1 Bene Tesalonika 1 - Baibo Busansulushi Bwa Libuku Ili

¹ Ndime Paulo pantu pomwi aSailasi alimwi aTimoti. Tutoolembela ndimwe nocoonde ca kuTesalonika nomuli mumaansaakwe Lesa Ishiwesu aMwaami wesu Jesu Klistu. Luse aluumuno shibe amwebo.

Buumi alushomo lwa bene Tesalonika

² Tulalumba Lesa lyoonse ceebo canu noonse alimwi lyoonse tulamwiibaluka mumipailo yesu.

³ Ceebo tuleebaluka pameenso akwe Lesa Ishiwesu, nshemwakacita ceebo cakushoma muli Jesu, mbomwakasebensa cankusu ceebo cakumusuna alimwi ambomutoolangila Jesu Mwaami wesu cakutaboola pesule.

⁴ Nobamakwesu, tulishi kwaamba ayi Lesa ulimusuni abuumbi alimwi ayi wakamusala ayi mube bantu bakwe.

⁵ Ceebo twakamuletela Makani Abotu, cakutasebensesha maswibo, sombi ankusu sha Mushimu Usalashi alimwi cakutatonsha lushinisho lwa ngawo. Mulishi mbotwakalinga kucita nditwakalinga amwebo. Shoonse ishi ninshila shakumucafwilaamo.

⁶ Mwakakonkela bwikaalo bwesu abwa Mwaami Jesu. Nabi mwakalinga mumapensho anene, mwakatambula Makani Abotu cakusangalala uko kuswa kuMushimu Usalashi.

⁷ Aboobo bwikaalo bwanu bwakaba cikoshanyo ca bwikaalo bubotu kubashomi boonse ba kuMakedoniya aAkeya.

⁸ Bantu baanji baanji, kuteshibo muMakedoniya amuAkeya, bakanyumfwa Makani Abotu apali Jesu. Sombi bakanyumfwa ampuuwo ya lushomo lwanu muli Lesa yamwaika kumisena imwi yoonse. Aboobo taaku nceenga twaambaawo pacikani ico.

⁹ Bantu boonse aba balaamba mbuli mbomwakatutambula kabotu nditwakamufwakashisha uko, ambomwakacileka kulambila shibumbwabumbwa kwaamba ayi mulambile akusebenselabo Lesa wancinencine, muumi.

¹⁰ Peculu lya waawo mutoolindilila Mwanaakwe kuswa kwiculu wiitwa ayi Jesu, uyo Lesa ngwaakabusha kuswa kubafu. Jesu uyo ngootufuna kuswa kubukali bwakwe Lesa.