1 Bene Tesalonika 4 - Baibo Busansulushi Bwa Libuku Ili

Buumi bukondelesha Lesa

¹ Cakweelaako nobamakwesu, mwebo mwakeeya kuswa kuli ndiswe makani aamba mbomweelete kwikala buumi bukondelesha Lesa alimwi ncakwiila mbomwikala. Ono bulya twamusenga camaansa obilo muMwaami Jesu kwaamba ayi mwiindilisheewo apo

² ceebo mulishi milasho iswa kuMwaami Jesu iyo njetwakamupa.

³ Lesa ncaasuni ncakwaamba ayi mube abuumi busalalite, nkokwaamba ayi mulyeelete kusoonoka kubufuule bwa mushobo uli woonse.

⁴ Musankwa amusankwa ulyeelete kwaamba ayi ekale amukaakwe munshila isalalite alimwi yabulemu,

⁵ kuteshi mulunkumbwa lwa mubili anga mbantu bakunsengwe bateshi Lesa.

⁶ Mucikani ici kutabi muntu ubishisha mushominyina nabi kumulenga buluya. Twakamucenjeshawo kale ayi pacikani ici Lesa ulaakutondesha bukali kubantu bacita sheesho.

⁷ Mukwiinga Lesa taakwe kutwiitila bufuule, sombi kuba abuumi busalalite.

⁸ Ono aboobo uyo woonse ukaka kwiisha uku taakakilibo muntu, sombi Lesa uyo umupa Mushimu wakwe Usalashi.

⁹ Taapu ceebo nceenga twalembelawo shalusuno lwanu kubashominyinaanu. Lesa wamwiisha kale mbomweelete kusunana.

¹⁰ Alimwi ncakwiila mulisunene abuumbi abashominyinaanu boonse bene Makedoniya. Ono twamusenga nobamakwesu kwaamba ayi mwiindilisheewo apo.

¹¹ Muyeeyo wanu lyoonse aube wakwikala buumi bwa luumuno, kwiilibala ncootoocita akulicanina shiyandika bweenka mbotwakamulwiitawo kale.

¹² Kwiinda mukucita boobo, mulaakubona kwaamba ayi bakunsengwe balaakutalika kumupa bulemu alimwi taaku ngweshi mukancinkemo manungo ayi ngweshi anoomupa nshemuyanda.

Kwisa kwa Mwaami

¹³ Ono nobamakwesu, tulisuni ayi mwishibe lushinisho pabaabo bakafwa, kwaamba ayi mutanookuungumana mbuli bantu batacite ncebatoolangila.

¹⁴ Tulashoma ayi Jesu wakafwa akubuka kuswa kubafu alimwi ayi abo bakafwa kabashoma muli Jesu, Lesa ulaakubabusha kuswa kubafu akubatola kwiculu pantu pomwi aJesu.

¹⁵ Ono tutoomulwiita kwiisha kwa Mwaami Jesu mwiine. Ncakwaamba ayi, sobamwi sweshi tukacanike katuli boomi Mwaami Jesu aakwisa, teshi tukeendile bafwite kumukumanya.

¹⁶ Bantu balaakunyumfwa koolobesha kunene, liswi lya munjelo munene alupeenga lwakwe Lesa. Lyalo Mwaami Jesu ulaakuswa kwiculu kwisa panshi. Mpeeke abo bakafwa kabashoma muli Jesu Klistu balaakutaanguna kubuka kuswa kubafu.

¹⁷ Mpomunyaawo sobamwi sweshi tukacanike katuli boomi paciindi ico, Lesa ulaakutubunganya pantu pomwi ambabo mumakumbi ayi tukakumane aMwaami Jesu mwiculu. Anu ubo mbweshi tukekaale aMwaami Jesu lyoonse alyoonse.

¹⁸ Ono aboobo amuyuminishanye mumaswi aya.