1 Bene Kolinto 4 - Baibo Busansulushi Bwa Libuku Ili

Basebenshi bakwe Klistu mbobeelete kuba

¹ Mwebo mulyeelete kutubona ayi tuli basebenshi bakwe Klistu abo bakapekwa kweendelesha mumakani abushishi akwe Lesa.

² Ono ciyandikabo kubakapekwa mulimo uyu nkwaamba ayi bashomeke kumwaami wabo.

³ Nebo palwaangu, tacicite mulandu nabi mwaŋombolosha nabi nkuta imwi ya bantu, alimwi ncakwiila nshilyoomboloshi nemwiine.

⁴ Mumiyeeyo yangu taaku ncentooyeeya ayi ndakabisha. Nakubi boobo ici tacaambi ayi nshicite mulandu. Mwaami Lesa ngooŋombolosha.

⁵ Aboobo mutoomboloshi muntu nabi womwi kushikila Jesu Klistu akese mukoombolosha. Lakwe aakwisa ulaakuyubulula shabushishi bwa mumunshinshe alimwi ulaakubika patuba miyeeyo ya mumyoyo ya bantu. Lyalo Lesa ulaakulumbaisha muntu woonse kweelana ambwaaelete.

⁶ Mumakani oonse aya ngondaamba nobamakwesu, ndasebensesha liina lyangu alyakwe Apolosi mbuli citondesho ayi mwishibe caamba makani ayo aamba ayi, “Amubambe shaamba Malembo akwe Lesa.” Lyalo mutanoolisumpula ceebo ca muntu womwi akusuula umwi.

⁷ Anu ngani wakakupa bunene pabamwi? Sa te nguLesa wakakupa shintu shoonse nshoocite? Ino ono inga walisumpula buyani pashintu shakupekwabo?

⁸ Sa nkokwaamba ayi mwaba kale ashintu shoonse shiyandika? Sa mwabila kale? Sa mwaba baami swebo katutana? Necabota nemwalinga baami cancinencine, naakwiinga tweendelesha pantu pomwi.

⁹ Ceebo ndabona kwaamba ayi swebo sobatumwi Lesa wakatubika kwisule kwiine anga mbantu bapingulwa kucaikwa. Twaba anga ncintu cakweebela kushilengwa shoonse, kuteeshibo kubantu, sombi abaanjelo boonse.

¹⁰ Swebo tuli baluya ceebo cakwe Klistu. Sombi mwebo muli basongo muli Klistu. Swebo tuli batentu, sombi mwebo muli bayumu. Mwebo mulalemekwa, swebo tulasuulwa.

¹¹ Abobulya tuloona nsala alimwi tuleendabo anyotwa. Tatufwali kabotu tuloomwa abuumbi, tuli beshikulongalonga.

¹² Tulasebensa cankusu kwaamba ayi tucane shiyandika. Na bantu batushingana tulasenga Lesa kwaamba ayi abape coolwe. Na batupensha, nkuumunabo.

¹³ Ciindi ndibatubekesha tulabakumbulabo mumaswi abombu. Ono kushikila cino ciindi twaba anga ngamatombe a cishi ca panshi nabi shintu shisuulitwe kubantu boonse.

¹⁴ Nshintoolembela ayi mulenshe nsoni, sombi kwaamba ayi mucenjesheeko mbuli bana bangu mboonsunishi.

¹⁵ Nakubi kwaamba ayi mulicite bafundishi bashika kushuulu likumi mubuumi bwanu bwa buKlistu, tamucite bamaishiwanu baanji. Mukwiinga kwiinda muli Klistu Jesu ndakaba ishiwanu ceebo cakumushimikila Makani Abotu.

¹⁶ Aboobo ndamusenga kwaamba ayi mukonkele nsheencita.

¹⁷ Paceebo ceeco ntoomutumina Timoti, uli anga ngumwanaangu musankwa ngoonsunishi alimwi uyo ushomeka muMwaami Lesa. Ulaakumwiibalusha shabwikaalo bwangu muli Klistu Jesu ubo bweendelana ansheenjiisha kuli koonse mushoonde shoonse.

¹⁸ Bamwi batalika kulisumpula anga teshi nkeseeko uko.

¹⁹ Sombi na Mwaami kaayanda, ndaakwisa uko onoonobo. Lyalo ndaakwiipushepusha akwishiba, kuteshibo nshebaamba abo, sombi ankusu nshibasebensesha bantu abo balisumpula.

²⁰ Ceebo Bweene bwakwe Lesa tabweelibo mukwaamba, sombi buleela mumicito.

²¹ Ono amusaleewo ncemusuni, nkese amusako, na amoyo wa lusuno akulibombya.