1 Bene Tesalonika 5 - Baibo Busansulushi Bwa Libuku Ili

Kulibambila kwisa kwa Mwaami Jesu

¹ Ono nobamakwesu, taciyandiki ayi tumulembele shabushiku Mwaami Jesu ndyeshi akese panshi alimwi.

² Ceebo mwebo nobeene mulishi kale kabotu kwaamba ayi Bushiku bwakwisa kwa Mwaami Jesu, bulaakushikila cakutabwiingashila bweenka mwiipi mbweesa mashiku.

³ Bantu baakutalika kwaamba ayi, “Shintu shoonse shaba kabotu, taaku acakulisukama,” mapensho alensha boowa ndyeshi akabashikile! Alaakwisa cakuteengashila bweenka mbuli mwanakashi mbwaanyumfwa kucisa na mumala mwabuka, ncakwiila taaku eshi akacice.

⁴ Sombi mwebo nobamakwesu, tamubete mumunshinshe. Aboobo Bushiku ubo tabweelete kushika cakutabwiingashila mbuli mbociba pamwiipi.

⁵ Mwebo noonse muli bantu ba mumumuni bekala anga nshintu shoonse shilacitwa lumwi lubala. Tatubete anga mbantu bacita shicitwa mashiku nabi mumunshinshe.

⁶ Ono aboobo tutabi bantu baliiba mbuli bucita bantu bamwi, sombi tulyeelete kucenjela akulitibuka.

⁷ Mukwiinga abo boona, baloona mashiku alimwi abo bakolwa, balakolwa mashiku.

⁸ Ono swebo tuli bantu bacita shintu sha mumumuni alimwi tulyeelete kulitibuka. Tulyeelete kufwala lushomo alusuno ayi shibe anga ncakufwala ca ceela ca pacaamba, acalo ncimpoompo cesu cibe kulangila kwakwaamba ayi tulaakupuluka.

⁹ Lesa taakwe kutusala ayi tukabone bukali bwakwe, sombi kwaamba ayi tukapulushikwe kwiinda muMwaami Jesu Klistu.

¹⁰ Lakwe wakatufwita kwaamba ayi tukekaale anguwe. Tacicite mulandu nabi tukacanike katuli boomi nabi katufwite, aakwisa.

¹¹ Aboobo kamuyuminishanya akucafwana womwi awomwi bweenka mbuli mbomutoocita.

Maswi akweelaako

¹² Twamusenga nobamakwesu kwaamba ayi mupe bulemu kubaabo batoosebensa cankusu pakati kanu, abo bamutanjilila akumulwiita mbomweelete kucita mubuKlistu.

¹³ Amubatondeshe bulemu buunji alusuno ceebo ca mulimo wabo. Amwikale muluumuno lyoonse.

¹⁴ Twamusenga alimwi nobamakwesu, ayi mucenjeshe batolo. Amuyumyeyumye beshiboowa, mucafwe balefukite alimwi bantu boonse kamubakalikila myoyo.

¹⁵ Mutasuminishi bantu kuboosha cibiibi kucibiibi, sombi mushiindi shoonse amweeleshe cankusu kucafwa babyaanu abantu bamwi boonse.

¹⁶ Amusangalale lyoonse.

¹⁷ Amupaile kuli Lesa lyoonse.

¹⁸ Kamulumba Lesa mushintu shoonse. Ici ncaasuni Lesa kwaamba ayi mucite kweelana ambomuli muli Klistu Jesu.

¹⁹ Mutakashi ncito ya Mushimu Usalashi.

²⁰ Mutasebaanyi makani ayo ashimikila baabo baambililaako Lesa,

²¹ sombi mubone kwaamba ayi na makani ayo alaswa kuli Lesa. Lyalo mwakonkela aayo abotu

²² akulitalamusha kushibiibi sha mushobo uli woonse.

²³ Ono Lesa uyo utulengesha kwaamba ayi twikale muluumuno, amusalashe cakumaninina akulengesha buumi bwanu boonse kubula kampenda pakwisa Mwaami wesu Jesu Klistu.

²⁴ Uyo wakamwiita ulashomeka alimwi ulaakumucitila cintu ici.

²⁵ Aswebo nobamakwesu, kamutupaililaako.

²⁶ Mwaanshe bashominyineesu calusuno lwiine lwiine.

²⁷ Muliina lya Mwaami Jesu ndamwaambila ayi nkalata iyi mwiibelenge kubashomi boonse.

²⁸ Luse lwa Mwaami Jesu Klistu lube amwebo.