1 Bene Kolinto 7 - Baibo Busansulushi Bwa Libuku Ili

Makani a cikwati

¹ Ntooyanda nkumbule miipusho njemwakanembela. Kuteeba ncibotu.

² Ono ceebo cakuloonda bufuule musankwa woonse ulyeelete kuba amukaakwe, alakwe mwanakashi ayibaye.

³ Musankwa ulyeelete kucita mulimo wakwe woonse mbuli mbwaaelete pamukaakwe alakwe mwanakashi ulyeelete kucita bweenka ubo kuli ibaye.

⁴ Mubili wa mwanakashi teshi waakwe eenka, sombi ngwa ibaye alakwe. Mbweeke ubo alakwe musankwa teshi ngomwine mubili eenka, sombi amukaakwe.

⁵ Tamweelete kukakilana, sombibo na mwasuminishanya kwiimikana kwaciindi ciniini kwaamba ayi mubebo aciindi cakupaila. Camanabo ciindi cakupaila mulyeelete kutalika kukumana alimwi kwaamba ayi Satana atamusunki ceebo cakwaalilwa kulicata.

⁶ Ici ncendaamba teshi kwaamba ayi ntoomupa mulawo, sombi ntoomupabo lifunde.

⁷ Necakabota naakwiinga bantu boonse balinga mbuli ndime. Ono ceebo cakwaamba ayi muntu womwi awomwi ulicite cipo cakwe kuswa kuli Lesa, umwi aumwi ulicite cipo camushobo upusene amubye.

⁸ Ono kubatabete mushikwati abamukalubinje banakashi maswi angu ngaaya. Cili kabotu kwaamba ayi kabashiitebo bweenka ubo mbuli ndime.

⁹ Sombi na tookoonshi kulicata, ulyeelete kweebabo na kweebwa, ceebo ncibiibi kunoopengabo alunkumbwa lwa mubili.

¹⁰ Kubantu bali mucikwati, ntoomupa mulawo uyo uteshi wangu, sombi ngwa Mwaami. Mwanakashi taaelete kulekana aibaye.

¹¹ Sombi na wacita boobo, ulyeelete kwikalabo bushike. Na caala boobo, ulyeelete kubooshanya aibaye, alakwe ibaye taaelete kumukaka, sobwe.

¹² Kubamwi boonse ntokwaamba ayi (nebo kuteshi Lesa), na musankwa ushoma ulikwete mwanakashi utashomi, usuminite kwikala anguwe, taaelete kuleka mwanakashi uyo.

¹³ Alimwi na mwanakashi ushoma ulikwetwe kumusankwa utashomi, usuminite kwikala anguwe, taaelete kumukaka.

¹⁴ Ceebo musankwa utashomi ulatambulwa pameenso akwe Lesa kwiinda mukuba pomwi amukaakwe ushoma. Alakwe mwanakashi utashomi ulatambulwa mukuba pomwi aibaye ushoma. Necatalinga boobo naakwiinga bana babo baba anga mbakunsengwe. Ono kweelana ambocibete Lesa ulabatambula.

¹⁵ Nakubi boobo na utashomi pabeebene wayeeya kukaka mubye ushoma, acite bweenka ubo. Na cacitika boobo, ushoma uyo wacaala, musankwa nabi mwanakashi, ulyaangulukite kucita mbwaasuni. Lesa wakamwiita kwaamba ayi mube muluumuno.

¹⁶ Ono webo omwanakashi ushoma, ulishi buyani ayi ulaakulengesha ibayo kupulushikwa? Na webo omusankwa ushoma, ulishi buyani ayi ulaakulengesha mukaako kupulushikwa?

Kwikala kweelana ancakamwiitila Lesa

¹⁷ Muntu womwi awomwi ulyeelete kwikala bweenka mbuli cipo ncaakapekwa kuswa kuli Lesa alimwi kweelana abuumi ubo Lesa mbwaakamwiitilaamo. Ili ndyelifunde ndyeempa mushoonde shoonse.

¹⁸ Na umwi muntu wakeetwa kuli Lesa kaapalwitwe, taaelete kukusha citondesho cakupalulwa uko. Alakwe umwi na wakeetwa kuli Lesa kaatapalwitwe taaelete kupalulwa.

¹⁹ Ceebo kupalulwa nabi kutapalulwa taaku mbocibete. Cinene nkulama milawo yakwe Lesa.

²⁰ Muntu woonse ulyeelete anooli bweenka mbwaakalinga ndyaakatambula bwiite bwakwe Lesa.

²¹ Sa wakalinga musha Lesa ndyaakakwiita? Ono utalisukami. Sombi na wacaana ciindi cakwaangululwa, cisebenseshe.

²² Ceebo muntu uyo Mwaami Jesu ngwaakeeta kaali musha, ngumuntu waangulukite kuli nguwe. Mbweeke ubo muntu utabete musha wakeetwa aKlistu, ngumusha wakwe.

²³ Mwebo Lesa wakamuula amweelo unene, aboobo tamweelete kuba basha ba bantu.

²⁴ Nobamakwesu, muntu woonse ulyeelete kunoolibo shicibusa aLesa mububo ubo mbwaakalingaamo Lesa kaatana kumwiita.

Miipusho imwi pamakani a cikwati

²⁵ Ono kweelana amwiipusho ngomwakeepusha pabanakashi batana kweebwa, nshiciteewo mulawo uswa kuMwaami Jesu. Sombi ntoopabo muyeeyo wangu kweelana mboondi muntu weelete kushomekwa ceebo ca nkumbu sha Mwaami.

²⁶ Ceebo ca mapensho aliiwo bulya, ndayeeya kwaamba ayi ncibotu muntu kwikalabo cakutenjila mucikwati.

²⁷ Sa ulyeebete? Utayeeyi kuleka mukaako. Sa tooebete? Utayeeyi kweeba, sobwe.

²⁸ Nakubi boobo na musankwa weeba, taakwe kubisha kuli Lesa. Alakwe mwanakashi utana kweebwaawo, ono weebwa, taakwe kubisha. Sombi nshindalinga kusuni kwaamba ayi mwiinde mumakatasho ali mushikwati shinoonshiku.

²⁹ Ncentoomulwiita, nobamakwesu, ncakwaamba ayi ciindi camana. Bulya beebete balyeelete kwikala anga tabeebeteewo.

³⁰ Abo batoolila balyeelete kwikala anga tabatoolila. Abo basangalete balyeelete kwikala anga tabasangalete. Abo baula cimwi cintu, bekale anga teshi cabo beene.

³¹ Abalo abo basebensesha shintu sha buumi bwa cishi ca panshi, tabeelete kwiililwa mushintu isho. Ceebo bubotu bwa cishi boonse bulaakwiinda.

³² Ndisuni kwaamba ayi mwaanguluke mushintu shoonse shilenga kulisukama. Muntu uteebete ulalisukamabo shintu sha Mwaami, nkokwaamba ayi mbweenga wamukondelesha.

³³ Sombi muntu weebete ulalisukamabo ashintu sha mucishi ca panshi ceebo cakuyanda kukondelesha mukaakwe.

³⁴ Aboobo ulacata mambili. Mwanakashi uteebetwe nabi utana kwishiba musankwa ulalisukama shapali nguwe mwiine amulimo wa Mwaami ceebo ulisuni kuba muntu ushomeka mumubili amumushimu. Sombi mwanakashi weebetwe ulalisukama shintu sha buumi bwa cishi, ceebo cakuyanda kukondelesha ibaye.

³⁵ Ndaamba boobo kwaamba ayi mucafweeko. Nshintoomukasha, sombi ndisuni kwaamba ayi mucite shiluleme sheelete, alimwi mulibeenge kumulimo wa Mwaami camoyo womwibo, kutaaku cimwi nceenga kamuyeeya.

³⁶ Na umwi wayeeya ayi utoobisha kukasha mwanaakwe kweebwa alimwi wabona ayi wakula akuyeeya ayi ulyeelete kweebwa, aacite kweelana ambwaayeeya. Taatoobishila Lesa na weebesha mwanaakwe.

³⁷ Sombi inga caba ayi mukuyanda kwa moyo wakwe mwiine, wayeeya kutamweebesha. Na mwiine wayeeya boobo cakutakakatishikwa alimwi wasuna kwaamba ayi cibe boobo, muntu uyo inga wacita kabotu na wamukasha kweebwa.

³⁸ Ono aboobo alakwe weenga weeba wacita kabotu, sombi uyo utakwe kweeba, weendaawo kucita kabotu.

³⁹ Mwanakashi uleendeleshekwa amulawo wa ibaye kulilabo kaali muumi ibaye uyo. Nakubi boobo ibaye na wafwa mwanakashi inga weebwa kumusankwa uli woonse ngweenga kaasuni. Ono musankwa uyo ulyeelete kuba mushomi.

⁴⁰ Sombi inga wekala kaasangalete abuumbi na wabula kweebwa. Uyu ngumuyeeyo wangu alimwi ndishi kwaamba ayi anebo ndicite Mushimu wakwe Lesa.