1 Bene Kolinto 16 - Baibo Busansulushi Bwa Libuku Ili

Shipo shakucafwa bashominyinaabo

¹ Ono pamakani a shipo shakucafwa bashomi bamwi, amucite bweenka mbondakalwiita shoonde sha kuGalatiya.

² PaSondo lyoonse, womwi awomwi pakati kanu ulyeelete kupatula maali a lucafwo ulo kumaali akwe amwi oonse kweelana ambwaacana, kwaamba ayi ndaakwisa kutakabi kusowa ciindi mukubunganya shipo.

³ Lyalo ndaakwisabo, ndaakupa nkalata shakusansulula baabo mbomwakasala akubatuma kuJelusalemu kwaamba ayi bakatole shipo shanu.

⁴ Ono na cilayandika ayi anebo nkaye, ingayi tulaakweendelabo pantu pomwi.

Paulo mbwaakayeeya mbweshi akeende

⁵ Ono uko ndaakumufwakashisha, ndaakuswa kuMakedoniya ceebo nkoontooyeeya kwiinda.

⁶ Ndaakwikalaanu ndabona kwaciindi cilaamfu nabibo mupewo woonse kwaamba ayi mukancafweeko shiyandika mulweendo ndweshi nkanyamuke kuswa kooko. Cito alwalo na lulaakuba lwa kuli.

⁷ Nshisuni kwisa mukumufwakashisha kwaciindi ciniini, sombi ndisuni kwaamba ayi na Lesa wasuminisha, ciindi cikalaampekobo cakwikalaanu.

⁸ Kwalo ndanoocishiite kuEfeso kuno kushikila bushiku bwa Pentekositi.

⁹ Kuno Lesa wancalwita mulyango kwaamba ayi ncite mulimo unene nakubi ayi kuli bampikisha baanji.

¹⁰ Na Timoti akese uko amukabone kwaamba ayi wabambwa kabotu, ceebo utoocita milimo ya Mwaami Jesu bweenka mbuli ndime.

¹¹ Aboobo kutabi muntu umusuula, sombi mulyeelete kumucafwa kwaamba ayi atolelele mulweendo lwakwe muluumuno akuboola kuli ndime ceebo nebo ntoomulangila pantu pomwi abashominyineesu bamwi.

¹² Ono pamukwabesu Apolosi, ndakamusengesha ayi amufwakashishe pantu pomwi abashomi bamwi. Ono taakwe kusumina kwisa bulya bweenka, sombi aakucana ciindi.

Maswi akweelaako

¹³ Amucenjele, mwiimikane cakutatenkaana mulushomo. Amube bantu batacite boowa, bayumu.

¹⁴ Kamucita shintu shoonse mulusuno.

¹⁵ Mulishi kabotu kwaamba ayi Sitefanasi abamuŋanda yakwe, mbobataanshi kushoma muli Jesu mucishi ca Akeya alimwi bakalibenga beene kusebensela bashominyinaabo. Ono ntoomusenga, nobamakwesu, ayi

¹⁶ mukonkele butanjilili bwa bantu bamushobo wooyu, abamwi batoosebensela pantu pomwi ambabo.

¹⁷ Ndakondwa kwaamba ayi Sitefanasi, Fotyunatasi aAkaikasi besa, ceebo nakubi kwaamba ayi mwebo tatubete soonse, bacita nshimwakalinga kweelete kucita.

¹⁸ Bakansangalasha bweenka mbobakamusangalasha mwebo. Bantu ba mushobo uyu amubalemeke.

¹⁹ Bamushoonde sha kucishi ca Esha bamwaansha. Akwila aPulisila pantu pomwi abaabo boonse balambila Lesa kuŋanda yabo bamwaansha camaansa obilo muMwaami Jesu.

²⁰ Bamakwabesu muli Klistu, boonse kuno bamwaansha. Amwaanshanye mulusuno lwiine lwiine lwa buKlistu.

²¹ Anebo nePaulo ndalemba kwaansha uku alyaansa lyangu.

²² Na kuli muntu utasuni Mwaami Jesu, aashinganishikwe! Malanata! Nkokwaamba ayi, “NoBaami besu, kamwisa!”

²³ Luse lwa Mwaami Jesu lube amwebo.

²⁴ Lusuno lwangu lube amwebo noonse muli Klistu Jesu.