1 Bene Kolinto 13 - Baibo Busansulushi Bwa Libuku Ili

Lusuno

¹ Nebo inga kaancikonsha kwaamba milaka yaamba bantu nabibo yaamba baanjelo, ono na kaantacite lusuno kwaamba kwangu kuli anga nkulila kwa mulangu nabibo cinshimbi citokuumwa.

² Na kaancite cipo cakwaamba maswi akwe Lesa, akwishiba lushinisho lushisitwe akuba alushibo lwa shintu shoonse alimwi na kaancite lushomo lukonsha kutuntulusha kalundu, sombi kaantacite lusuno, ingayi taaku mboombete.

³ Inga ndaaba shintu shangu shoonse kubakandu, mpashi akusumina ayi mubili wangu utentwe, ono na kaantacite lusuno, ingayi taaku ncindacita.

⁴ Lusuno lulakalika moyo akulengesha nkumbu alimwi talupi munyono, kulilumbaisha nabi kulisumpula.

⁵ Lusuno talupi kubula bulemu, kuliyanda nabi kukalala bwaangu. Ncakwiila lusuno talulengeshiiwo kubikilanina mfundilishi mumoyo.

⁶ Lusuno talulengeshiiwo muntu kusangalala mububi, sombi mushalushinisho.

⁷ Lusuno talulengeshiiwo kuboola pesule. Sombi lulalengesha kushoma, kulangila abushimoyonteeka mumapensho lyoonsebo.

⁸ Lusuno ndwamuyayaya, sombi cipo cakwaamba maswi akwe Lesa cilaakweela, kwaamba milaka yeensu kulaakumana alwalo lushibo lulaakuloba.

⁹ Ceebo lushibo lwesu akwaamba maswi akwe, Lesa tashishikite peene mposheelete.

¹⁰ Aboobo ico cimaninite caakwisa, citamaninite cilaakuloba.

¹¹ Kaancili mwanike kwaamba akuyeeya koonse kwakalinga kwa bwanike. Ono ingayi nkule, nshila sha bwanike shoonse ndakashileka.

¹² Nshetubona bulya shintu shilyaanga nsheesho shiboneka mucilola. Sombi paciindi ico tulaakubonana meenso ameenso. Lushibo ndotucite talumaniniteewo, sombi paciindi ico lulaakumaninina bweenka Lesa nebo mbwaanshi cakumaninina.

¹³ Ono pali shintu shotatwe sheshi shikabule kumana. Ishi ndushomo, lulangilo alimwi alusuno. Nakubi boobo pasheeshi, cinene ndusuno.