1 Joni 3 - Baibo Busansulushi Bwa Libuku Ili

Bana bakwe Lesa

¹ Amubone lusuno lwa Bamashali besu bakulukulu mbolubete kukomena pali ndiswe! Cakutubanda ayi tuli bana bakwe Lesa! Ncakwiila tuli bana bakwe. Bantu ba mucishi ca panshi tabatwishi ceebo Lesa tebakalinga kumwishi.

² Nobeensuma, bulya tuli bana bakwe Lesa, sombi tacishibikitwe kabotu mbweshi tukabe. Sombi tulishi kwaamba ayi na Klistu akaboneke, tulaakuba bweenka mbuli nguwe mukwiinga tulaakumubona bweenka mbwaabete.

³ Uyo woonse ucite lushomo akulangila muli Klistu ulalisalasha mwiine bweenka mbuli Klistu mbwaasalalite.

⁴ Uyo woonse ubisha, ulasotoka mulawo wakwe Lesa mukwiinga kubisha nkusotoka mulawo.

⁵ Kweelana ambomwishi, Klistu wakesa mukukusha shibiibi, alimwi muli nguwe taamu cibiibi nabi comwi.

⁶ Aboobo taaku muntu uli muli Klistu utolelela kubisha. Uyo utolelela kubisha taakwe kumubonaawo nabi kumwishiba.

⁷ Nobana bangu, kutabi muntu nabi womwi weshi amucenjeeke. Uyo ucita shiluleme, uliluleme bweenka mbuli Klistu mbwaaluleme.

⁸ Uyo woonse ucita shibiibi uli kulubasu lwa Mubiibi ceebo lakwe Mubiibi ulabisha kuswabo kumatalikilo. Mwanaakwe Lesa wakeshita mukunyonyoola sheeshi sheenka shicita Mubiibi.

⁹ Woonse mwanaakwe Lesa taatoleleli kubisha ceebo mibo yakwe Lesa ili muli nguwe. Mukwiinga Lesa ngoIshi, taakoonshi kutolelela kubisha.

¹⁰ Anu bupusano buliiwo pakati ka bana bakwe Lesa abana ba Mubiibi mboobu. Uyo woonse utaciti shiluleme nabi utasuni mubye, teshi mwanaakwe Lesa.

Kusunana

¹¹ Makani ngomwakanyumfwa kuswa kumatalikilo ngakwaamba ayi tulyeelete kusunana.

¹² Tatweelete kuba anga nguKaini uyo wakalinga kulubasu lwa Mubiibi akucaya Abelo mwanike wakwe. Ino nciinshi ncaakamucaila? Mukwiinga nshaakalinga kucita lakwe mwiine shakalinga shibiibi, sombi mwanike wakwe kaacita shiluleme.

¹³ Paceebo ceeco tamweelete kukankamana nobamakwesu, na bantu ba mucishi ca panshi bamupata.

¹⁴ Tulishi kwaamba ayi twakaswa mulufu akwinjila mubuumi ceebo tulisunene. Uyo utasuni mubye ucili mulufu.

¹⁵ Uyo woonse upatite mubye ngumucayi alimwi mulishi kwaamba ayi taaku mucayi ucite buumi butamaani muli nguwe.

¹⁶ Klistu wakaaba buumi ceebo ca ndiswe, munshila iyi tuleshiba lusuno mbolubete. Aboobo aswebo tulyeelete kwaaba buumi bwesu ceebo ca babyeesu.

¹⁷ Na mubile wabona umwi utacite shiyandika mubuumi, sombi wabula kumucafwa, inga waamba buyani ayi lusuno lwakwe Lesa luli muli nguwe?

¹⁸ Nobana bangu, lusuno lwesu lutabibo lwa pamulomo, sombi tulyeelete kubonesha lusuno lwancinencine mumicito yesu.

Kwiimikana pameenso akwe Lesa cakubula boowa

¹⁹ Anu mboboobo mbweenga tweshiba ayi tuli kulubasu lwa lushinisho alimwi ayi inga tweemikana pameenso akwe Lesa cakubula boowa.

²⁰ Na myoyo yesu yatushinina, tuleshiba ayi lushibo lwakwe Lesa ndunene kwiinda lwa myoyo yesu alimwi ayi lakwe ulishi shintu shoonse.

²¹ Aboobo nomusunikwi, na myoyo yesu teetushinini, nkokwaamba ayi inga tweemikana pameenso akwe Lesa cakubula boowa.

²² Alimwi Lesa ulatupa cili coonse nceenga twamusenga ceebo tulakonkela milawo yakwe akucita shimukondelesha.

²³ Lesa wakatupa mulawo wakwaamba ayi tushome muMwanaakwe Jesu Klistu alimwi akusunana kweelana aKlistu mbwaakatulwiita.

²⁴ Uyo woonse ukonkela milawo yakwe Lesa, ulekala muli Lesa, alakwe muli nguwe. Tulishi kwaamba ayi Lesa ulekala muli ndiswe ceebo ca Mushimu Usalashi uyo ngwaakatupa.