1 Bene Kolinto 15 - Baibo Busansulushi Bwa Libuku Ili

Kubuka kwakwe Klistu

¹ Ono nobamakwesu, ndisuni kumwiibalusha Makani Abotu ngondakamushimikila. Mwakaatambula alimwi ndolwiimbi lwa lushomo lwanu.

² Mulapulushikwa kulilabo na mwacatisha Makani Abotu ayo ngondakamushimikila. Cabula boobo ngayi lushomo lwanu taaku mbolubete.

³ Ceebo makani anene ngondakamuletela ngoaayo anebo ngondakapekwa. Makani ayo ngakwaamba ayi Klistu wakafwa ceebo ca shibiibi shesu bweenka bwaamba Malembo akwe Lesa.

⁴ Ncakwiila kweelana aMalembo eenka ayo wakabikwa mucuumbwe akubushikwa pabushiku bwatatu.

⁵ Wakaboneka kuli Pita, lyalo akubatumwi likumi abobilo boonse.

⁶ Kuswawaawo wakaboneka kubashomi beendilila myaanda yosanwe paciindi comwi. Baanji pakati kabo bacili boomi nakubi kwaamba ayi bamwi bakafwa.

⁷ Lyalo wakaboneka kuli Jemusi, mpeeke pesule kubatumwi boonse.

⁸ Cakweelaako wakaboneka akuli ndime nakubi kwaamba ayi ndi anga ngumuntu utakwe kushalwa paciindi ceelete.

⁹ Ceebo nebo nshiindi mutumwi nabi womwi alimwi nsheeleteewo akwiitwa ayi mutumwi ceebo ndakalinga kupensha coonde cakwe Lesa.

¹⁰ Sombi kwiinda muluse lwakwe Lesa ndakaba mbuli mboombete bulya alimwi luse ulo ndwaakantondesha talukwe kunyonyookabo, sobwe. Sombi ndakasebensa cankusu kwiinda batumwi bamwi boonse. Nakubi boobo teshi ndime ndakasebensa, sombi nduse lwakwe Lesa luli anebo.

¹¹ Aboobo nakubi kwaamba ayi ndime ntooshimikila nabi mbaabo bamwi, soonse tulashimikila Makani Abotu ayo eenka ngomwakashoma.

Kubuka kuswa kubafu

¹² Ono na kulashimikilwa ayi Klistu wakabushikwa kuswa kubafu, nobamwi inga mwaamba buyani ayi taaku weshi akabuke kuswa kubafu?

¹³ Sombi na taaku kubuka kuswa kubafu, ingayi aKlistu taakwe kubushikwaawo.

¹⁴ Na Klistu taakwe kubushikwa, ingayi kushimikila kwesu alushomo lwanu taaku mboshibete.

¹⁵ Ciinda waawo ncakwaamba ayi twaba bakamboni babeshi pali Lesa mukwiinga twakaamba ayi ndushinisho Lesa wakabusha Klistu kuswa kubafu. Sombi na ncakwiila bafu teshi bakabuke, ingayi Lesa taakwe kubusha Klistu.

¹⁶ Ceebo na bafu tababushikwi kuswa kubafu, anu aKlistu taakwe kubushikwa.

¹⁷ Na Klistu taakwe kubushikwa kuswa kubafu, ingayi lushomo lwanu nkapongo kafwite alimwi mucilibo mushibiibi shanu.

¹⁸ Nkokwaamba ayi abaabo boonse bakafwita muli Klistu, balisowekete.

¹⁹ Sombi na kulangila kwesu muli Klistu kulacatikishabo buumi bwa panshi pano, ingayi swebo tulanyumfwisha nkumbu kwiinda bantu boonse mucishi ca panshi.

²⁰ Ono ncakwiila Jesu wakabushikwa kuswa kubafu akuba citondesho cakwaamba ayi uyo woonse eshi akafwe, ulaakubushikwa kuswa kubafu.

²¹ Ceebo bweenka lufu mbolwakesa kwiinda mumuntu, akwalo kubushikwa kuswa kubafu kwakesa kwiinda mumuntu.

²² Bweenka bantu boonse mbobafwa kwiinda muli Adamu, akwalo kubushikwa kwa bantu boonse mbweshi kukabe kwiinda muli Jesu Klistu.

²³ Sombi womwi awomwi ulaakubushikwa paciindi cakwe ceelete, Klistu ngowakataanguna, ono aakwisa, mbaabo bamushoma.

²⁴ Lyalo mamanino alaakushikila, Klistu ulaakupa bwaami kuli Lesa Ishi aakumana kunyonyoola bweendeleshi boonse, buleelo boonse ankusu shoonse.

²⁵ Ceebo Klistu ulyeelete kweendelesha kushikila Lesa akome balwani boonse akulengesha ayi babe mpopakulyata myeendo yakwe.

²⁶ Mulwani wakweelaako kukomwa, ndufu.

²⁷ Ceebo Malembo akwe Lesa alaamba ayi, “Lesa wakalengesha ayi shintu shoonse shibe mpopakulyata myeendo yakwe.” Cilibwenekete patuba ayi maswi aamba ayi, “Shintu shoonse,” taabikiiko aLesa mwiine, uyo ubika shintu shoonse munkusu shakwe Jesu.

²⁸ Sombi shintu shoonse ndishibikwa mubweendeleshi bwakwe Klistu, Mwanaakwe Lesa, lakwe mwiine Mwaana ulalibika mumaansaakwe Lesa, uyo wakabika shintu shoonse mubweendeleshi bwakwe kwaamba ayi ono Lesa eendeleshe shintu shoonse cakumaninina.

²⁹ Ono na taaku kubushikwa kuswa kubafu, ino balya babombekwa ceebo ca bafu balaakucita buyani? Ino ono nceebonshi bantu balabombekwa ceebo cabo na bafu tababushikwi?

³⁰ Nabi na swebo ncetwikalila buumi bwacipulukepuluke lyoonse, nciinshi?

³¹ Nobamakwesu nebo lyoonse ndapulukila kwempe kubantu! Calengesha ayi ŋambe boobo, nkukondwa nkoocite ceebo canu mukuba pomwi aKlistu Jesu Mwaami wesu.

³² Ono na ndakalwana abantu muEfeso abo bakalinga anga ninkalamu kwiindabo miyeeyo iswa kubantu, ingayi nebo mpindu yangu nciinshi? Sombi na taaku kubuka kwa bafu, anu nkucitabo bweenka bwaamba bantu ayi, “Atulye akunwa ceebo ciilo mabala tulaakufwa.”

³³ Mutabecekwi, “Shiweenda aumineme, awebo inga waminama.”

³⁴ Amutalike kusebensesha maano mbuli mbwaaelete alimwi mucileeke kubisha. Ceebo nkobali bateshi Lesa, ici ndacaamba kwaamba ayi mufwe nsoni.

Mubili bafu ngweshi bakabukaawo

³⁵ Umwi muntu inga weepusha ayi, “Ino bafu balabushikwa buyani? Balabuka amubili wa mushobonshi?”

³⁶ Webo omuntu muluya! Ndyooshanga mbuto, sa te ilataanguna yafwa keetana kumena?

³⁷ Alimwi tooshangi ciboneka anga nimbuto ndiimena, sombi mbuto iine, na njamaila nabi mbuto ya cishango cimwi.

³⁸ Sombi Lesa ulabamba ceeco ciswaamo kwaamba ayi ciboneke mbwaasuni. Lesa ngoopa ceeco ciswa munseke yomwi yomwi kuboneka mbuli mboyeelete.

³⁹ Nyama ya shintu shoonse shiyoya taibete mushobo womwi. Bantu balicite ya mushobo umwi, shinyama imwi, bayuni imwi, inswi ashalo imwi.

⁴⁰ Kuli shilengwa sha kwiculu asha panshi. Bulemu bwa shakwiculu mbumbi abwalo bulemu bwa shapanshi mbumbi.

⁴¹ Bulemu bwa lisuba mbumbi, bwa mweenshi mbumbi abwalo bwa nyenyeenshi mbumbi. Bulemu bwa nyenyeenshi yomwi ayomwi bulipusene.

⁴² Mbweeke ubo mbweshi kukabe pakubushikwa kuswa kubafu. Mubili ngotubika mucuumbwe ngumubili ubola, sombi ndyoobushikwa ulaba mubili utabooli.

⁴³ Mubili ngotubika mucuumbwe ulaba kooli ubiibi alimwi utacite nkusu, sombi pakubushikwa kuswa kubafu ulaakuba ubotu alimwi ucite nkusu.

⁴⁴ Mubili ngotubika ngumubilibo wa buntu, sombi pakubushikwa kuswa kubafu ulaakuba wa mushimu. Na mubili wa buntu nkouli, ingayi awalo wa mushimu nkouli.

⁴⁵ Ceebo Malembo akwe Lesa alaamba ayi, “Adamu muntu mutaanshi wakalengwa ayi abe muumi.” Sombi Adamu mucaalishi nguMushimu upa buumi.

⁴⁶ Teshi mubili wa mushimu utaanguna, sombi ngwabuntu, kuboolaawo ngwamushimu.

⁴⁷ Adamu mutaanshi wakalinga wa pacishi ca panshi alimwi wakaswa kubulongo, sombi Adamu wabili, wakaswa kwiculu.

⁴⁸ Ubo bwakalinga muntu wakaswa kubulongo, abalo bapanshi mbobabete alimwi ubo bubete wooyo wakaswa kwiculu, abalo bakwiculu mbobabete.

⁴⁹ Ono bweenka mbotwakakosha wooyo wakaswa kubulongo, mbweshi tukakoshe wooyo wakaswa kwiculu.

⁵⁰ Nobamakwesu, ncentokwaamba cakwaamba ayi muntu ucite mubili wa buntu taakoonshi kwinjila muBweene bwakwe Lesa alimwi cifwa tacikoonshi kwikala kooko kutaaku lufu.

⁵¹ Ono amukutike cikani ici cabushishi. Swebo soonse teshi tukafwe, sombi soonse tulaakusandulwa

⁵² muciindi ciniinibo ceelenebo akukapula kwa liinso pakulila lupeenga lwakweelaako. Ceebo lupeenga lulaakulila, bafu balaakubushikwa amibili itafwi, aswebo tulaakusandulwa.

⁵³ Ceebo mubili uyu ubola ulyeelete kusandulwa kuba utabooli, mubili uyu ufwa ulyeelete kusandulwa kuba utafwi.

⁵⁴ Ono mubili uyu ubola waakusandulwa kuba utabooli alimwi mubili ufwa waakusandulwa kuba utafwi, lyalo ndyeshi akacitike cancinencine Malembo akwe Lesa aamba ayi, “Lufu lwakomwa.”

⁵⁵ “Kukoma kwako olufu kuli kuli? Lubola lwako olufu luli kuli?”

⁵⁶ Lubola lwa lufu ncibiibi alimwi cipa nkusu cibiibi, njiMilawo.

⁵⁷ Sombi aalumbwe Lesa wakalengesha ayi tukome kwiinda muMwaami wesu Jesu Klistu.

⁵⁸ Aboobo nobamakwesu nomusunikwi, amwiimikane mulushomo cakutatenkaana. Amubike myoyo yanu kumulimo wa Mwaami ceebo mulishi ayi tamutoosebensela Mwaami kwakubula mpindu.