Elinaamu, Itima wa kuMoabu,

⁴⁷ Eliyelo, Obedi alimwi aJaasiyelo wa kuSoba.