1 Bene Kolinto 12 - Baibo Busansulushi Bwa Libuku Ili

Shipo shiswa kuMushimu Usalashi

¹ Ono nobamakwesu, pacikani ca shipo sha Mushimu Usalashi, ntooyanda ayi mwishishibishe.

² Mulishi kwaamba ayi ciindi ndimwakalinga bakunsengwe, mwakalinga kutolwa munshila shipusenepusene kuya cilambila shibumbwabumbwa shitaambi.

³ Aboobo ndisuni kwaamba ayi mwishibe ayi taaku muntu uli woonse utokweendeleshekwa aMushimu wakwe Lesa weenga waamba ayi, “Jesu ashinganwe,” alimwi taaku weenga waamba ayi, “Jesu nguMwaami,” sombi Mushimu Usalashi wamutanjilila.

⁴ Shipo shilipusenepusene, sombi ushipa nguMushimu Usalashi womwi eenkabo.

⁵ Kuli nshila shakusebenselaamo Lesa shiinji, sombi nguLesa womwi ngotusebensela.

⁶ Kuli nkusu shipusenepusene, sombi Lesa ngomwi usebensesha nkusu isho mubantu boonse.

⁷ Mushimu Usalashi ulapa womwi awomwi cipo kwaamba ayi acisebenseshe mukucafwa bantu boonse.

⁸ Mushimu Usalashi ulapa muntu umwi cipo cakwaamba cabusongo, sombi Mushimu weenka uyo ulapa muntu umwi cipo cakupanda maano bamwi.

⁹ Mushimu weenka womwi uyo ulapa umwi lushomo, aumwi ulamupa nkusu shakushilika.

¹⁰ Mushimu ulapa umwi nkusu shakucita shaankamiko, umwi ulamupa nkusu shakwaamba maswi akwe Lesa. Umwi ulamupa nkusu shakwishiba bupusano bwa shipo shiswa kuMushimu Usalashi ashimwibo. Umwi ulamupa nkusu shakwaamba milaka yeensu, sombi umwi ulamupa nkusu shakupandulula milaka iyo.

¹¹ Ono ucita shoonse nguMushimu womwi weenka. Ulapa shipo shipusenepusene kumuntu womwi awomwi kweelana ambwaayanda.

Shipansha shiinji mumubili womwi

¹² Klistu uli anga ngumubili womwi ucite shipansha shiinji. Nabi ulicite shipansha shiinji, ngumubili womwi.

¹³ Mbweeke ubo, swebo soonse, baJuda nabi baswamashi bakunsengwe, basha nabi baangulukite, twakabombekwa muMushimu womwi kwaamba ayi tube mubili womwi alimwi soonse twakatambula Mushimu womwi mumyoyo.

¹⁴ Mubili taucite cipansha comwi, sombi nshiinji.

¹⁵ Na cimpanta caamba ayi, “Mboontabete lyaansa, nshibete cipansha ca mubili,” ino sa ico inga calengesha kwaamba ayi citabi cipansha ca mubili?

¹⁶ Nabi na kutwi kwaamba ayi, “Mboontabete liinso nshibete cipansha ca mubili,” ino sa ico inga calengesha kwaamba ayi citabi cipansha ca mubili?

¹⁷ Ono mubili woonse newalingabo liinso, naakwiinga katunyumfwa buyani? Nabi mubili kauli kutwi, naakwiinga katunyumfwa buyani bweema?

¹⁸ Ono kweelana mbocibete, Lesa wakabika cipansha comwi comwi mumubili pamusena mpocibete kweelana ambwaakasuna mwiine.

¹⁹ Necakaba ayi shipansha shoonse shaba cipansha comwi, naakwiinga mubili taakuuwo.

²⁰ Ono mbuli mboshibete shintu, kuli shipansha shiinji, sombi ngumubili womwi.

²¹ Ono aboobo liinso talikoonshi kwaambila lyaansa ayi, “Toocite ncito kuli ndime.” Nabi mutwi kwaambila shimpanta ayi, “Tamucite ncito kuli ndime.”

²² Ceebo nabi shipansha sha mubili shiboneka kubula nkusu, shilayandika abuumbi.

²³ Peculu lya waawo shipansha nshetuyeeyela kubula ncito bunene, nshisheesho nshetwiindaawo kubamba kabotu. Ashalo shipansha shitaboneki kabotu bunene, tulashifwalika shakufwala shibotu.

²⁴ Sombi isho tashiyandiki kucitwa kushipansha shiboneka kabotu. Lesa mwiine ngowakanunganya shipansha sha mubili mukupa bulemu kushipansha shitacite bulemu buunji.

²⁵ Cakaba boobo kwaamba ayi kutabi kupansaana mumubili, sombi kwaamba ayi shipansha shoonse shinoocafwana.

²⁶ Na comwi cipansha caciswa, shoonse shipansha shimwi shilaciswa. Ncakwiila na cipansha comwi calemekwa, shipansha shimwi shoonse shilasekelela pantu pomwi.

²⁷ Ono mwebo noonse muli mubili wakwe Klistu alimwi womwi awomwi pakati kanu ncipansha cakwe.

²⁸ Mucoonde, Lesa wakataanguna kubika batumwi, kuboolaawo balaluki, kubolaawo bafundishi. Lyalo ndipakesa abo bantu beshikucita shaankamiko, bamwi abo bakapekwa nkusu shakushilika, kucafwa bamwi, kweendelesha ncito nabi kwaamba milaka yeensu.

²⁹ Sa boonse mbatumwi? Sa boonse mbalaluki? Sa boonse mbafundishi? Sa boonse bakapekwa nkusu shakucita shaankamiko?

³⁰ Sa boonse balicite shipo shakushilika? Sa boonse balaamba mumilaka yeensu? Sa boonse balakonsha kusansulula milaka imwi? Shoonse ishi tabwishi mboshibete, tau.

³¹ Sombi mwebo amubike myoyo yanu kushipo shiindaawo. Ono ntoomutondesha nshila ibotu kwiinda shoonse.