1 Joni 5 - Baibo Busansulushi Bwa Libuku Ili

Lushomo ndolukoma sha mucishi ca panshi

¹ Uyo woonse ushoma ayi Jesu ngoUsalitwe wakwe Lesa, ngumwanaakwe Lesa. Alakwe uyo woonse usuni ishi, ulisuni amwaana.

² Cishibilo cakwaamba ayi tulisuni bana bakwe Lesa, nkusuna Lesa alimwi akukonkela milawo yakwe.

³ Kusuna Lesa, nkukonkela milawo yakwe. Milawo yakwe Lesa teshi iyumu

⁴ ceebo woonse mwanaakwe Lesa taatoleleli kubisha. Nchetukomeshako cishi ca panshi ndushomo lwesu.

⁵ Ngani weenga wakoma sha mucishi ca panshi? Eenkabo uyo ushoma ayi Jesu ngoMwanaakwe Lesa.

Bukamboni bwapali Jesu Klistu

⁶ NguJesu Klistu mwiine wakesa kwiinda mumaanshi pakubombekwa kwakwe alimwi amubulowa bwa lufu lwakwe. Taakwe kwisabo mumaanshi mweenka, sombi mumaanshi abulowa bwakwe. Mushimu Usalashi ngoopa bukamboni pamakani aya mukwiinga Mushimu uyo ndolushinisho.

⁷ Kuli bakamboni botatwe,

⁸ Mushimu Usalashi, maanshi alimwi abulowa. Shoonse shotatwe shilaamba cintu comwi.

⁹ Tulashoma bukamboni bwa bantu, sombi bukamboni bwakwe Lesa buleendaawo. NguLesa mwiine wakapa bukamboni ubu paMwanaakwe.

¹⁰ Uyo woonse ushoma Mwanaakwe Lesa ulicite bukamboni ubu muli nguwe. Sombi uyo utashomi Lesa, ulapa Lesa bubeshi mukwiinga taakwe kushoma bukamboni Lesa mbwaakapa paMwanaakwe.

¹¹ Bukamboni ubu mbwakwaamba ayi Lesa wakatupa buumi butamaani alimwi buumi ubu bulacanika muMwanaakwe.

¹² Uyo ucite Mwaana, ulicite buumi ubu, sombi uyo utacite Mwanaakwe Lesa, taacite buumi.

Buumi butamaani

¹³ Ndamulembela makani aya nomushoma muMwanaakwe Lesa kwaamba ayi mwishibishe ayi mulicite buumi butamaani.

¹⁴ Tulashoma cancinencine muli Lesa mukwiinga tulishinishite kwaamba ayi ulanyumfwa na twamusenga cintu cili coonse kweelana akuyanda kwakwe.

¹⁵ Tulishi kwaamba ayi ulanyumfwa shoonse nshetumusenga, aboobo tulishi ayi ulatupa shoonse nsheenga twamusenga.

¹⁶ Ono na umwi wabona mubye kaacita cibiibi citatoli kulufu, amupailileeko kwaamba ayi Lesa amupe buumi. Ntokwaambabo bacita shibiibi shitatoli kulufu. Sombi nkocili cibiibi citola kulufu, aboobo nshintokwaamba ayi inga wapailila mubye pali ncico.

¹⁷ Kucita cintu citaluleme cili coonse nkubisha, sombi kuli shibiibi shimwi shitaleteli lufu.

¹⁸ Tulishi kwaamba ayi woonse mwanaakwe Lesa taatoleleli kubisha mukwiinga Jesu Mwanaakwe Lesa ulamulama kabotu. Aboobo Mubiibi taakoonshi kumukumya.

¹⁹ Tulishi kwaamba ayi tuli bakwe Lesa nabi bantu bamwi boonse batokweendeleshekwa aMubiibi.

²⁰ Tulishi kwaamba ayi Mwanaakwe Lesa wakesa akutupa busongo ayi twishibe Lesa wancinencine. Tuli muli Lesa wancinencine ceebo tuli muli Jesu Klistu Mwanaakwe. Uyu ngoLesa wancinencine alimwi mbobuumi butamaani.

²¹ Nobana bangu, amulilame kabotu, mutanoolambila shibumbwabumbwa!