1 Joni 2 - Baibo Busansulushi Bwa Libuku Ili

Klistu ngushikutucafwa

¹ Nobana bangu, ndamulembela makani aya kwaamba ayi mutakabishi. Sombi na umwi wabisha, tulicite shikutucafwa utwaambililaako kuli Ishiwesu, uyo nguJesu Klistu ululeme.

² Lakwe ngomulambu Lesa mwaalekelelela shibiibi shesu alimwi teshibo sheesu sheenka, sombi ashibiibi sha bantu boonse.

³ Na tulakonkela milawo yakwe Lesa, anu inga tweshiba kwaamba ayi tulimwishi.

⁴ Uyo waamba ayi Lesa ndimwishi, sombi kaatakonkeli milawo yakwe, ngumubeshi alimwi lushinisho talubete muli nguwe.

⁵ Sombi uyo ukonkela maswi akwe Lesa, lusuno lwakwe Lesa luli muli nguwe cakumaninina. Mboboobo mbotwishiba ayi tuli muli nguwe cancinencine.

⁶ Uyo waamba ayi uli muli Lesa, alakwe ulyeelete kwikala bweenka bwakekala Jesu Klistu.

Mulawo upya

⁷ Nomusunikwi, nshintoomulembela mulawo upya, sombi ngukulukulu uyo ngomwakalinga kwishi kuswa kumatalikilo. Mulawo uyu ukulukulu ngomakani eenka ngomwakanyumfwa.

⁸ Nakubi boobo mulawo uyu ngoontoomulembela ngupya mukwiinga lushinisho lwa nguwo lulaboneka muli Klistu alimwi amuli ndimwe. Ono munshinshe utooya cimana alimwi mumuni wancinencine watalika kale kubala.

⁹ Uyo woonse waamba ayi uli mumumuni, sombi kaapatite mubye, ucili mumunshinshe abobulya.

¹⁰ Uyo woonse usuni mubye uli mumumuni, aboobo muli nguwe taamu ceenga calengesha umwi kubisha.

¹¹ Sombi uyo upatite mubye uli mumunshinshe. Uleenda muli nguwo alimwi ankwaatooya taakwishi ceebo munshinshe wamulengesha kupofola.

¹² Ntoolembela ndimwe nobana bangu mukwiinga Lesa ulamulekelela shibiibi shanu ceebo cakwe Klistu.

¹³ Ntoolembela ndimwe nobamashali bangu basankwa mukwiinga mulimwishi uyo wakalingaako kuswabo kumatalikilo. Ntoolembela ndimwe, nobasankwa bacikula bwangu ceebo mwakoma Mubiibi ulya.

¹⁴ Ntoolembela ndimwe nobana bangu ceebo mulishi Ishiwesu. Ntoolembela ndimwe nobamashali bangu basankwa ceebo mulimwishi uyo wakalingaako kuswabo kumatalikilo. Ntoolembela ndimwe nobasankwa bacikula bwangu ceebo muli bayumu amaswi akwe Lesa ali muli ndimwe alimwi mwakoma Mubiibi ulya.

¹⁵ Mutasuni cishi ca panshi alimwi ashintu shoonse shiliimo. Ceebo na muntu wasuna cishi ca panshi, nkokwaamba ayi taasuni Ishiwesu.

¹⁶ Mukwiinga shoonse sha mucishi ca panshi, nkokwaamba ayi isho mubili nshookumbwa, shoonse bantu nshebakumbwa na bashibona alimwi asheesho shoonse shilengesha bantu kulisumpula, tashiswi kuli Ishiwesu, sombi shilaswa mucishi ca panshi.

¹⁷ Cishi alimwi ashintu shoonse shiliimo isho bantu nshebakumbwa shitooya bumana, sombi uyo ucita kuyanda kwakwe Lesa, ulaba abuumi butamaani.

Mulwani wakwe Klistu

¹⁸ Nobana bangu, cino nciindi camamanino! Mwakalwiitwa kwaamba ayi Mulwani wakwe Klistu ulaakwisa. Sombi ono balwani baanji bakwe Klistu baboneka kale, aboobo tuleshiba ayi cino nceciindi camamanino.

¹⁹ Bantu aba bakalinga aswebo kale kale, sombi tebakalinga bamulikoto lyesu cancinencine. Mukwiinga nebakalinga bamulikoto lyesu, naakwiinga kabacili aswebo. Sombi bakapatuka kwaamba ayi baboneke patuba ayi taaku nabi womwi pakati kabo wakalinga mulikoto lyesu cancinencine.

²⁰ Sombi mwebo Klistu wakamupa Mushimu Usalashi, aboobo mulishi shalushinisho shoonse.

²¹ Nshintoomulembela makani aya mukwiinga shalushinisho tamushishi, sombi mukwiinga mulishishi alimwi mulishi ayi taaku bubeshi buswa mulushinisho.

²² Ono mubeshi ngani? Ngooyo utasumini ayi Jesu ngoUsalitwe wakwe Lesa. Uyo ukaka Ishiwesu aMwaana ngoMulwani wakwe Klistu.

²³ Mukwiinga uyo woonse ukaka Mwaana, wakaka aIshi. Uyo woonse usumina Mwaana, wasumina aIshi.

²⁴ Sombi mwebo, makani ngomwakanyumfwa kuswa kumatalikilo akalilile mumyoyo yanu. Na cikacitike boobo, ingayi amwebo mulaakwikalilila mubwanabwankashi bwa Mwaana alimwi aIshi.

²⁵ Ncakwiila Klistu ncaakatushomesha, mbuumi butamaani.

²⁶ Ntoomulembela makani aya ceebo ca baabo basuni kumucenjeeka.

²⁷ Sombi mwebo, Klistu wakamupa Mushimu Usalashi ukala muli ndimwe. Aboobo takuyandiki aumwi mufundishi mukwiinga Mushimu Usalashi ngomwakatambula ulamwiisha shoonse alimwi nshaamwiisha nshalushinisho, teshi shabubeshi. Paceebo ceeco, kweelana ambwaakamwiisha, amukalilile muli Klistu.

²⁸ Ee, nobana bangu, amukalilile muli nguwe, kwaamba ayi pabushiku ndyeshi akese, tukabule kunyumfwa boowa ansooni.

²⁹ Ono mukwiinga mulishi ayi Klistu uliluleme, mulyeelete kwishiba alimwi ayi uyo woonse ucita shiluleme ngumwanaakwe Lesa.