1 Bene Kolinto 8 - Baibo Busansulushi Bwa Libuku Ili

Mwiipusho wa pashakulya shipekwa kushibumbwabumbwa

¹ Ono kweelana amwiipusho ngomwakalemba pashakulya shipekwa kushibumbwabumbwa, ndushinisho kwaamba ayi soonse tulicite lushibo. Ono lushibo ulo lweenka lulalengesha bantu kulisumpula, sombi lusuno ndoluyaka.

² Uyo woonse uyeeya ayi ulicite lushibo pacintu cili coonse, taakwe kuba alushibo kweelana ambwaaelete.

³ Sombi muntu usuni Lesa ulishibikitwe kuli nguwe.

⁴ Ono aboobo pamakani akulya shakulya shipekwa kushibumbwabumbwa, tulishi ayi shibumbwabumbwa tashicite ncito. Alimwi tulishi ayi kulibo Lesa womwi.

⁵ Nakubi kwaamba ayi kuli beetwa ayi balesa mwiculu nabi panshi, ee mbaanji, abalo beetwa ayi baami, mbaanji.

⁶ Sombi swebo tulicitebo Lesa womwi, Ishiwesu wakalenga shintu shoonse alimwi ngowooyo ngotushiitile. Ncakwiila tulicitebo Mwaami womwi, Jesu Klistu. Lesa wakalenga shintu shoonse kwiinda muli nguwe alimwi tuli boomi ceebo ca Mwaami uyu.

⁷ Sombi teshi boonse beshi makani aya. Bamwi bakashibila kulambila shibumbwabumbwa, abobulya na balya cakulya camushobo uyo, balacibona anga capekwa kushibumbwabumbwa. Ono ceebo cakutonsha kwabo, cakulya ico cilababisha.

⁸ Cakulya tacitusenyi pafwaafwi aLesa. Taaku ncetusowekelwa na twabula kulya, nabi cicanwa kwiinda mukulya.

⁹ Ono amucenjele kwaamba ayi milimo ya lwaanguluko lwanu itabi mfumpu kubantu batacite lushomo lunene.

¹⁰ Mukwiinga na muntu ucite lushomo luniini, wabona ndiwe nowaamba ayi ulicite lushibo, koolya muŋanda ya shibumbwabumbwa, sa ici inga tacimulengeshi kuyuminishikwa kulya shakulya shipekwa kushibumbwabumbwa?

¹¹ Paceebo ceeco uyo ucite lushomo luniini, mukwabesu uyo Klistu ngwaakafwita, ulaakunyonyooka ceebo ca lushibo lwako!

¹² Ndimubishisha bamakwabanu muli Klistu mushobo uyu, akupensha beshikutonsha, mulabishisha Klistu.

¹³ Aboobo, na cakulya calengesha mukwesu muli Klistu kubisha, teshi nkalyewo nyama alimwi kwaamba ayi ntakabishishi mukwesu uyo.