1 Joni 4 - Baibo Busansulushi Bwa Libuku Ili

Mushimu wakwe Lesa amushimu wa Mulwani wakwe Klistu

¹ Nomusunikwi, mutanooshoma muntu woonse waamba ayi ulicite Mushimu wakwe Lesa, sombi mulyeelete kubeelesha akubona na ncakwiila mushimu ngobacite ulaswa kuli Lesa. Mulyeelete kucita boobo ceebo balaluki babeshi balibo cishi coonse.

² Mbulya mbweenga mweshiiba na Mushimu uyo ucite muntu ngwakwe Lesa, uyo woonse waamba ayi Jesu Klistu wakesa mubuntu, ulicite Mushimu wakwe Lesa.

³ Sombi uyo woonse utasumini ayi Jesu wakesa mubuntu taacite Mushimu wakwe Lesa. Muntu wa mushobo wooyu ulicite mushimu uswa kuMulwani wakwe Klistu. Mwakanyumfwa ayi ulaakwisa alimwi bulya mwaali kale mucishi ca panshi.

⁴ Ono mwebo nobana bangu, muli bakwe Lesa alimwi mwabakoma kale balaluki babeshi mukwiinga Mushimu uli muli ndimwe ulicite nkusu kwiinda wooyo uli muli baabo basuni sha mucishi ca panshi.

⁵ Balaluki babeshi aba balisuni sha mucishi ca panshi alimwi anshebaamba nsha mucishi. Ono abalo basuni sha mucishi balabanyumfwila.

⁶ Sombi swebo tuli bakwe Lesa. Uyo woonse ushi Lesa ulatunyumfwila alimwi uyo woonse uteshi wakwe Lesa taatunyumfwili. Anu mboboobo mbotupusanya Mushimu wancinencine awa bubeshi.

Lesa ndusuno

⁷ Nomusunikwi, atusunane mukwiinga lusuno lulaswa kuli Lesa. Uyo woonse usuni mubye ngumwanaakwe Lesa alimwi ulimwishi.

⁸ Uyo woonse utacite lusuno, taamwishi Lesa mukwiinga Lesa ndusuno.

⁹ Lesa wakatondesha ayi ulitusuni kwiinda mukututumina Mwanaakwe wakashalwabo eenka mucishi ca panshi ayi muli nguwe tukabe abuumi.

¹⁰ Lusuno lwancinencine mbulya mbolubete. Teshi kwaamba ayi swebo twakataanguna kusuna Lesa, sombi lakwe wakatusuna akutuma Mwanaakwe kwaamba ayi shibiibi shesu shilekelelwe.

¹¹ Nomusunikwi ono mukwiinga Lesa wakatusuna abuumbi, aswebo tulyeelete kusunana.

¹² Taaku muntu wakabonawo kale Lesa. Sombi na tulisunene, cilaamba ayi Lesa ulekala muli ndiswe alimwi lusuno lwakwe lulaboneka cancinencine muli ndiswe.

¹³ Tulishinishite ayi tuli muli Lesa, alakwe muli ndiswe mukwiinga wakatupa Mushimu wakwe.

¹⁴ Peculu lya waawo twakabona akulwiitako bamwi ayi Lesa Ishiwesu wakatuma Mwanaakwe ayi abe Mupulushi wa cishi ca panshi.

¹⁵ Uyo woonse usumina patuba ayi Jesu nguMwanaakwe Lesa, ulekala muli Lesa, alakwe Lesa ulekala muli nguwe.

¹⁶ Aboobo swebo tulishi alimwi tulashoma ayi Lesa ulitusuni. Lesa ndusuno alimwi uyo woonse ukala mulusuno uli muli Lesa, alakwe Lesa uli muli nguwe.

¹⁷ Anu mboboobo lusuno mboluba lwancinencine muli ndiswe kwaamba ayi tukeemikane cakubula boowa pameenso akwe Lesa pabushiku bwakoomboloshekwa. Mbweshi cikabe ubo mukwiinga buumi bwesu mucishi ca panshi bulibo anga mbwakwe Klistu.

¹⁸ Muntu ucite lusuno taaloondi mukwiinga lusuno lwancinencine lulamana boowa boonse. Ceebo na muntu kaaloonda cilaamba ayi ulicite mulandu alimwi lusuno taluna kuba lwancinencine muli nguwe.

¹⁹ Tulisunene mukwiinga Lesa ngowakataanguna kutusuna.

²⁰ Na umwi waamba ayi, “Lesa ndimusuni,” sombi kaapatite mubye, ngumubeshi. Anu inga wasuna buyani Lesa ngwaatana kubonaawo na kaapatite mubye ngwaabona?

²¹ Mulawo Klistu ngwaakatupa ngwakwaamba ayi uyo usuni Lesa ulyeelete kusuna amubye.