1 Bene Tesalonika 2 - Baibo Busansulushi Bwa Libuku Ili

Milimo Paulo njaakacita kuTesalonika

¹ Nobamakwesu, mwebo nobeene mulishi kwaamba ayi nditwakamufwakashisha ncetwakeendela uko cakacitika.

² Mulishi bene Filipi mbobakatupensha akutusebaanya cilensha nsoni mundabala yabo, katutana kwisa muTesalonika umo. Nakubi kwaamba ayi bantu baanji bakalinga kusuni kwiimika mulimo wesu, Lesa wesu wakatuyumya myoyo kwaamba ayi tukonshe kumulwiita Makani Abotu aswa kuli nguwe.

³ Nditwakalinga kumushimikila Makani Abotu, tatukwe kusebensesha miyeeyo imwi ibiibi nabi kubeca bantu.

⁴ Sombi lyoonse tulaamba ceeco cisuni Lesa mukwiinga wakasuminisha ayi tulyeelete kupekwa milimo yakushimikila Makani Abotu. Aboobo tatushimikili kwaamba ayi tukondeleshe bantu, sombi Lesa uyo usunka myoyo yesu.

⁵ Mulishi kabotu ayi tatukwe kwisa kuli ndimwe amaswi akumukondeleshabo, nabi kwaamba ayi tucane mpindu kuswa kuli ndimwe. Lesa ulishi kabotu anshetwakacita.

⁶ Tatukwe kuyanda ayi muntu uli woonse atulumbaishe, mwebo nabi bamwi.

⁷ Ee, mbuli batumwi bakwe Klistu necakalulamabo kumusenga shintu, sombi swebo twakalibombya pakati kanu bweenka mbuli mushali mwanakashi mbwaalama bana bakwe.

⁸ Peculu lya waawo ceebo cakumusunisha twakalinga kulibambite kuteshibo kumwishibisha shaMakani Abotu aswa kuli Lesa, sombi akupa buumi bwesu sobeene. Ncakwiila twakalinga kumusuni abuumbi!

⁹ Nobamakwesu, muliingashite mbotwakasebensa cankusu? Twakalinga kusebensa malumwi amashiku kwaamba ayi tutamupenshi mushintu nshetwakalinga kuyanda kusebensesha, nditwakalinga kumushimikila Makani Abotu aswa kuli Lesa.

¹⁰ Mwebo aLesa mwiine, muli bakamboni besu kwaamba ayi bwikaalo bwesu pakati kanu nobashomi, bwakalinga kusalalite, bululeme alimwi butacite kampenda.

¹¹ Mulishi kwaamba ayi womwi awomwi pakati kanu, twakalinga kumucitabo anga ngumushali musankwa mbwaacitila bana bakwe mwiine.

¹² Twakalinga kumuyuminisha akumwaambila cankusu ayi mulyeelete kwikala bwikaalo ubo bukondelesha Lesa, uyo umwiita kwaamba ayi mukenjile muBweene amubulemu bwakwe.

¹³ Ono tulalumba Lesa cakutaboola pesule ceebo ndimwakatambula maswi akwe Lesa ayo ngomwakanyumfwa kuli ndiswe, tamukwe kwaatambula anga aswa kumuntu, sombi bweenka mbwaabete, ncakwiila ayi ngakwe Lesa. Ndushinisho, Maswi akwe Lesa aliciteeko kusandula buumi bwanu mwebo nobashomi.

¹⁴ Ceebo nobamakwesu bweenka bwakapenga shoonde shakwe Lesa mucishi ca Judeya, mbweeke ubo amwebo mbomwakapenga. Bene mishaanu bakamupensha bweenka mbobakapenshekwa kubaJudanyinaabo.

¹⁵ Mpeeke baJuda aba bakacaya Mwaami Jesu abalaluki bakulukulu alimwi coonoono apa bakapensha ndiswe! Ndushinisho Lesa ulikalalite abuumbi pabantu abo. Ncakwiila mbalwani ba bantu boonse!

¹⁶ Bakeelesha kutukasha kushimikila Makani Abotu kubaswamashi bakunsengwe ayo Lesa ngweenga wabapulushishaamo. Paceebo ceeco balibunjikila shibiibi shabo shoonse, cakwaamba ayi bulya bukali bwakwe Lesa bwabashikila.

Kuyandisha kwakwe Paulo kufwakashisha bene Tesalonika alimwi

¹⁷ Sombi nobamakwesu, nakubi kwaamba ayi twakapansanishikwa amwebo ciindi ciniinibo, kumubili kuteshi mumiyeeyo, kwiinda mukumuyeeya bunene twakeelesha nshila shiinji kwaamba ayi tubonane amwebo alimwi.

¹⁸ Twakalinga kusuni kubolela kuli ndimwe, sombi nebo nePaulo ndeelesha mankanda aanji kwisa kooko, nakubi boobo Satana walinga kutwiinda kunembo.

¹⁹ Mwebo ndimwe mwalengesha kwaamba ayi tube akulangila, kusangalala alimwi akwaamba cakutatonsha cikani ca kupuluka kwesu pameenso aMwaami wesu Jesu Klistu bushiku aakwisa.

²⁰ Ncakwiila mulalengesha ayi twaambe mbotukondetwe pali ndimwe akusangalala.